ລາວ-ຈີນ ລົງນາມຮ່ວມມື ວ່າດ້ວຍວຽກງານມາດຕະຖານເຕັກນິກ ແລະ ກວດສອບທາງລົດໄຟ

184

ກົມມາດຕະຖານ ແລະ ວັດແທກ, ກະຊວງອຸດສາຫະກໍາ ແລະ ການຄ້າ  ສປປ ລາວ ຮ່ວມກັບ ມະຫາວິທະຍາໄລ ຄົມມະນາຄົມ ຕາເວັນຕົກສ່ຽງໃຕ້ ສປ ຈີນ ເຊັນບົດບັນທຶກການຮ່ວມມື ວ່າດ້ວຍ ວຽກງານມາດຕະຖານເຕັກນິກ ແລະ ກວດສອບທາງລົດໄຟ.

ພິທີເຊັນບົດບັນທຶກດັ່ງກ່າວຈັດຂຶ້ນໃນວັນທີ 29 ກັນຍາ 2022 ທີ່ກະຊວງອຸດສາຫະກໍາ ແລະ ການຄ້າ ໂດຍການລົງນາມຂອງ ທ່ານ ວຽງທອງ ວົງທະວິໄລ ຫົວໜ້າກົມມາດຕະຖານ ແລະ ວັດແທກ, ກະຊວງອຸດສາຫະກໍາ ແລະ ການຄ້າ ແລະ ທ່ານ ຢາງ ຕານ ອະທິການບໍດີ ມະຫາວິທະຍາໄລ ຄົມມະນາຄົມ ຕາເວັນຕົກສຽງໃຕ້ ສປ ຈີນ (ເຊັນລົງນາມຜ່ານ ວີດີໂອ ທາງໄກ), ມີ ທ່ານ  ໂອ ຮ່າຍ ຫຼີນ ຮອງຫົວໜ້າຫ້ອງການຄວບຄຸມ ແລະ ຄຸ້ມຄອງການຕະຫຼາດ ແຂວງເສສວນ ສປ ຈີນ, ມີບັນດາຜູ້ຕາງໜ້າແຕ່ລະພາກສ່ວນ, ບັນດາຫົວໜ້າກົມ-ຮອງຫົວໜ້າກົມ ຈາກກະຊວງອຸດສາຫະກຳ ແລະ ການຄ້າ ແລະ ພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.

ໃນພິທີ ທ່ານ ວຽງທອງ ວົງທະວິໄລ ຫົວໜ້າກົມມາດຕະຖານ ແລະ ວັດແທກ ກ່າວວ່າ: ຈຸດປະສົງ ແລະ ຄວາມເປັນມາຂອງໂຄງການຮ່ວມມືດັ່ງກ່າວ ແລະ ການກະກຽມເຊັນບົດບັນທຶກຄັ້ງນີ້ ໂດຍອີງໃສ່ການພັດທະນາທາງດ້ານເສດຖະກິດ ແລະ ສັງຄົມ ໃນ ສປປ ລາວ ໄດ້ມີການຂະຫຍາຍຕົວຢ່າງຕໍ່ເນື່ອງ ເຮັດໃຫ້ຄວາມຕ້ອງການໃນການນໍາໃຊ້ ແລະ ຄວາມຮູ້ກ່ຽວກັບມາດຕະຖານ-ເຕັກນິກ ຂອງລະບົບທາງລົດໄຟ ເພື່ອໃຫ້ການບໍລິການມີຄວາມຮັບປະກັນ ແລະ ປອດໄພໃນສັງຄົມ.

