ຫ່າງຂອງພາຍຸໂນຮຸ ຮອດພາກໃຕ້ຂອງລາວແລ້ວ ເກີດລົມພັດແຮງ ແລະ ຝົນຕົກໜັກ ບາງເຂດເກີດນ້ຳຖ້ວມ

126

ລາຍງານໃນຕອນເຊົ້າວັນທີ 28 ກັນຍານີ້ບັນດາແຂວງພາກໃຕ້ໄດ້ເກີດມີລົມພັດແຮງເຮັດໃຫ້ມີຕົ້ມໄມ້ຫຼັກ, ເຂົ້ານາລົ້ມ, ຝົນຕົກໜັກ ແລະ ເກີດມີນ້ຳຖ້ວມບາງເຂດໂດຍສະເພາະແມ່ນແຂວງສາລະວັນ, ອັດຕະປື, ເຊກອງ

ຜູ້ໃຊ້ເຟສບຸ໊ກຊື່: Songkham Sorphrasay ຢູ່ບ້ານດະເຊັຍ​ ເມືອງ​ເລົ່າ​ງາມ, ແຂວງສາລະວັນ ໄດ້ໂພສ​ໃນຕອນເຊົ້າ​ວັນທີ​ 28​ ກັນຍາ​ 2022​ ວ່າ: ພາຍຸເຂົ້າ ຕົ້ນໄມ້ລົ້ນທັບເຮືອນ ເສຍຫາຍ​ຫມົດຫລັງ ດີແຕ່ຄອບຄົວບໍ່ເປັນຫຍັງ. ນອກຈາກນີ້, ຍັງມີລາຍງານເກີດມີນ້ຳຖ້ວມບາງເຂດບ້ານຂອງເມືອງຊານໄຊ ແຂວງອັດຕະປື

ພາຍຸເຂົ້າ ຕົ້ນໄມ້ລົ້ນທັບເຮືອນ ບ້ານດະເຊັຍ​ ເມືອງ​ເລົ່າ​ງາມ, ແຂວງສາລະວັນ ເຊົ້າ​ວັນທີ​ 28​ ກັນຍາ​ 2022

ດ້ານກົມອຸຕຸນິຍົມ ແລະ ອຸທົກກະສາດ ແຈ້ງເຕືອນວ່າ: ພາຍຸໄຕ້ຝຸ່ນ ໂນຣຸ (Noru) ຫົວທີ 16, ໄດ້ເຄື່ອນທີ່ຂື້ນຝັ່ງທາງພາກກາງຂອງປະເທດຫຽວດນາມ ແລະ ຈະສືບຕໍ່ເດືອນທີ່ຜ່ານພາກກາງ ແລະ​ ພາກໃຕ້ ຂອງປະເທດລາວ ໃນຕອນບ່າຍວັນທີ 28 – 30 ກັນຍາ 2022 ເຊິ່ງຈະເຮັດໃຫ້ມີຝົນຕົກ ຟ້າຮ້ອງ ຟ້າເຫຼື້ອມໃນລະດັບຄ່ອຍ ຫາ ປານກາງຢູ່ທົ່ວໄປໃນແຕ່ລະພາກ ແລະ ຕົກໜັກ ຫາ ໜັກຫຼາຍ ພ້ອມມີລົມພັດແຮງຢູ່ບາງທ້ອງຖີ່ນໃນເຂດພາກກາງ ແລະ ພາກໃຕ້ເຊັ່ນ: ນະຄອນຫຼວງວຽງຈັນ, ວຽງຈັນ, ໄຊສົມບູນ, ບໍລິຄຳໄຊ, ຄຳມ່ວນ, ສະຫວັນນະເຂດ, ປາກເຊ, ສາລະວັນ, ເຊກອງ ແລະ ອັດຕະປື.

