ທານນ້ຳແຂງສະວິດ ລະລາຍຫຼາຍທີ່ສຸດເປັນປະຫວັດການ

22

ສຳນັກຂ່າວຣອຍເຕີລາຍງານໃນວັນທີ 29 ກັນຍາຜ່ານມາວ່າ: ທານນ້ຳແຂງສະວິດ ມີອັດຕາການລະລາຍຮ້າຍແຮງທີ່ສຸດ ນັບແຕ່ມີການຈົດບັນທຶກມາກວ່າສະຕະວັດ ໂດຍເກີດການລະລາຍໄປ 6% ຂອງປະລິມານທັງໝົດໃນປີນີ້ ຫຼື ເກືອບ 2 ເທົ່າຂອງການບັນທຶກໃນປີ 2001.

ລາຍງານລະບຸວ່າ: ປີນີ້ເປັນການລະລາຍຄັ້ງຮ້າຍແຮງທີ່ສຸດ ຈົນເຮັດໃຫ້ກ້ອນຫີນທີ່ຖືກຝັງມານານນັບພັນປີປາກົດຂຶ້ນ, ອີກທັງສົບຂອງຜູ້ເສຍຊີວິດ ລວມທັງຊາກຍົນທີ່ສູນຫາຍໄປເຂດພູເຂົາແອລປ໌ ເມື່ອຫຼາຍສິບປີກ່ອນໜ້ານີ້ ກໍສາມາດກູ້ຄືນມາໄດ້, ຂະນະທີ່ທານນ້ຳແຂງຂະໜາດນ້ອຍ ກໍລະລາຍຫາຍໄປຈົນໝົດ.

May be an image of nature

ທັງນີ້, ທານນ້ຳແຂງໃນພູເຂົາແອລປ໌ ຫຼາຍກວ່າເຄິ່ງໜຶ່ງຢູ່ໃນອານາເຂດຂອງສະວິດເຊີແລນ ໂດຍການສູນເສຍໃນປີນີ້ ເປັນຜົນພວງມາຈາກໄລຍະລະດູໜາວຜ່ານມາຫິມະຕົກໜ້ອຍກວ່າເກນປົກກະຕິ ບວກກັບຄື້ນຄວາມຮ້ອນທີ່ປົກຄຸມທະວີບເອີຣົບໃນເດືອນກໍລະກົດ – ສິງຫາຜ່ານມາ. ນອກຈາກນີ້, ຖ້າຫາກວ່າໂລກຍັງປ່ອຍອາຍພິດເຮືອນແກ້ວເພີ່ມຂຶ້ນ ອາດຈະເຮັດໃຫ້ທານນ້ຳແຂງລະລາຍຫຼາຍເຖິງ 80% ຂອງປະລິມານທີ່ມີປັດຈຸບັນໃນອີກ 82 ປີຂ້າງໜ້າ.

May be an image of nature

ແນວໃດກໍຕາມ, ຄະນະກໍາມະການວ່າດ້ວຍການປ່ຽນແປງຂອງສະພາບດິນຟ້າອາກາດ ( IPCC ) ລາຍງານວ່າ ການປ່ອຍອາຍພິດເຮືອນແກ້ວໃນອະດີດ ເຮັດໃຫ້ເກີດການປ່ຽນແປງສະພາບດິນຟ້າອາກາດ ( ໂລກຮ້ອນ ) ຈະເຮັດໃຫ້ທານນ້ຳແຂງລະລາຍຫາຍໄປອີກຈຳນວນຫຼວງຫຼາຍໃນຊຸມປີຕໍ່ໜ້າ.