ຜ່ານການປຶກສາຫາລືທັງສອງຝ່າຍ ຈຶ່ງໄດ້ຕົກລົງເຫັນດີເປັນເອກະພາບຮ່ວມກັນສ້າງບົດບັນທຶກ ການຮ່ວມມື ວ່າດ້ວຍວຽກງານມາດຕະຖານເຕັກນິກ ແລະ ກວດສອບ ທາງລົດໄຟ ຊຶ່ງມີລາຍລະອຽດວ່າດັ່ງນີ້: ທັງສອງຝ່າຍໄດ້ຕົກລົງເລກະພາບກັນສ້າງບົດບັນຕໍ່ການຮ່ວມມືລະຫວ່າງສອງຝ່າຍເພື່ອຊ່ວຍເຫຼືອ ແລະ ຊຸກຍູ້ສົ່ງເສີມໃນການປັບປຸງຍົກລະດັບທາງດ້ານລະບຽບການ, ວິຊາການ, ມາດຕະຖານເຕັກນິກ ໃນການກວດສອບ ທາງລົດໄຟຄື: 1. ກຳນົດ ມາດຕະຖານ-ເຕັກນິກ ທາງລົດໄຟ ແຫ່ງຊາດ ຂອງ ສປປ ລາວ; 2. ສ້າງຕັ້ງຫ້ອງທົດລອງ ເພື່ອດຳເນີນການກວດສອບ, ຢັ້ງຢືນ ແລະ ຮັບຮອງ ມາດຕະຖານ ເຕັກນິກ ທາງລົດໄຟ; 3. ສະໜອງດ້ານນິຕິກຳ, ລະບຽບການ, ເຕັກນິກວິຊາການ ກ່ຽວກັບ ວຽກງານມາດຕະຖານ ທາງດ້ານທາງລົດໄຟ; 4. ພັດທະນາຊັບພະຍາກອນມະນຸດ ໄລຍະສັ້ນ, ໄລຍະກາງ, ໄລຍະຍາວ ຢູ່ ສປ ຈີນ; 5. ສະໜັບສະໜູນງົບປະມານຄາດຄະເນທັງໝົດໃນການສ້າງ ແລະ ກວດສອບມາດຕະຖານ ທາງລົງໄຟ ຂອງ ສປປ ລາວ ແມ່ນ 4.000.000 ຢວນ ປະມານ 9,6 ຕື້ກີບ ງົບປະມານດັ່ງກ່າວ ແມ່ນນໍາໃຊ້ເຂົ້າໃນການສ້າງຫ້ອງທົດລອງ, ເຄື່ອງມືອຸປະກອນ, ພັດທະນາບຸກຄະລາກອນ ແລະ ໃຊ້ຈ່າຍໃນການຈັດຕັ້ງປະຕິບັດໂຄງການຮ່ວມມື.

ທ່ານກ່າວຕື່ມວ່າ: ບົດບັນທຶກການຮ່ວມມືສະບັບນີ້ ມີກໍານົດໄລຍະເວລາ 5 ປີ ນັບແຕ່ມື້ລົງລາຍເຊັນ ເປັນຕົ້ນໄປ, ຖ້າໂຄງການດັ່ງກ່າວຈັດຕັ້ງປະຕິບັດມີປະສິດທິຜົນດີ ແລະ ທັງສອງຝ່າຍ ຜ່ານການເຫັນດີເປັນເອກະພາບກັນ ກໍສາມາດຕໍ່ອາຍຸໄດ້ອີກ 5 ປີ ພ້ອມນີ້, ຂ້າພະເຈົ້າເຊື່ອໝັ້ນວ່າ ການລົງນາມໃນບົດບັນທຶກການຮ່ວມມືໃນຄັ້ງນີ້ ຈະຊ່ວຍ ຊຸກຍູ້ການຮ່ວມມືໃນຂໍ້ລິເລີ່ມ ໜຶ່ງແລວທາງໜຶ່ງເສັ້ນທາງ ແລະ ການເຊື່ອມຕໍ່ໃນພາກພື້ນ, ໄດ້ປະກອບສ່ວນອັນໃໝ່ເຂົ້າໃນການພັດທະນາ ຄວາມຈະເລີນຮຸ່ງເຮືອງຂອງພາກພື້ນ ແລະ ແມ່ນມາດຕະຖານທີ່ສໍາຄັນ ເພື່ອຊຸກຍູ້ການພັດທະນາທີ່ມີຄຸນນະພາບສູງຂອງການເຊື່ອມຕໍ່ທາງ ລົດໄຟຈີນ-ລາວ ໃນຂອບເຂດການຮ່ວມມືເສດຖະກິດຮອບດ້ານລະດັບພາກພື້ນ (RCEP). ພ້ອມນີ້, ຈະປະຕິບັດແນວຄວາມຄິດ ປະຊາຄົມຮ່ວມຊະຕາກຳ ລາວ-ຈີນ ຢ່າງສະເໝີຕົ້ນ ສະເໝີປາຍ ສືບຕໍ່ກ້າວຂຶ້ນສູ່ລະດັບໃໝ່.

