ຈາກເຫດການລົດຕຳກັນຊ້ອນຫຼາຍຄັນຢູ່ຈຸດໄຟອຳນາດທາດຫຼວງ ເມືອງໄຊເສດຖາ ໃນວັນທີ 16 ກັນຍາ 2022 ຜ່ານມາ, ບາງສື່ອອນລາຍໄດ້ລາຍງານວ່າ ອຸບັດຕິເຫດດັ່ງກ່າວເກີດຂຶ້ນຍ້ອນລົດໃຫຍ່ເບກແຕກ, ແຕ່ຫລ້າສຸດ ເຈົ້າໜ້າທີ່ເປີດເຜີຍແລ້ວວ່າ ເປັນຍ້ອນຜູ້ຂັບຂີ່ລົດໃຫຍ່ ມີອາການມຶນເມົາຈາກການດື່ມສິ່ງມຶນເມົາ.
ທ່ານ ພັທ ອຳພອນ ຄຳອຸ່ນທອນ ຮອງພະແນກຊີ້ນຳ ຈາລະຈອນ ເມືອງໄຊເສດຖາ ໄດ້ໃຫ້ສຳພາດຕໍ່ ວິທະຍຸກະຈາຍສຽງແຫ່ງຊາດ ວັນທີ 19 ກັນຍາ 2022 ຜ່ານມານີ້ວ່າ: ເວລາ 15:00 ໂມງ ຂອງວັນທີ 16 ກັນຍາ 2022 ທີ່ຜ່ານມາ ເກີດອຸບັດເຫດລົດຕຳ 7 ຄັນຊ້ອນ ຢູ່ 4 ແຍກໄຟອຳນາດ ທາດຫລວງ ເມືອງໄຊເສດຖາ ນະຄອນຫລວງວຽງຈັນ ໃນນັ້ນ ເປັນລົດຈັກ 5 ຄັນ ແລະ ລົດໃຫຍ່ 2 ຄັນ.
ຕົ້ນເຫດຂອງອຸບັດເຫດແມ່ນລົດຈິບຟໍຈູນເນີ ທີ່ ຂັບຂີ່ມາແຕ່ທາດຫລວງ ພໍຮອດຈຸດເກີດເຫດຜູ້ກ່ຽວ ບໍ່ໄດ້ເບິ່ງໄຟອຳນາດ ວ່າເປັນສີແດງ ເຮັດໃຫ້ຕຳເອົາ ລົດຈັກຈອດຢູ່ໄຟແດງ 5 ຄັນ ແລ້ວໄປຕຳເອົາລົດ ໃຫຍ່ອີກ 2 ຄັນ ທີ່ພວມແລ່ນຜ່ານໄຟຂຽວ ຈາກ ເສັ້ນທາງເບື້ອງມາແຕ່ໄອເຕັກ. ເຮັດໃຫ້ພາຫະນະເພ່ ເປ, ຄົນໄດ້ຮັບບາດເຈັບເລັກໜ້ອຍ.
ການການສືບສວນເບື້ອງຕົ້ນພົບວ່າ ສາເຫດຂອງ ການເກີດອຸບັດເຫດຄັ້ງນີ້ແມ່ນຜູ້ຂັບຂີ່ລົດຟໍຈູນເນີມີ ອາການມຶນເມົາຈາກການດື່ມສິ່ງມຶນເມົາ ສ່ວນ ຜົນເສຍຫາຍທີ່ເກີດຂຶ້ນຜູ້ກ່ຽວຍອມຮັບຜິດຊອບ ສ້ອມແປງ ແລະ ປິ່ນປົວຄູ່ກໍລະນີທັງໝົດ.
