ລັດຖະບານປະດັບຫຼຽນໄຊແຮງງານ ແລະ ໃບຍ້ອງຍໍ ໃຫ້ຜູ້ມີຜົນງານປະກອບສ່ວນເຂົ້າໃນການກໍ່ສ້າງເຂື່ອນໄຟຟ້ານໍ້າງຽບ 2

33

ພິທີປະດັບຫຼຽນໄຊແຮງງານ, ຫຼຽນກາແຮງງານ ແລະ ມອບໃບຍ້ອງຍໍລັດຖະບານ ໃຫ້ບຸກຄົນ ແລະ ກົມກອງລວມໝູ່ ທີ່ມີຜົນງານປະກອບສ່ວນເຂົ້າໃນການກໍ່ສ້າງເຂື່ອນໄຟຟ້ານໍ້າງຽບ 2 ຈັດຂຶ້ນວັນທີ 9 ກັນຍາ 2022 ຜ່ານມາ ໃຫ້ກຽດເຂົ້າຮ່ວມ ແລະ ຕາງໜ້າ ລັດຖະບານ ສປປ ລາວ ປະດັບຫຼຽນໄຊແຮງງານ, ຫຼຽນກາແຮງງານ ແລະ ໃບຍ້ອງຍໍລັດຖະບານ ໂດຍ ທ່ານ ດາວວົງ ພອນແກ້ວ ລັດຖະມົນຕີກະຊວງ ພະລັງງານ ແລະ ບໍ່ແຮ່, ມີຕາງໜ້າຈາກພາກສ່ວນຕ່າງໆທັງພາກລັດ ແລະ ເອກະຊົນ ຂັ້ນສູງກາງ ແລະ ທ້ອງຖິ່ນ (ແຂວງ ຊຽງຂວາງ) ທີ່ນອນຢູ່ໃນເປົ້າໝາຍການຍ້ອງຍໍໃນຄັ້ງນີ້ ເຂົ້າຮ່ວມ.

ໃນພິທີ ທ່ານ ມ້ອນ ເພັດພູໄທ ຮອງຫົວໜ້າກົມຈັດຕັ້ງ ແລະ ພະນັກງານ, ກະຊວງ ພະລັງງານ ແລະ ບໍ່ແຮ່ ໄດ້ຂຶ້ນຜ່ານ ລັດຖະດຳລັດຂອງປະທານປະເທດ, ສະບັບເລກທີ 351/ປປທ, ລົງວັນທີ 28 ພະຈິກ 2019 ວ່າດ້ວຍການປະດັບຫຼຽໄຊແຮງງານຊັ້ນ II ໃຫ້ບຸກຄົນ 8 ທ່ານ, 1 ກົມກອງ; ປະດັບຫຼຽນໄຊແຮງງານຊັ້ນ III ຈຳນວນ 8 ທ່ານ. ພ້ອມກັນນີ້, ໄດ້ຜ່ານດຳລັດຂອງນາຍົກລັດຖະມົນຕີ, ສະບັບເລກທີ 397/ນຍ, ລົງວັນທີ 20 ພະຈິກ 2019 ວ່າດ້ວຍການປະດັບຫຼຽນກາແຮງງານໃຫ້ບຸກຄົນຈຳນວນ 11 ທ່ານ ແລະ ໃບຍ້ອງຍໍລັດຖະບານຈຳນວນ 11 ທ່ານ ໃຫ້ຜູ້ທີ່ມີຜົນງານດີເດັ່ນປະກອບສ່ວນດ້ານເຫືອແຮງ, ສະຕິປັນຍາ ເຂົ້າໃນການກໍ່ສ້າງເຂື່ອນໄຟຟ້ານໍ້າງຽບ 2.