ທ່ານ ຢາງ ຕານ ອະທິການບໍດີ ມະຫາວິທະຍາໄລ ຄົມມະນາຄົມ ຕາເວັນຕົກສຽງໃຕ້ ສປ ຈີນ ກ່າວວ່າ: ປັດຈຸບັນທາງລົດໄຟ ຈີນ-ລາວ, ລາວ-ຈີນ ໄດ້ເປີດໃຫ້ບໍລິການແລ້ວ ໄດ້ກາຍເປັນໂຄງການໜຶ່ງທີ່ສໍາຄັນໃນການກໍ່ສ້າງປະຊາຄົມຮ່ວມຊະຕາກໍາ ຈີນ-ລາວ, ການຮ່ວມກັນສ້າງຕັ້ງ ໜຶ່ງແລວທາງໜຶ່ງເສັ້ນທາງ ໃຫ້ມີປະສິດທິພາບສູງ ແລະ ມື້ນີ້ມະຫາວິທະຍາໄລຂອງພວກເຮົາໄດ້ຮ່ວມລົງນາມກັບກົມມາດຕະຖານ ແລະ ວັດແທກ, ກະຊວງອຸດສາຫະກໍາ ແລະ ການຄ້າ ສປປ ລາວ ເພື່ອການຮ່ວມມືພັດທະນາຢັ້ງຢືນມາດຕະຖານທາງລົດໄຟແຫ່ງຊາດລາວ ພາຍໃຕ້ຂໍ້ລິເລີ່ມດໍາເນີນການປະຕິບັດໜຶ່ງແລວທາງໜຶ່ງເສັ້ນທາງ ໃນຂັ້ນຕອນຕໍ່ໄປແມ່ນພວກເຮົາຈະປະຕິບັດແນວຄວາມຄິດປະຊາຄົມຮ່ວມຊາຕະກໍາ ຈີນ-ລາວ ຢ່າງສະເໝີຕົ້ນສະເໝີປາຍ ໃນຫຼັກການເຄົາລົບເຊິ່ງກັນ ແລະ ກັນ, ໄວ້ເນື້ອເຊື່ອໃຈເຊິ່ງກັນ ແລະ ກັນ.

ທັງນີ້, ການຮ່ວມມືຜົນປະໂຫຍດທັງສອງຝ່າຍ ພາຍໃຕ້ການຊີ້ນໍາຂອງກະຊວງອຸດສາຫະກໍາ ແລະ ການຄ້າ ສປປ ລາວ ແລະ ແຂວງເສສວນ ເຊື່ອໝັ້ນວ່າການຮ່ວມມືຄັ້ງນີ້ ຈະກາຍເປັນຮູບແບບໃໝ່ ຈີນ-ລາວ, ຈະຊຸກຍູ້ການພັດທະນາທາງລົດໄຟແຫ່ງຊາດລາວແບບຍືນຍົງ ແລະ ການເຊື່ອມໂຍງເຂົ້າກັນກັບບັນດາປະເທດບ້ານໃກ້ເຮືອນຄຽງ, ຈະຊຸກຍູ້ການພັດທະນາເສດຖະກິດ-ສັງຄົມ ຂອງສອງຊາດ ຈີນ-ລາວ ແລະ ເພີ່ມສາຍພົວພັນຂອງສອງຊາດຕື່ມອີກ.