ວັນທີ 2 ກັນຍາ 2022 ຜ່ານມາ, ທ່ານ ຄຳໂສ້ ກຸໂພຄຳ ຫົວໜ້າຫ້ອງການກະຊວງພະລັງງານ ແລະ ບໍ່ແຮ່ (ພບ) ພ້ອມຄະນະ ໄດ້ລົງພົບປະ ແລະ ຊຸກຍູ້ການຜະລິດຢູ່ໂຮງງານຝຸ່ນຊີວະພາບ ບ້ານດົງຊຽງດີ, ເມືອງນາຊາຍທອງ, ນະຄອນຫຼວງວຽງຈັນ ໂດຍໄດ້ຮັບການຕ້ອນຮັບຂອງ ທ່ານ ສີວົງ ພົມສີ ອຳນວຍການລັດວິສາຫະກິດຝຸ່ນຊີວະພາບ ພ້ອມດ້ວຍພະນັກງານ-ກຳມະກອນພາຍໃນໂຮງງານ.
ໂອກາດດັ່ງກ່າວ, ທ່ານ ຜູ້ອຳນວຍການຝຸ່ນຊີວະພາບ ໄດ້ສະແດງຄວາມຕ້ອນຮັບ ແລະ ຂອບໃຈຢ່າງຈິງໃຈ ຕໍ່ ທ່ານ ຫົວໜ້າຫ້ອງການກະຊວງ ທີ່ໄດ້ລົງມາພົບປະ, ຢ້ຽມຢາມ ແລະ ຊຸກຍູ້ການດຳເນີນທຸລະກິດຂອງ ລັດວິສາຫະກິດຝຸ່ນຊີວະພາບ ເຊິ່ງເປັນກົງຈັກໜຶ່ງ ທີ່ຢູ່ພາຍໃຕ້ການຊີ້ນຳໂດຍກົງຂອງກະຊວງ ພະລັງງານ ແລະ ບໍ່ແຮ່. ພ້ອມກັນນີ້, ທ່ານກໍໄດ້ລາຍງານຫຍໍ້ກ່ຽວກັບການເຄື່ອນໄຫວວຽກງານຂອງໂຮງງານນັບແຕ່ໄດ້ຮັບການສ້າງຕັ້ງມາແຕ່ປີ 1998 ເປັນຕົ້ນມາ, ເຊິ່ງໄລຍະນັ້ນຂຶ້ນກັບກົມອຸດສາຫະກຳ, ກະຊວງ ອຸດສາຫະກຳ ແລະ ຫັດຖະກຳ ໃນເມື່ອກ່ອນ ກ່ອນຈະໄດ້ຮັບການອະນຸມັດຈາກລັດຖະບານໃຫ້ສ້າງຕັ້ງເປັນ ລັດວິສາຫະກິດຝຸ່ນຊີວະພາບ ແລະ ຂຶ້ນກັບຄວາມຮັບຜິດຊອບຂອງກະຊວງ ພະລັງງານ ແລະ ບໍ່ແຮ່ ນັບແຕ່ປີ 2007 ເປັນຕົ້ນມາ.
ໂຮງງານຜະລິດຝຸ່ນຊີວະພາບ ບ້ານດົງຊຽງດີ ເປັນໜຶ່ງໃນສອງໂຮງງານ ທີ່ລັດຖະບານອະນຸຍາດໃຫ້ດຳເນີນກິດຈະການຜະລິດຝຸ່ນຊີວະພາບ ເພື່ອສະໜອງໃຫ້ການຜະລິດກະສິກຳໃນຂອບເຂດທົ່ວປະເທດ ໂດຍສະເພາະພາຍໃນນະຄອນຫຼວງວຽງຈັນ ການຜະລິດແມ່ນນຳໃຊ້ເຕັກນິກ, ເຕັກໂນໂລຊີ ຂອງ ສສ.ຫວຽດນາມ ສາມາດຜະລິດຝຸ່ນຊີວະພາບໄດ້ 5.000 ໂຕນຕໍ່ປີ.
ຫຼັງຈາກນັ້ນ, ທ່ານ ຫົວໜ້າຫ້ອງການກໍໄດ້ໂອ້ລົມ ແລະ ໃຫ້ທິດຊີ້ນຳຕໍ່ຄະນະພັກ, ຄະນະອຳນວຍການ ແລະ ພະນັກງານ-ກຳມະກອນ ເຊິ່ງກ່ອນອື່ນ ທ່ານ ໄດ້ສະແດງຄວາມຍ້ອງຍໍຊົມເຊີຍຕໍ່ຄວາມພະຍາຍາມໃນການຈັດຕັ້ງປະຕິບັດການດຳເນີນກິດຈະການຂອງຕົນ ເປັນຕົ້ນແມ່ນການຜະລິດຝຸ່ນຊີວະພາບ ເຊິ່ງເປັນຜະລິດຕະພັນໜຶ່ງທີ່ມີຄວາມສຳຄັນຫຼາຍຕໍ່ການຜະລິດກະສິກຳ ທີ່ເປັນພື້ນຖານທາງດ້ານເສດຖະກິດຂອງ ສປປ ລາວ.
ພ້ອມສະເໜີໃຫ້ ຄະນະພັກ, ຄະນະອຳນວຍການ ພ້ອມດ້ວຍພະນັກງານ-ກຳມະກອນ ສືບຕໍ່ເອົາໃຈໃສ່ສຶກສາອົບຮົມວຽກງານແນວຄິດ-ການເມືອງ ໃຫ້ເລິກເຊິ່ງ ແລະ ເປັນປະຈຳ ເພື່ອກຳໄດ້ແນວທາງນະໂຍບາຍຂອງພັກ ແລະ ລັດຖະບານ, ແຜນພັດທະນາເສດຖະກິດ-ສັງຄົມແຫ່ງລັດ ແລະ ແຜນພັດທະນາພະລັງງານ ແລະ ບໍ່ແຮ່ ໃນແຕ່ລະໄລຍະ, ປັບປຸງແບບແຜນວິທີການເຮັດວຽກໃຫ້ສອດຄ່ອງກັບສະພາບການພັດທະນາເສດຖະກິດ-ສັງຄົມ ຂອງປະເທດເຮົາ ເພື່ອຮັບປະກັນໃຫ້ການດຳເນີນກິດຈະການຂອງໂຮງງານມີປະສິດທິພາບ, ມີປະສິດທິຜົນ ແລະ ສາມາດສະໜອງໄດ້ຕາມຄວາມຮຽກຕ້ອງການຂອງສັງຄົມ.
