ໃນທີ່ສຸດກໍເດີນຕາມຄວາມຝັນດ້ວຍຄວາມມຸ່ງໝັ້ນຂອງຕົນເອງ ຈົນປະສົບຄວາມສໍາເລັດ ຕ້ອງຂໍສະແດງຄວາມຍິນດີດ້ວຍ ຍ້ອນຄວາມພະຍາຍາມຈົນສາມາດເອົາຊະນະໃຈຄະນະກໍາມະການ ແລະ ກອງເຊຍຈົນສາມາດຄວ້າມົງກຸດຈາກເວທີ Miss Teen Laos 2022 ມາຄອບຄອງ ເປັນຕົວແທນດວງດາວແຫ່ງຍຸກສະໄໝ ຂໍສະແດງ ຄວາມຍິນດີຢ່າງສຸດໃຈກັບ Miss Teen Laos ຄົນຫຼ້າສຸດ ວັນວິສາ ນາມເສນາ ຫຼື ໂບ MTL01 ງົດງາມ ແລະ ພຽບພ້ອມສົມກັບຕໍາແໜ່ງ ແລະ ເປັນຜູ້ຄອບຄອງມົງກຸດຄົນທີ 3 ຈາກເວທີດັ່ງກ່າວ.
ມາທໍາຄວາມຮູ້ຈັກກັບນ້ອງໃຫ້ຫຼາຍຂຶ້ນ ສໍາລັບ ໂບ ປັດຈຸບັນອາຍຸ 16 ປີ ແລະ ຕອນນີ້ແມ່ນຢູ່ສັງກັດທີ່ Naga Studio ໂດຍເລີ່ມເຂົ້າວົງການປະກວດຕັ້ງແຕ່ອາຍຸ 11 ປີເທົ່ານັ້ນ ເຊິ່ງເວທີທຳອິດແມ່ນ Laos Supermodel 2017 ໄດ້ຜ່ານຮອບ 50 ຄົນ ຈົນມາຮອດ ປີ 2019 ໂບ ໄດ້ມາປະກວດ Miss Teen Laos 2019 ເປັນເວທີນາງງາມເວທີທຳທີ່ເຮັດໃຫ້ໄດ້ເຂົ້າຮອບເລິກເຖິງຮອບ 10 ຄົນສຸດທ້າຍ ແລະ ໃນປີ 2020 ການກັບມາປະກວດອີກຄັ້ງໃນເວທີ TKK Supermodel Contest 2020 ເຮັດໃຫ້ໄດ້ຮັບລາງວັນຮອງອັນດັບສອງ ແລະ ນີ້ຈຶ່ງເປັນຈຸດເລີ່ມຕົ້ນຂອງການເຂົ້າວົງການ.
ໂບ ເຄີຍໃຫ້ສໍາພາດກັບທີມຂ່າວບັນເທີງວ່າ: ຍ້ອນວ່າຕົນເອງມັກຮັກໃນການປະກວດນາງງາມ ແລະ ເວທີ Miss Teen Laos ມົງກຸດຂອງ Miss Teen Laos ຍັງແມ່ນຄວາມຫວັງ ແລະ ຄວາມຝັນທີ່ຢາກຄອບຄອງ ຈຶ່ງກັບມາປະກວດເທິງເວທີ Miss Teen Laos ອີກຄັ້ງ ເພາະຍັງເຊື່ອໝັ້ນໃນ ຄວາມຝັນ ແລະ ຄວາມພະຍາຍາມຂອງຕົນເອງ ຫວັງທີ່ຈະກັບມາແກ້ມື ພັດທະນາຕົນເອງອີກຄັ້ງ ເພື່ອຈະພິສູດໃຫ້ທຸກຄົນໄດ້ເຫັນວ່າ “ ສາວນ້ອຍທຳມະດາໆຄົນນີ້ ກໍສາມາດທີ່ຈະຂ້າມຜ່ານຄວາມຢ້ານກົວນັ້ນມາໄດ້ເຊັ່ນດຽວກັນ ”.