ລົມພັດເຂົ້ານາລົ້ມ

ແຈ້ງເຕືອນເຖີງອຳນາດການປົກຄອງທຸກພາກສ່ວນ ແລະ ປະຊາຊົນບັນດາເຜົ່າທີ່ອາໄສຢູ່ບັນດາເຂດແຂວງດັ່ງກ່າວ ຈົ່ງມີສະຕິລະມັດ ລະວັງຕໍ່ ສະພາບຝົນຕົກໜັກ, ລົມພັດແຮງ ທີ່ຈະເຮັດໃຫ້ມີຕົ້ນໄມ້, ເສົາໄຟຟ້າ, ແລະ ປ້າຍໂຄສະນາຫັກລົ້ມ, ມີດິນເຈື່ອນ, ນໍ້າຖ້ວມອັ່ງ ແລະ ນໍ້າຖ້ວມຊູ ພ້ອມທັງກະກຽມເກັບມ້ຽນວັດຖຸສິ່ງຂອງທີ່ມີຄ່າ ແລະ ສັດລ້ຽງໄວ້ບ່ອນທີ່ປອດໄພ ຂໍໃຫ້ຕິດຕາມຂ່າວພະຍາກອນອາກາດ ຈາກກົມອຸຕຸນິຍົມ ແລະ ອຸທົກກະສາດຢ່າງຕໍ່ເນື່ອງ.

ພະຍາກອນອາກາດແຕ່ເວລາ 07 ໂມງ ຂອງວັນທີ 28 ກັນຍາ 2022 ຫາ ເວລາ 07 ໂມງຂອງວັນທີ 29 ກັນຍາ 2022: ນະຄອນຫຼວງວຽງຈັນ: ຈະມີຝົນຕົກຟ້າຮ້ອງ ຟ້າເຫຼື້ອມໃນລະດັບຄ່ອຍ ຫາ ປານກາງ ພ້ອມມີລົມພັດແຮງ ຢູ່ບາງບໍລິເວນ ຫຼື ເນື້ອທີ່ການປົກຫຸ້ມຂອງຝົນເທົ່າກັບ 60%. ອຸນຫະພູມໃນລະຫວ່າງ 25 – 34 ອົງສາ.ພາກກາງ (ແຂວງ ວຽງຈັນ, ບໍລິຄຳໄຊ, ຄຳມ່ວນ ແລະ ສະຫວັນນະເຂດ): ຈະມີຝົນຕົກ ຟ້າຮ້ອງ ຟ້າເຫຼື້ອມ ໃນລະດັບຄ່ອຍ ຫາ ປານກາງຢູ່ເກືອບທົ່ວໄປ ແລະ ຕົກໜັກ ຫາ ຕົກໜັກຫຼາຍ ພ້ອມມີລົມພັດແຮງຢູ່ບາງທ້ອງຖິ່ນ ຫຼື ເນື້ອທີ່ການປົກຫຸ້ມຂອງຝົນເທົ່າກັບ 70% ຂອງພາກ. ອຸນຫະພູມໃນລະຫວ່າງ 20 – 33 ອົງສາ.

ພາກໃຕ້: ຈະມີຝົນຕົກ ຟ້າຮ້ອງ ຟ້າເຫຼື້ອມ ໃນລະດັບຄ່ອຍ ຫາ ປານກາງຢູ່ເກືອບທົ່ວໄປ ແລະ ຕົກໜັກ ຫາ ຕົກໜັກຫຼາຍ ພ້ອມມີລົມພັດແຮງຢູ່ບາງທ້ອງຖິ່ນ ຫຼື ເນື້ອທີ່ການປົກຫຸ້ມຂອງຝົນເທົ່າກັບ 75% ຂອງພາກ. ອຸນຫະພູມໃນລະຫວ່າງ 23 – 34 ອົງສາ.

ສຳລັບ ເຂດພູພຽງບໍລະເວນ: ຈະມີຝົນຕົກຟ້າຮ້ອງ ຟ້າເຫຼື້ອມ ໃນລະດັບຄ່ອຍ ຫາ ປານກາງ ແລະ ຕົກໜັກ ພ້ອມມີລົມພັດແຮງຢູ່ບາງບໍລິເວນ ຫຼື ເນື້ອທີ່ການປົກຫຸ້ມຂອງຝົນເທົ່າກັບ 60%. ອຸນຫະພູມໃນລະຫວ່າງ 15 – 26 ອົງສາ.