ຍ້ອງ​ຍໍ​ບຸກ​ຄົນ-ກົມ​ກອງ​ດີ​ເດັ່ນ​ໃນຂະບວນການແຂ່ງຂັນຮັກຊາດ ແລະ ພັດທະນາ

70

ກອງ​ປະຊຸມສະຫຼຸບຂະບວນການແຂ່ງຂັນຮັກຊາດ ແລະ ພັດທະນາ ໄດ້ປິດລົງຢ່າງເປັນທາງການ ໃນວັນທີ 16 ກັນຍາ ນີ້ ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ໂດຍການເປັນປະທານ ຂອງ ທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດແຫ່ງ ສປປ ລາວ, ມີທ່ານ ພັນຄຳ ວິພາວັນ ກຳມະການກົມການເມືອງສູນກາງພັກ ນາຍົກລັດຖະມົນຕີ ປະທານຄະນະຊີ້ນຳລະດັບຊາດ ກ່ຽວກັບການແຂ່ງຂັນ-ຍ້ອງຍໍ ຮັກຊາດ ແລະ ພັດທະນາ, ມີ​ບັນດາທ່ານການນຳພັກ-ລັດຂັ້ນສູງ, ບັນດາລັດຖະມົນຕີ, ​ຫົວໜ້າ​ອົງການອ້ອມຂ້າງສູນກາງ​, ​ເຈົ້າ​ແຂວງ, ເຈົ້າ​ຄອງ​ນະຄອນຫຼວງ​ວຽງ​ຈັນ ແລະ ພາກ​ສ່ວນ​ກ່ຽວ​ຂ້ອງເຂົ້າຮ່ວມ.

ທ່ານ ພັນຄຳ ວິພາວັນ ໄດ້ຂຶ້ນລາຍງານຫຍໍ້ ກ່ຽວກັບຜົນຂອງການດໍາເນີນກອງປະຊຸມ ໃນໄລຍະໜຶ່ງວັນເຄິ່ງຜ່ານມາ ໃຫ້ທ່ານປະທານປະເທດໄດ້ຮັບຊາບ. ຈາກນັ້ນ, ໃນກອງປະຊຸມໄດ້ຈັດພິທີຍ້ອງ​ຍໍ​ບຸ​ກຄົນ ແລະ ກົມ​ກອງ​ທີ່​ມີ​ຜົນ​ງານ​ດີ​ເດັ່ນ​ປະ​ກອບ​ສ່ວນ​ເຂົ້າ​ໃນ​ຂະ​ບວນ​ການ​ແຂ່ງ​ຂັນ​ຮັກ​ຊາດ ແລະ ພັດ​ທະ​ນາ. ທ່ານ ທອງ​ລຸນ ສີ​ສຸ​ລິດ ໄດ້​ໃຫ້​ກຽດປະດັບຫຼຽນນາມມະຍົດວິລະຊົນແຮງງານ ໃຫ້ ທ່ານ ເກຍ ອູ໋ສິດທິເດດ ເຈົ້າຂອງໂຮງງານຜະລິດນ້ຳດື່ມ ແລະ ນ້ຳກ້ອນໂລມາຄຳ, ພ້ອມທັງ​ປະ​ດັບຫຼຽນນາມມະຍົດນັກພັດທະນາດີເດັ່ນແຫ່ງຊາດ ໃຫ້​ແກ່ ທ່ານ ສາຍສະໝອນ ກວານເມືອງຈັນ ປະທານທີ່ປຶກສາສະຖາບັນການເງິນຈຸລະພາກ ທີ່ຮັບເງິນຝາກສາຍໄຍສຳພັນ ແລະ ທ່ານ ນາງ ສົງບັນດິດ ຍົດໝັ້ນຄົງ ຜູ້ອຳນວຍການ ບໍລິສັດ ທົ່ງລະຫາສິນ. ໃນ​ຂະ​ນະ​ທີ່ ທ່ານ ພັນ​ຄໍ​າ ວິ​ພາ​ວັນ ໄດ້​ໃຫ້​ກຽດ​ປະ​ດັບຫຼຽນໄຊແຮງງານ ຊັ້ນ I ໃຫ້ 14 ກົມກອງ ແລະ ​ປະ​ດັບຫຼຽນໄຊແຮງງານ ຊັ້ນ I ໃຫ້​ບຸກ​ຄົນ 17 ທ່ານ.

ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ໄດ້ຕາງໜ້າຄະນະຊີ້ນໍາລະດັບຊາດກ່ຽວກັບການແຂ່ງຂັນ-ຍ້ອງຍໍ ຮັກຊາດ ແລະ ພັດທະນາ ຂຶ້ນສະເໜີເນື້ອໃນການແຂ່ງຂັນ ຮັກຊາດ ແລະ ພັດທະນາ ໃນທົ່ວປະເທດ ແຕ່ນີ້ຫາປີ 2025 ວ່າ: ເພື່ອສືບຕໍ່ຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງ ຊາດ 5 ປີ ຄັ້ງທີ IX ແນໃສ່ນໍາພາປະເທດຊາດຫຼຸດພົ້ນອອກຈາກສະຖານະພາບດ້ອຍພັດທະນາ ໃນປີ 2026 ດ້ວຍການປຸກລະດົມມະຫາຊົນ ຍູ້ແຮງຂະບວນການແຂ່ງຂັນຮັກຊາດ ແລະ ພັດທະນາ ຢູ່ທຸກຂົງເຂດວຽກງານຢ່າງຕັ້ງໜ້າ ປຸກລະດົມພົນລະເມືອງລາວທຸກຄົນ ທຸກການຈັດຕັ້ງຂອງພັກ, ຂອງລັດ, ອົງການຈັດຕັ້ງມະຫາຊົນ ແລະ ທຸກພາກສ່ວນເສດຖະກິດ ທັງພາກລັດ ແລະ ເອກະຊົນ ເຂົ້າຮວມຢ່າງແຂງແຮງ ແລະ ກວ້າງຂວາງ ເພື່ອແຂ່ງຂັນກັນສ້າງຂະບວນການ ​ກໍ່ສ້າງຮາກຖານການເມືອງ, ການພັດທະນາຊົນນະບົດຮອບດ້ານແກ້ໄຂຄວາມທຸກຍາກ ແລະ ການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ສ້າງເງື່ອນໄຂນໍາພາປະເທດຊາດ ພົ້ນຈາກສະຖານະພາບປະເທດດ້ອຍພັດທະນາ ໃນປີ 2026 ໃຫ້ເປັນຂະບວນການຟົດຟື້ນ ຕໍ່ເນື່ອງ ຮັບປະກັນສູ້ຊົນປະຕິບັດ ສອງໜ້າທີ່ຍຸດທະສາດ: ປົກປັກຮັກສາ ແລະ ພັດທະນາປະເທດຊາດ, ແຜນພັດທະນາເສດຖະກິດ-ສັງຄົມແຫ່ງຊາດ ຕິດພັນກັບ ຄໍາຂວັນທີ່ວ່າ: “ຮັກຊາດ ແລະ ພັດທະນາ ບົນຈິດໃຈສືບຕໍ່ບູລະນະລະບອບປະຊາທິປະໄຕ ປະຊາຊົນ ໃຫ້ສົມບູນຍິ່ງຂຶ້ນ, ສ້າງການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານ ເພື່ອກ້າວສູ່ຈຸດໝາຍສັງຄົມນິຍົມ”