ບ່າວຫຼວງພະບາງຕົວແທນໜຸ່ມລາວໃນເວທີ Mister International ທີ່ປະເທດຟີລິບປິນ

37

ເຈົ້າຊູ້ແທ້ໂອະ!!! ບ່າວຫຼວງພະບາງ ຕ້ອງຂໍສະແດງ ຄວາມຍິນດີດ້ວຍ ສໍາລັບໜຸ່ມ ແສງຕາວັນ ຈະເລີນຜົນ MISTER INTERNATIONAL LAOS 2022 ຄົນຫຼ້າສຸດ ທີ່ຈະເປັນຕົວແທນຊາຍງາມຂອງປະເທດລາວ ຮ່ວມປະກວດ Mister International ຄັ້ງທີ 14 ຢູ່ປະເທດຟີລິບປິນ ໃນທ້າຍເດືອນຕຸລາ 2022 ທີ່ຈະມາເຖິງນີ້.

ມື້ນີ້ທີມຂ່າວບັນເທີງ ພາມາທໍາຄວາມຮູ້ຈັກກັບໜຸ່ມຄົນນີ້ໃຫ້ຫຼາຍຂຶ້ນ ໂດຍຜ່ານບົດສໍາພາດ: ສໍາລັບໜຸ່ມແສງຕາວັນ ຈະເລີນຜົນ ເປັນໜຸ່ມລາວຈາກເມືອງມໍລະດົກໂລກຫຼວງພະບາງ ປັດຈຸບັນອາຍຸ 23 ປີ ສູງ 185 ຊັງຕີແມັດ ຈົບການສຶກສາ ບໍລິຫານການບໍລິການໂຮງແຮມ ແລະ ທ່ອງທ່ຽວ ຈາກປະເທດອົດສະຕຣາລີ ແລະ ປັດຈຸບັນປະກອບອາຊີບທຸລະກິດສ່ວນຕົວກ່ຽວກັບການທ່ອງທ່ຽວຢູ່ເມືອງຫຼວງພະບາງ.

ສໍາລັບຄວາມຮູ້ສຶກທໍາອິດເລີຍທີ່ໄດ້ຮູ້ວ່າຕົນເອງໄດ້ຮັບຕໍາແໜ່ງ MISTER INTERNATIONAL LAOS 2022 ຮູ້ສຶກເປັນກຽດ ແລະ ພູມໃຈຫຼາຍທີ່ຖືກຄັດເລືອກໃຫ້ໄດ້ຮັບຕໍາແໜ່ງອັນຊົງກຽດດັ່ງກ່າວ ແລະ ມັນເປັນສິ່ງທີ່ບໍ່ເຄີຍຄາດຄິດມາກ່ອນວ່າຕົວເອງຈະໄດ້ເປັນຕົວແທນຂອງໄວໜຸ່ມລາວທົ່ວປະເທດ ໄປປະກວດຢູ່ເວທີລະດັບໂລກ ທີ່ມະນິລາ ປະເທດຟີລິບປິນທ້າຍເດືອນຕຸລານີ້.

ພາຍຫຼັງທີ່ໄດ້ຮັບຕໍາແໜ່ງ ຕົນເອງກໍໄດ້ມີການກຽມຕົວຫຼາຍໆດ້ານເລີຍ ໂດຍສະເພາະກໍແມ່ນເລື່ອງຂອງບຸກຄະລິກກະພາບ ບໍ່ວ່າຈະເປັນການຮັກສາຫຸ່ນ, ຮູບຮ່າງພາຍນອກ, ທັກສະດ້ານພາສາ, ໄຫວພິບໃນການຕອບຄຳຖາມ ແລະ ສຶກສາກ່ຽວກັບຂ່າວພາຍນອກ ແລະ ໃນປະເທດ. ສິ່ງໜຶ່ງທີ່ສຳຄັນຄືຮັກສາສຸຂະພາບເພື່ອກຽມພ້ອມເປັນຕົວແທນປະເທດລາວໃນເວທີສາກົນໃນຄັ້ງນີ້.

ສໍາລັບຜົນງານແມ່ນເອີ້ນໄດ້ວ່າເວທີ MISTER INTERNATIONAL LAOS ນີ້ ແມ່ນເວທີທໍາອິດຂອງຕົນເອງເລີຍ ເພາະຜ່ານມາເຄີຍມີປະສົບການໃນການຖ່າຍແບບ ແລະ ຖ່າຍທຳສາລະຄະດີກ່ຽວກັບການທ່ອງທ່ຽວຂອງປະເທດລາວເຮົາເທົ່ານັ້ນ

ສິ່ງສໍາຄັນໃນການເຂົ້າຮ່ວມການປະກວດໃນຄັ້ງນີ້ ສິ່ງທີ່ຕົນເອງຢາກເຜີຍແຜ່ໃຫ້ສາກົນໄດ້ຮັບຮູ້ໄດ້ເຫັນ ນັ້ນກໍຄືວັດທະນະທຳຄວາມເປັນລາວທີ່ເປັນມໍດົກ ໂດຍສະເພາະນ້ອງເອງເປັນຊາວຫຼວງພະບາງແຕ່ກຳເນີດ ຢາກໃຫ້ຊາວໂລກໄດ້ຮັບຮູ້ຄວາມເປັນລາວ ແລະ ແນ່ນອນວ່າຢາກເຮັດໃຫ້ຄົນລາວທົ່ວປະເທດພາກພູມໃຈ ກໍຄືການໄປແຂ່ງຂັນເອົາໄຊຊະນະກັບມາປະເທດເຮົາ ໃຫ້ຊາວລາວເຮົາໄດ້ເອກອ້າງ ແລະ ພາກພູມໃຈ ແລະ ນ້ອງເຊື່ອວ່າທຸກຄົນມີຄວາມສາມາດທີ່ແຕກຕ່າງກັນ ມີຄວາມເປັນເອກະລັກຂອງໃຜລາວ ຂໍພຽງແຕ່ເປັນຕົວຂອງຕົວເອງ ພູມໃຈ ແລະ ເຮັດໜ້າທີ່ຂອງຕົວເອງໃຫ້ດີທີ່ສຸດ.

ສຸດທ້າຍນີ້ກໍຂໍຝາກແຮງເຊຍຈາກຊາວລາວທຸກຄົນ ເປັນກຳລັງໃຈໃຫ້ນ້ອງ ນ້ອງສັນຍາວ່າຈະປະຕິບັດໜ້າທີ່ອັນຊົງກຽດນີ້ໃຫ້ດີທີ່ສຸດ ແລະ ຈະນຳເອົາ ຄວາມພາກພູມໃຈກັບມາປະເທດລາວ.

[ ຮູບ: So Viet ]