ກຳນົດ 3 ມື້ຈັດງານ ““ສຸຂະພາບໜຶ່ງດຽວ” ເພື່ອສົ່ງເສີມສຸຂະພາບຂອງຄົນ, ສັດ ແລະ ສິ່ງແວດລ້ອມ

40

ພິທີເປີດ ງານສຸຂະພາບໜຶ່ງດຽວ ທີ່ຈັດໂດຍທຶນສະໜັບສະໜູນຈາກ ສະຫະພາບເອີຣົບ ເພື່ອສົ່ງເສີມສຸຂະພາບຂອງຄົນ, ສັດ ແລະ ສິ່ງແວດລ້ອມ ມີຂຶ້ນໃນ ວັນທີ 9 ກັນຍາ 2022ນີ້ ທີ່ນະຄອນຫຼວງວຽງຈັນ ໂດຍການເຂົ້າຮ່ວມຂອງທ່ານ ດຣ. ສະໜອງ ທອງຊະນະ ຮອງລັດຖະມົນຕີກະຊວງ ສາທາລະນະສຸກ, ທີ່ປຶກສາທູດ ແລະ ອຸປະທູດ ທ່ານ ອີລ ເລໂອນາດ (Niall Leonard) ຜູ້ຮັກສາການ ອຸປະທູດຂອງສະຫະພາບເອີຣົບ ປະຈຳ ສປປ ລາວ ພ້ອມດ້ວຍບັນດາອົງການຈັດຕັ້ງສາກົນ, ຜູ້ຕາງໜ້າຈາກ ບັນດາກະຊວງ ແລະ ກົມຕ່າງໆເຂົ້າຮ່ວມ.


ງານດັ່ງກ່າວນີ້, ແມ່ນຈັດຂຶ້ນທີ່ໂຮງແຮມ Crowne Plaza ນະຄອນຫຼວງວຽງຈັນ ໃນລະຫວ່າງ ວັນທີ 9-10 ແລະ 11 ກັນຍາ 2022ນີ້, ໂດຍປະກອບມີບັນດາພະນັກງານ-ລັດຖະກອນ, ອົງການຈັດຕັ້ງ, ນັກທຸລະກິດ ແລະ ພາກສ່ວນຕ່າງໆ ທີ່ເຮັດວຽກ ແລະ ດໍາເນີນທຸລະກິດແບບຍືນຍົງ ແລະ ເປັນມິດກັບສິ່ງແວດລ້ອມ ກວ່າ 30ບູດເຂົ້າຮ່ວມ.


ພາຍໃນງານແມ່ນຕ້ອງການສົ່ງເສີມໃຫ້ປະຊາຊົນເລືອກອາຫານທີ່ມີປະໂຫຍດ ແລະ ປອດໄພຕໍ່ຕົນເອງ ແລະ ໃຫ້ມີສະຕິລະວັງຕົວຕໍ່ກັບອັນຕະລາຍຂອງເຊື້ອພະຍາດທີ່ເກີດຈາກການໃຊ້ຢາຕ້ານເຊື້ອທີ່ບໍ່ຖືກຕ້ອງ. ສໍາລັບ ແນວຄວາມຄິດຂອງໂຄງການ “One Health” ຫຼື “ສຸຂະພາບໜຶ່ງດຽວ” ແມ່ນເພື່ອໃຫ້ປະຊາຊົນຮັບຮູ້ວ່າສຸຂະພາບຂອງຄົນຕິດພັນກັບສຸຂະພາບຂອງສັດ ແລະ ສິ່ງແວດລ້ອມຢ່າງແໜ້ນແຟ້ນ, ເຊິ່ງກ່ຽວຂ້ອງກັບພາກສ່ວນສາທາລະນະສຸກ, ສັດຕະວະແພດ ແລະ ສິ່ງແວດລ້ອມ. ວິທີການນີ້ແມ່ນກ່ຽວພັນໂດຍກົງກັບຄວາມປອດໄພຂອງອາຫານ ແລະ ນໍ້າໂພຊະນາການ, ການຄວບຄຸມພະຍາດຕິດຕໍ່ຈາກສັດສູ່ຄົນ, ການຄຸ້ມຄອງມົນລະພິດ, ແລະ ການຕ້ານການດື້ຢາຕ້ານເຊື້ອ. ສະຫະພາບເອີຣົບ(ອີຢູ ) ປະຈໍາ ສປປ ລາວ ໄດ້ຈັດງານສຸຂະພາບໜຶ່ງດຽວ, ເຊິ່ງເປັນສ່ວນໜຶ່ງຂອງການໂຄສະນາເຜີຍແຜ່ໃຫ້ກວ້າງຂວາງກ່ຽວກັບຄວາມສໍາຄັນຂອງການປົກປ້ອງສຸຂະພາບຂອງຄົນ, ສັດ ແລະ ສິ່ງແວດລ້ອມ.


