ຍັງເຫຼືອພຽງຕອນແລງນີ້! ງານຕະຫຼາດນັດແຮງງານ ເປີດທີ່ສູນ ICTC ນະຄອນຫຼວງວຽງຈັນ ເຊີນທ່ານເຂົ້າຮ່ວມໄປຊອກສະໝັກງານໄດ້

77

ກົມຈັດຫາງານ, ກະຊວງແຮງງານ ແລະ ສະຫວັດດີການສັງຄົມ ຮ່ວມ ບໍລິສັດ ອາຣເອັມ ເອເຊຍລາວ ຈໍາກັດ ໄດ້ເປີດຕະຫຼາດນັດແຮງງານ ໃນເຄືອຂອງບໍລິສັດ RMA Lao ຂຶ້ນ ເພື່ອຂຶ້ນທະບຽນຜູ້ຊອກວຽກເຮັດງານທໍາທົ່ວໄປ ແລະ ຜູ້ວ່າງງານສໍາລັບສະມາຊິກປະກັນສັງຄົມ.

ງານດັ່ງການຈັດຂຶ້ນໃນລະຫວ່າງວັນທີ 3-4 ກັນຍາ 2022 ນີ້ ທີ່ສູນການຮ່ວມມືສາກົນ ແລະ ການຝຶກອົບຮົມ (ICTC), ນະຄອນຫຼວງວຽງຈັນ ໂດຍການເປັນປະທານເປີດຂອງ ທ່ານ ສຸລິຍາ ຄໍາວົງສາ ຮອງຫົວໜ້າກົມຈັດຫາງານ ກະຊວງແຮງງານ ແລະ ສະຫວັດດີການສັງຄົມ, ທ່ານ ນາງ ຈູລີພອນ ວິນາວົງ ຜູ້ຈັດການທົ່ວໄປ ພະແນກບຸກຄະລາກອນ ແລະ ການບໍລິຫານ, ພ້ອມດ້ວຍບັນດາຫົວໜ້າ-ຮອງຫົວໜ້າກົມ, ຫົວໜ້າພະແນກ, ພາກທຸລະກິດລົດຍົນ, ຜູ້ຕາງໜ້າອ້ອມຂ້າງກະຊວງ, ນັກສຶກສາ ແລະ ພາກສ່ວນກ່ຽວຂ້ອງເຂົ້າຮ່ວມ.

ໃນພິທີ ນາງ ຈູລີພອນ ວິນາວົງ, ຜູ້ຈັດການທົ່ວໄປ ພະແນກ ບຸກຄະລາກອນ ແລະ ບໍລິຫານ ໃນນາມຕາງໜ້າໃຫ້ບໍລິສັດ RMA Lao ກ່າວວ່າ: ງານດັ່ງກ່າວ ຈະເປັນການໃຫ້ຄຳປຶກສາກ່ຽວກັບການປະກອບວິຊາຊີບ ທັງເປັນການເພີ່ມໂອກາດໃຫ້ແກ່ການສະໝັກງານຊອກວຽກເຮັດງານທຳ ແລະ ເປີດໂອກາດໃຫ້ບັນດານ້ອງໆ ນັກສຶກສາໄດ້ມີໂອກາດຮັບຮູ້ຂ່າວ ແລະ ເຂົ້າເຖິງແຫຼ່ງຂໍ້ມູນຂ່າວສານກ່ຽວກັບການຊອກຫາຕຳແໜ່ງງານຂອງບັນດາບໍລິສັດໃນເຄືອຂອງ RMA ງານດັ່ງກ່າວຈະເປັນການເພີ່ມໂອກາດໃນການສະໝັກງານໃນຫຼາກຫຼາຍສາຂາອາຊີບໃນແຕ່ລະຂະແໜງການ ເປັນຕົ້ນແມ່ນການຄ້າ, ການບໍລິການ, ການເງິນ ແລະ ອື່ນໆ ພ້ອມດຽວກັນນັ້ນການຈັດງານໃນຄັ້ງນີ້ຍັງຈະໄດ້ເປີດໂອກາດໃຫ້ແກ່ແຮງງານໄດ້ຂຶ້ນທະບຽນຜູ້ຊອກວຽກເຮັດງານທຳທົ່ວໄປ ແລະ ຜູ້ວ່າງງານທີ່ເປັນສະມາຊິກປະກັນສັງຄົມ.

