ເຟດ ປັບຂຶ້ນອັດຕາດອກເບ້ຍ 0,75% ເປັນຄັ້ງທີ 3

18

ສຳນັກຂ່າວຕ່າງປະເທດລາຍງານວ່າ ທະນາຄານກາງສະຫະລັດອາເມຣິກາ ( ເຟດ ) ໄດ້ປະກາດປັບຂຶ້ນອັດຕາດອກບ້ຍ 0,75% ໃນວັນທີ 21 ກັນຍາຜ່ານມາ ຕາມເວລາທ້ອງຖິ່ນ ເຊິ່ງການປະກາດປັບຂຶ້ນ 0,75% ຄັ້ງນີ້ ເປັນຄັ້ງທີ 3 ຫຼື ເປັນເວລາສາມເດືອນຕິດຕໍ່ກັນ ໂດຍມີເປົ້າໝາຍເພື່ອຄວບຄຸມອັດຕາເງິນເຟີ້.

ທ່ານ ເຈີໂຣມ ພາວເວລ ປະທານ ເຟດ ເປີດເຜີຍວ່າ: ການປັບຂຶ້ນອັດຕາດອກເບ້ຍອາດຈະສົ່ງຜົນກະທົບຕໍ່ການຂະຫຍາຍດ້ານເສດຖະກິດ ແຕ່ພວກເຮົາຄິດວ່າການເຈັບປວດໄລຍະສັ້ນ ຍັງດີກວ່າການເຈັບປວດໄລຍະຍາວ ທີ່ປ່ອຍໃຫ້ອັດຕາເງິນເຟີ້ລຸກລາມ ແລະ ແກ່ຍາວ ແນ່ນອນວ່າການເຕີບໂຕຂອງເສດຖະກິດຈະຊະລໍຕົວລົງ ແລະ ການວ່າງງານເພີ່ມຂຶ້ນ ຈະເປັນເລື່ອງເຈັບປວດສຳລັບປະຊາຊົນ ແຕ່ກໍບໍ່ເຈັບປວດເທົ່າກັບຄວາມຫຼົ້ມເຫຼວໃນການຟື້ນຟູສະຖຽນລະພາບດ້ານລາຄາ ແລະ ຈະເຮັດໃຫ້ພວກເຮົາຈະຕ້ອງກັບມາເຮັດສິ່ງດັ່ງກ່າວນີ້ອີກ.

May be an image of 1 person and text

ປະທານເຟດ ກ່າວອີກວ່າ: ເພື່ອເຮັດໃຫ້ຕະຫຼາດແຮງງານເຂັ້ມແຂງຕໍ່ໄປອີກໄລຍະໜຶ່ງ ພວກເຮົາຕ້ອງພະຍາຍາມເຮັດໃຫ້ອັດຕາເງິນເຟີ້ຫຼຸດລົງ ເຖິງວ່າມັນຈະເຈັບປວດ ແຕ່ກໍບໍ່ມີທາງເລືອກອື່ນ ແລະ ຕະຫຼາດແຮງງານຈະຕ້ອງອ່ອນຕົວລົງ ຫາກພວກເຮົາຕ້ອງການໃຫ້ອັດຕາເງິນເຟີ້ຫຼຸດລົງ.

ປະທານເຟດ ຢ້ຳວ່າ: ຄວາມມຸ່ງໝັ້ນຂອງເຟດຄືຈະຕ້ອງເຮັດໃຫ້ອັດຕາເງິນເຟີ້ຫຼຸດລົງຢູ່ທີ່ 2% ຕໍ່ປີ ແຕ່ຍອມຮັບວ່າ ເພື່ອໃຫ້ບັນລຸເປົ້າໝາຍດັ່ງກ່າວ ອາດຈະປະເຊີນກັບຄວາມເຈັບປວດຢ່າງໜັກ ໂດຍຈະຕ້ອງມີສອງຢ່າງຄວບຄູ່ກັນໄປ ຄື: ການເຕີບໂຕຕ່ຳກວ່າທ່າອ່ຽງ ຄວບຄູ່ໄປກັບສະພາວະຕະຫຼາດແຮງງານອ່ອນຕົວລົງ ເພື່ອໃຫ້ເກີດຄວາມສົມດຸນທີ່ດີຂຶ້ນ.

May be an image of 1 person

ທັງນີ້ ເຟດ ຄາດວ່າ: ເສດຖະກິດຂອງສະຫະລັດໃນປີນີ້ ຈະຢຸດສະງັກ, ຂະນະທີ່ການວ່າງງານຈະເພີ່ມຂຶ້ນ, ພ້ອມຍອມຮັບວ່າ ການທີ່ປັບຂຶ້ນອັດຕາດອກເບ້ຍບໍ່ໄດ້ໝາຍຄວາມວ່າ ຈະເຮັດໃຫ້ອັດຕາເງິນເຟີ້ຫຼຸດລົງທັນທີທັນໃດ. ນອກຈາກນີ້, ຍັງຍອມຮັບວ່າ ເຟດ ບໍ່ສາມາດປັບຂຶ້ນອັດຕາດອກເບ້ຍເພື່ອຄວບຄຸມເງິນເຟີ້ໄປຕະຫຼອດ ໂດຍທີ່ບໍ່ເຮັດໃຫ້ເສດຖະກິດຕົກຕ່ຳ ແຕ່ເມື່ອເຖິງຈຸດໃດໜຶ່ງຂອງການໃຊ້ນະໂຍບາຍເຂັ້ມງວດ ກໍຕ້ອງມີການຊະລໍການດຳເນີນການ ເພື່ອປະເມີນວ່າ ການປັບໃຊ້ນະໂຍບາຍ ຈະສົ່ງຜົນຕໍ່ເສດຖະກິດແນວໃດ, ປະທານເຟດ ລະບຸ.