ໃນພິທີ ທ່ານ ດຣ. ສະໜອງ ທອງຊະນະ, ຮອງລັດຖະມົນຕີກະຊວງສາທາລະນະສຸກ ກ່າວບາງຕອນວ່າ: ກອງປະຊຸມສຸຂະພາບໜຶ່ງດຽວແມ່ນພວກເຮົາໄດ້ມີການຈັດທຸກໆປີ ເຊິ່ງປີ 2022 ແມ່ນຄົບຮອບ 11 ປີແລ້ວ ໃນໄລະຍະຜ່ານມາພວກໄດ້ມີການຮ່ວມມືກັບຂະແຫນງກະສິກໍາ-ປ່າໄມ້ ແລະ ຂະແໜງການອື່ນໆ ເພື່ອເຝົ້າລະວັງພະຍາດຈາກສັດສູ່ຄົນ, ຄົນສູ່ສັດ. ສຸຂະພາບໜຶ່ງດຽວແມ່ນວຽກງານໜື່ງທີ່ຕ້ອງໄດ້ມີການປະສານງານຮ່ວມກັນຂອງຫຼາຍພາກສ່ວນ, ຫຼາຍຂະແໜງທີ່ກ່ຽວຂ້ອງ ໃນທຸກລະດັບວິຊາການ ເລີ່ມຕົ້ນຈາກຊຸມຊົນ, ຊາດກໍຄື ສາກົນ ເພື່ອນໍາໄປສູ່ການມີສຸຂະພາບດີ ທີ່ສາມາດຢູ່ຮ່ວມກັນຢ່າງກົມກຽວ ລົງຕົວລະຫວ່າງ ຄົນ, ສັດ, ພືດ ແລະ ສະພາບແວດລ້ອມ. ດັ່ງນັ້ນ, ການສ້າງໃຫ້ມີສຸຂະພາບໜຶ່ງດຽວ, ມີຄວາມເຂັ້ມແຂງ ແລະ ໝັ້ນຄົງ ມັນຈຶ່ງຮຽກຮ້ອງໃຫ້ ທຸກພາກສ່ວນຕ້ອງມີຄວາມຮັບຜິດຊອບ ແລະ ການມີສ່ວນຮ່ວມໃນການປ້ອງກັນ ແລະ ຮ່ວມມືຫຼາຍຂື້ນ ເພື່ອນໍາພາໄປສູ່ການເຮັດໃຫ້ ສັງຄົມ, ຊຸມຊົນ, ຄົນ ແລະ ສັດ ທີ່ມີສຸຂະພາບດີ ແລະ ຢືນຍົງ.


