ກອງທຶນໜູນວຽນມອບງົວໃຫ້ຄອບຄົວທຸກຍາກ ເມືອງຫຼວງນ້ຳທາ 13 ໂຕ

58

ວັນທີ 13-14 ກັນຍາ 2022 ຢູ່ທີ່ບ້ານນໍ້າແກ ແລະ ບ້ານນໍ້າກົ່ງ ເມືອງຫຼວງນໍ້າທາ ແຂວງຫຼວງນໍ້າທາ, ໄດ້ຈັດພິທີມອບ-ຮັບກອງທຶນໜູນວຽນລ້ຽງງົວໃຫ້ຄອບຄົວທຸກຍາກ ລະຫວ່າງ ອົງການປົກຄອງເມືອງຫຼວງນໍ້າທາ ກັບ ອົງການປົກຄອງບ້ານ ໂດຍການເປັນປະທານຂອງທ່ານ ທອງໄຊ ອາດຜາສຸກ ຄະນະປະຈຳພັກເມືອງ ຮອງເຈົ້າເມືອງໆຫຼວງນໍ້າທາ, ມີກຳມະການພັກເມືອງ, ຫົວໜ້າຫ້ອງການ, ຮອງຫ້ອງຫົວໜ້າຫ້ອງການ, ເລຂາຄະນະພັກຮາກຖານກຸຸ່ມບ້ານ, ການຈັດຕັ້ງບ້ານນໍ້າແກ ແລະ ບ້ານນໍ້າກົ່ງ, ພ້ອມດ້ວຍກຸ່ມເປົ້າໝາຍທັງສອງບ້ານເຂົ້າຮ່ວມ.


ໃນພິທີໄດ້ຜ່ານບົດບັນທຶກ ການມອບທຶນສັດລະຫວ່າງຄະນະຊີ້ນໍາກອງທຶນລວມຂອງເມືອງ ກັບ ສະມາຊີກເປົ້າຫມາຍລ້ຽງສັດ ບ້ານນໍ້າແກ ແລະ ບ້ານນໍ້າກົ່ງ. ທ່ານ ທອງໄຊ ອາດຜາສຸກ ຄະນະປະຈຳພັກເມືອງ ຮອງເຈົ້າເມືອງຫຼວງນໍ້າທາ ໄດ້ກ່າວມອບງົວ ຈໍານວນ 13 ໂຕ ລວມມູນຄ່າທັງໝົດ 95 ລ້ານກີບ ໃຫ້ຄອບຄົວທຸກຍາກລ້ຽງຢູ່ ບ້ານນໍ້າແກ 11 ໂຕ ແລະ ບ້ານນໍ້າກົ່ງ 2 ໂຕ ໃຫ້ກຽດຮັບໂດຍກຸ່ມເປົ້າໝາຍ ໃນນັ້ນບ້ານນໍ້າແກມີ 5 ຄອບຄົວ ບ້ານນໍ້າກົງ 1 ຄອບຄົວ.

ການລ້ຽງງົວຂອງຄອບຄົວທຸກຍາກທີ່ໄດ້ນໍາເອົາງົວໄປລ້ຽງນັ້ນແມ່ນໄດ້ປະຕິບັດຕາມຂໍ້ຕົກລົງສ່ວນພໍ່ ແລະ ແມ່ພັນງົວໄດ້ມອບໃຫ້ປະຊາຊົນລ້ຽງ ພາຍຫຼັງທີ່ງົວໄດ້ເກີດລູກອອກມາແມ່ນມອບໃຫ້ປະຊາຊົນເປັນເຈົ້າຂອງ ແລະ ລ້ຽງຕໍ່ໄປ ສໍາລັບພໍ່ – ແມ່ພັນງົວທາງກອງທືນຈະໄດ້ມອບຕໍ່ໃຫ້ຄອບຄົວທີ່ທຸກຍາກໃນບ້ານອື່ນລ້ຽງໃນຂັ້ນຕໍ່ໄປ. ເຊີ່ງການມອບ – ຮັບງົວໃນຄັ້ງນີ້ໂດຍປະຕິບັດອີງຕາມຂໍ້ຕົກລົງ ຂອງທ່ານເຈົ້າເມືອງ ສະບັບເລກທີ 351/ຈມ ລົງວັນທີ 22 ຕຸລາ 2021 ວ່າດ້ວຍການແຕ່ງຕັ້ງຄະນະຊີ້ນໍາລວມ ແລະ ຄະນະຮັບຜິດຊອບຊ່ວຍວຽກ ລົງຕິດຕາມ, ຊຸກຍູ້, ສົ່ງເສີມການປູກພືດ ແລະ ການລ້ຽງສັດ ເພື່ອຄໍ້າປະກັນສະບຽງອາຫານ ແລະ ເປັນສິນຄ້າຂອງເມືອງຫຼວງນໍ້າທາ .

ໄດ້ຜ່ານຂໍ້ຫ້າມ ແລະ ຄວາມຮັບຜິດຊອບ: ຫ້າມຝ່າຍໃຫ້ທຶນ ແລະ ຜູ້ລ້ຽງງົວ ລະເມີດບົດບັນທຶກສະບັບນີ້ ຫ້າມຜູ້ລ້ຽງສັດລັກຂາຍ ແລະ ປ່ຽນໃຫ້ຜູ້ອື່ນລ້ຽງໂດຍບໍ່ໄດ້ຮັບອະນຸຍາດ ຈາກຄະນະຊີ້ນໍາກອງທຶນບ້ານ, ຫ້າມສະມາຊິກກຸ່ມຜູ້ທີ່ໄດ້ຮັບທຶນເເນວພັນສັດລ້ຽງ ເອົາງົວໄປແລກປ່ຽນ, ຂ້າ, ຊື້-ຂາຍ ຢ່າງເດັດຂາດ, ຫ້າມບໍ່ໃຫ້ທໍລະມານສັດລ້ຽງ ທຸບຕີ, ໃຊ້ແຮງງານ, ບໍ່ໃຫ້ອາຫານ, ບໍ່ລ້ຽງເກືອ, ບໍ່ດູແລເຮັດໃຫ້ສັດລ້ຽງຈ່ອຍຜອມ, ຫ້າມສະມາຊິກກຸ່ມ, ອົງການຈັດຕັ້ງ,ພາກສ່ວນກ່ຽວຂ້ອງນໍາເອົາທຶນລ້ຽງສັດໃຫ້ແກ່ພີ່ນ້ອງ, ໃຫ້ຜູ້ທີ່ບໍ່ມີຄວາມຮັບຜິດຊອບ ຮັບເອົາກອງທຶນງົວໄປລ້ຽງ, ຫ້າມນໍາໃຊ້ ພຶດຕິກໍາອື່ນ ທີ່ຜິດຕໍ່ລະບຽບກອງທຶນຫມູນວຽນການລ້ຽງສັດ ແລະ ສົ່ງຜົນເສຍຫາຍໃຫ້ແກ່ກອງທຶນ.

 

ຂ່າວຈາກ: Media laos