ທ່ານ ສຸລິຍາ ຄໍາວົງສາ ຮອງຫົວໜ້າກົມຈັດຫາງານ ກ່າວວ່າ: ການຈັດງານຕະຫຼາດນັດແຮງງານ ໃນຄັ້ງນີ້ ກໍແມ່ນກິດຈະກໍາໜຶ່ງຂອງການຊຸກຍູ້ສົ່ງເສີມວຽກງານຈັດຫາງານໃຫ້ພົນລະເມືອງລາວ ແລະ ການສ້າງໂອກາດໃຫ້ຜູ້ອອກແຮງງານໄດ້ເຂົ້າເຖິງຂໍ້ມູນຂ່າວສານຕະຫຼາດແຮງງານຢ່າງກ້ວາງຂວາງ, ເພື່ອດັດສົມ ລະຫວ່າງຄວາມຕ້ອງການ ແລະ ຄວາມສາມາດດ້ານການສະໜອງແຮງງານ ໃນສັງຄົມ, ແມ່ນເປັນການສ້າງໂອກາດໃຫ້ບັນດາຜູ້ໃຊ້ແຮງງານ ໃນເຄື່ອ ບໍລິສັດ ອາຣເອັມ ເອເຊຍລາວ (RMA ລາວ) ແລະ ຜູ້ອອກແຮງງານ ຫຼື ຜູ້ກໍາລັງຊອກຫາວຽກເຮັດງານທໍາ, ຜູ້ຕ້ອງການປ່ຽນວຽກໄໝ່, ບັນດານັກສຶກສາທີ່ຈົບຮຽນໄໝ່ຈາກ ສະຖາບັນກນສຶກສາຕ່າງໆ ກັບບັນດາບໍລິສັດ ຜູ້ປະກອບການຕ່າງໆ ທີ່ເປັນເຄືອຂອງ ບໍລິສັດ ອາຣເອັມ ເອເຊຍລາວ (RMA Lao) ທີ່ຕ້ອງການພະນັກງານ ໄດ້ພົບປະກັນ ເພື່ອຮັບສະໝັກວຽກ. ນອກຈາກນັ້ນ ຍັງສ້າງໂອກາດໃຫ້ ຜູ້ຊອກວຽກເຮັດງານທໍາທົ່ວໄປ ແລະ ຜູ້ວ່າງງານທີ່ເປັນສະມາຊິກປະກັນສັງຄົມ ໄດ້ເຂົ້າມາໃຊ້ບໍລິການຈຸດບໍລິການຈັດຫາງານ ຂອງກະຊວງ ຮສສ ແລະ ພະແນກ ແຮງງານ ແລະ ສະຫວັດດີການສັງຄົມ ນະຄອນຫຼວງວຽງຈັນ ໄດ້ເຂົ້າມາໃຊ້ບໍລິການ ໂດຍສະເພາະ ຂຶ້ນທະບຽນຊອກວຽກເຮັດງານທໍາ ແລະ ຂຶ້ນທະບຽນຮັບເອົາໃບຢັ້ງຢືນວ່າງງານ ເພື່ອຂໍອະນຸມັດ ເງິນອຸດໜູນວ່າງງານຕາມລະບຽບ.

ນອກຈາກນີ້, ທ່ານຮອງຫົວໜ້າກົມຈັດຫາງານ ໃຫ້ຮູ້ຕື່ມວ່າ: ພວກເຮົາຈັດງານຕະຫຼາດນັດແຮງງານ ຄັ້ງນີ້ ໃນສະພາບແວດລ້ອມ ທີ່ບໍ່ອໍານວຍປານໃດ, ທັງນີ້ ກໍ່ຍ້ອນວິກິດການດ້ານການເງິນ ແລະ ບັນຫາ ໃນພາກພື້ນ ແລະ ໃນໂລກ ເວົ້າລວມ, ຄວາມຫຍຸ້ງຍາກດ້ານເສດຖະກິດ ແລະ ການເງິນໃນ ສປປ ລາວ ພວກເຮົາ ໄດ້ສົ່ງຜົນກະທົບເຮັດໃຫ້ເສດຖະກິດຂອງຫຼາຍໆ ປະເທດ ກໍຄືໃນ ສປປ ລາວ ຕົກເຂົ້າສະພາວະທົດຖອຍ, ເກີດການຕົກງານ ແລະ ວ່າງງານ, ຜູ້ອອກແຮງງານ ຈໍານວນບໍ່ໜ້ອຍ ຕ້ອງພົບກັບຍາກລໍາບາກ ໃນການດໍາລົງຊີວິດ, ໃນນັ້ນ ລວມທັງ ຊາວຜູ້ອອກແຮງງານລາວ ຂອງພວກເຮົາ. ດັ່ງນັ້ນ, ເຊື່ອໝັ້ນວ່າ ຜ່ານການຈັດງານຕະຫຼາດນັດແຮງງານຄັ້ງນີ້, ຈະປະສານສົມທົບກັນ, ໃຫ້ການສະໜັບສະໜູນ ຮ່ວມມືກັນ ແລະ ກັນ ໃນການດໍາເນີນນະໂຍບາຍ ແລະ ມາດຕະການຕ່າງໆ ທີ່ຈໍາເປັນ ເພື່ອຊ່ວຍຫຼຸດຜ່ອນ ຫຼື ແກ້ໄຂຄວາມຫຍຸ້ງຍາກຂອງພວກເຮົາໄດ້.