ທ່ານກ່າວຕື່ມວ່າ: ການເປີດງານສຸຂະພາບໜຶ່ງດຽວ ໃນຫວັງວ່າຈະເປັນການສ້າງຄວາມເຂົ້າໃຈ ໃຫ້ທຸກພາກສ່ວນໃນສັງຄົມ ຮັບຮູ້ເຖິງຄວາມສໍາຄັນຂອງການມີສ່ວນຮ່ວມ ໃນການສ້າງຄວາມສົມດຸນ ປົກປັກຮັກສາສະພາບແວດລ້ອມ, ການພົວພັນລະຫວ່າງ ຄົນ ແລະ ສັດລ້ຽງ, ສັດປ່າ ເພື່ອຫຼີກລ້ຽງການ ເກີດລະບາດ ແລະ ແຜ່ເຊື້ອພະຍາດເຊິ່ງກັນ ແລະ ກັນ.

ພ້ອມນີ້, ທີ່ປຶກສາທູດ ແລະ ອຸປະທູດ ທ່ານ ອີລ ເລໂອນາດ (Niall Leonard) ຜູ້ຮັກສາການ ອຸປະທູດຂອງສະຫະພາບເອີຣົບ ປະຈຳ ສປປ ລາວ ກ່າວຕື່ມວ່າ: ໃນນາມສະຫະພາບເອີຣົບ, ພວກເຮົາຕັດສິນໃຈສະໜັບສະໜູນຂະບວນການນີ້ ເພາະວ່າພວກເຮົາຕ້ອງການຊຸກຍູ້ໃຫ້ຊຸມຊົນລົງມືປະຕິບັດ ມັນເປັນສິ່ງຮີບດ່ວນທີ່ຕ້ອງຮ່ວມກັນປົກປ້ອງສຸຂະພາບຂອງຄົນ, ສັດ, ແລະ ສິ່ງແວດລ້ອມ ເຊິ່ງນັ້ນເປັນເລື່ອງຮີບດ່ວນທີ່ພວກເຮົາທຸກຄົນຕ້ອງຮັບຮູ້ເຖິງຄວາມສໍາຄັນຂອງສິ່ງແວດລ້ອມ ແລະ ຮັບຮູ້ວ່າມັນເຊື່ອມໂຍງກັບສຸຂະພາບຂອງຄົນແນວໃດ, ການບໍລິໂພກອາຫານທ້ອງຖິ່ນທີ່ດີຕໍ່ສຸຂະພາບ ແລະ ການປົກປ້ອງສຸຂະພາບຂອງສັດເພື່ອປ້ອງກັນພະຍາດທີ່ເປັນອັນຕະລາຍຕໍ່ມະນຸດ.

” ງານກິດຈະກາດັ່ງກ່າວນີ້, ແມ່ນເປີດໃຫ້ປະຊາຊົນເຂົ້າຮ່ວມໂດຍບໍ່ເສຍຄ່າ, ພາຍໃນງານໄດ້ມີເວທີສົນທະນາ ແລະ ໂອ້ລົມສ້າງແຮງຈູງໃຈຈາກຄະນະຜູ້ຊ່ຽວຊານໃນສາຂາທີ່ກ່ຽວຂ້ອງ. ບັນດາຄອບຄົວ, ນ້ອງນັກຮຽນ ແລະ ເດັກນ້ອຍຕ່າງກໍຖືກເຊີນເຂົ້າຮ່ວມກິດຈະກຳມ່ວນຊື່ນ ແລະ ກິດຈະກໍາການຮຽນຮູ້, ມີບູດວາງສະແດງສິນຄ້າ ແລະ ໂຄງການລິເລີ່ມຕ່າງໃຫ້ຢ້ຽມຊົມຫຼາຍກວ່າ 30 ບູດ, ນອກນີ້ຍັງໄດ້ຮ່ວມເຊຍພໍ່ຄົວ/ແມ່ຄົວ ແລະ ຮັບຄໍາແນະນໍາຈາກຜູ້ຊ່ຽວຊານດ້ານການປຸງແຕ່ງອາຫານເພື່ອສຸຂະພາບໂດຍນໍາໃຊ້ພືດເປັນຫຼັກ ໃນງານແຂ່ງຂັນເຮັດອາຫານເພື່ອສຸຂະພາບ (ເຈ) ກັບສະໂລແກນ “ເລືອກ, ລ້າງ, ຮັກສາ ”.