ສໍາລັບຄະຕິປະຈຳໃຈຄື: “ ຢ່າຢ້ານທີ່ຈະລົ້ມເຫຼວ ແຕ່ຈົງຢ້ານຖ້າບໍ່ໄດ້ລົງມືເຮັດ ” ເຊິ່ງສາວງາມຄົນນີ້ເປັນອີກໜຶ່ງຄົນທີ່ມີ ຄວາມສາມາດກຫຼາກຫຼາຍຢ່າງ ບໍ່ວ່າຈະເປັນການເຕັ້ນ, ຮ້ອງ, ຟ້ອນ, ເດີນແບບ ແລະ ມີຈຸດເດັ່ນໃນເລື່ອງການເປັນຕົວຂອງຕົນເອງ ບໍ່ຢຸດທີ່ຈະພັດທະນາຕົວເອງ ໝັ້ນໃຈເຮັດທຸກຢ່າງເຕັມທີ່.
ກ່ອນເຂົ້າຮ່ວມປະກວດນ້ອງໂບ ກໍໄດ້ມີການກຽມຕົວໃນຫຼາຍຢ່າງເຊັ່ນ: ການຍ່າງ, ຕອບຄຳຖາມ, ຝຶກຍິ້ມ, ຝຶກສ້າງອາລົມ ຄວາມຮູ້ສຶກໃນເວລາຍ່າງ ໃຫ້ຄົນທີ່ເຫັນເຊື່ອໃນສິ່ງທີ່ຕ້ອງການຈະສື່ສານອອກໄປ, ນອກນັ້ນແລ້ວນ້ອງຍັງເບິ່ງແຍງເລື່ອງຂອງຜິວພັນ, ໜ້າຕາຢູ່ສະໝໍ່າສະເໝີ, ພ້ອມນີ້ ໂບ ຍັງມັກຈະຊ່ວຍເຫຼືອສັງຄົມຢູ່ຕະຫຼອດໂດຍການບໍລິຈາກອາຫານການກິນຕ່າງໆ ໃຫ້ເອື້ອຍອ້າຍນ້ອງຜູ້ທີ່ດ້ອຍໂອກາດ ເພາະເຊື່ອວ່າກຳລັງໃຈ ແລະ ການແບ່ງປັນແມ່ນສິ່ງທີ່ດີ ແລະ ສໍາຄັນທີ່ສຸດ.
ສໍາລັບກິດຈະກຳຍາມວ່າງຂອງສາວງາມຄົນນີ້ແມ່ນ ເປັນຄົນທີ່ມັກຢູ່ກັບຄອບຄົວຫຼາຍໆ ແລະ ການຫຼິ້ນກີລາຕີດອກປີກໄກ່, ເຮັດອາຫານແບ່ງໃຫ້ຄົນໃນຊຸມຊົນດຽວກັນ ແລະ ຝຶກເຕັ້ນ ສ່ວນຮູບແບບການແຕ່ງຕົວຂອງນ້ອງມັກແນວຫວານໆ;
ຜົນງານຜ່ານມາແມ່ນຮ່ວມເດີນແບບໃຫ້ງານ better together charity ແລະ ໄດ້ຖ່າຍແບບຕ່າງໆ ຖ່າຍໂຄສະນາໃຫ້ທົ່ງຂັນຄຳມໍ ນຳອີກດ້ວຍ.
ສຸດທ້າຍກໍຢາກໃຫ້ທຸກຄົນຕິດຕາມຜົນງານຕ່າງໆ ເພາະແນ່ນອນວ່າຈະມີຜົນງານອອກມາໃຫ້ໄດ້ຊົມກັນ ຊ່ອງທາງການຕິດຕາມເຟສບຸ໊ກ Bobey Vanvisa.