ທ່ານ ດາວວົງ ພອນແກ້ວ ໄດ້ໂອ້ລົມຕໍ່ພິທີ ໂດຍໄດ້ສະແດງຄວາມຍ້ອງຍໍຊົມເຊີຍ, ຕີລາຄາສູງຕໍ່ຜົນສຳເລັດການກໍ່ສ້າງເຂື່ອນໄຟຟ້ານໍ້າງຽບ 2 ຂອງທຸກພາກສ່ວນທັງພາກລັດ ແລະ ເອກະຊົນ ເຊິ່ງເປັນການປະກອບສ່ວນຢ່າງໃຫຍ່ຫຼວງຕໍ່ການພັດທະນາເສດຖະກິດ-ສັງຄົມຂອງປະເທດເຮົາ, ຕີລາຄາສູງຕໍ່ການປະກອບສ່ວນອັນລໍ້າຄ່າຂອງບໍລິສັດ CWE ຈໍາກັດ ທີ່ເອົາໄດ້ໃຈໃສ່ ແລະ ພັດທະນາໂຄງການເຂື່ອນໄຟຟ້າໃນໄລຍະຜ່ານມາໄດ້ຮັບຜົນສໍາເລັດຢ່າງຈົບງາມ ເຊັ່ນ: ໂຄງການເຂື່ອນໄຟຟ້ານໍ້າລີກ 1-2 ຢູ່ແຂວງວຽງຈັນ, ໂຄງການເຂື່ອນໄຟຟ້າ ນໍ້າງຽບ 2 ຢູ່ແຂວງຊຽງຂວາງ ແລະ ໂຄງການເຂື່ອນໄຟຟ້າ ນໍ້າກົງ 1 ຢູ່ແຂວງ ອັດຕະປື ທີ່ຫາກໍສໍາເລັດການກໍ່ສ້າງໃນໄຍະຜ່ານມານີ້.

ນອກຈາກນີ້, ບໍລິສັດ ກໍ່ຍັງໄດ້ເອົາໃຈໃສ່ ແລະ ມີຄວາມຮັບຜິດຊອບຕໍ່ວຽກງານການແກ້ໄຂທາງດ້ານສິ່ງແວດລ້ອມ-ສັງຄົມ ແລະ ລວມທັງການປະຕິບັດພັນທະພັດທະນາຊຸມຊົນໃນທີ່ຜ່ານມາເຊັ່ນ: ການກໍ່ສ້າງຈັດສັນບ້ານຍົກຍ້າຍ ບ້ານນາຫີນບູນ ທີ່ຂຶ້ນກັບເມືອງທ່າໂທມ ແຂວງໄຊສົມບູນ, ກໍ່ສ້າງເສັ້ນທາງເຂົ້າບ້ານປຸ່ງ ແລະ ກໍາລັງກະກຽມຈະກໍ່ສ້າງສາຍສົ່ງໄຟຟ້າ 22kV/0,4kV ເຂົ້າບ້ານປຸ່ງ, ເມືອງຜ່າໄຊ ແຂວງຊຽງຂວາງ ທີ່ຍັງເຫັນວ່າເປັນບ້ານໜຶ່ງ ທີ່ຍັງຂາດໄຟຟ້າຢູ່ພາຍໃນແຂວງຊຽງຂວາງ. ພ້ອມນີ້, ກໍຂໍສະແດງຄວາມຊົມເຊີຍ ແລະ ຂອບໃຈ ທີ່ໄດ້ປະກອບສວນທາງດ້ານເຮື່ອແຮງ, ສະຕິປັນຍາເຂົ້າໃນການກໍ່ສ້າງໂຄງການເຂື່ອນໄຟຟ້າ ນໍ້າງຽບ 2 ໄດ້ຮັບຜົນສໍາເລັດ ແລະ ດໍາເນີນການຜະລິດໄຟຟ້າ ມາຮອດປັດຈຸບັນ.

ເຂື່ອນໄຟຟ້ານໍ້າງຽບ 2 ເປັນໂຄງການໃນຮູບແບບ BOT ໂຄງການທີສອງຂອງ ບໍລິສັດ CWE ໃນ ສປປ ລາວ, ໂຄງການໄດ້ເຊັນ MOU ໃນວັນທີ 30 ທັນວາ 2008, ໄດ້ເລີ່ມລົງມືກໍ່ສ້າງຢ່າງເປັນທາງການໃນວັນທີ 1 ຕຸລາ 2011 ແລະ ຈັກ 3Unit ໄດ້ເລີ່ມດຳເນີນງານການຜະລິດໄຟຟ້າຢ່າງເປັນທາງການໃນວັນທີ 1 ຕຸລາ 2015. ເຂື່ອນໄຟຟ້າ ນໍ້າງຽບ 2 ມີກຳລັງຕິດຕັ້ງ 180 ເມກາວັດ, ມາຮອດທ້າຍເດືອນສິງຫາ 2022, ເຂື່ອນໄຟຟ້ານໍ້າງຽບ 2 ສາມາດຜະລິດກະແສໄຟຟ້າໄດ້ແລ້ວທັງໝົດ 2.860 ລ້ານkWh
ຂໍ້ມູນ-ພາບ: ສູນຂ່າວພະລັງງານ ແລະ ບໍ່ແຮ່