ກອງປະຊຸມລັດຖະມົນຕີເສດຖະກິດອາຊຽນ ສະໄໝພິເສດ ເຈລະຈາຍົກລະດັບສັນຍາການຄ້າເສລີອາຊຽນ-ອົດສະຕຣາລີ-ນິວຊີແລນ

48

​ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ (ອຄ) ທັງເປັນລັດຖະມົນຕີ ເສດຖະກິດອາຊຽນ ຂອງ ສປປ ລາວ ໄດ້ນຳພາຄະນະຜູ້ແທນ ສປປ ລາວ ເຂົ້າຮ່ວມກອງປະຊຸມລັດຖະມົນຕີເສດຖະກິດອາຊຽນສະໄໝພິເສດ ກ່ຽວກັບການເຈລະຈາເພື່ອຍົກລະດັບສັນຍາການຄ້າເສລີອາຊຽນ-ອົດສະຕາລີ-ນິວຊີແລນ ຜ່ານລະບົບ ວີດີໂອ ແບບທາງໄກ ໃນວັນທີ 1 ກັນຍາ 2022, ທີ່ກະຊວງ ອຄ ນະຄອນຫຼວງວຽງຈັນ.

ກອງປະຊຸມຄັ້ງນີ້ ໄດ້ດໍາເນີນພາຍໃຕ້ການເປັນປະທານຂອງ ທ່ານ Pan Sorasak ລັດຖະມົນຕີກະຊວງການຄ້າກຳປູເຈຍ, ມີບັນດາທ່ານລັດຖະມົນຕີເສດຖະກິດອາຊຽນຈາກ 10 ປະເທດສະມາຊິກອາຊຽນ ແລະ ທ່ານເລຂາທິການໃຫຍ່ອາຊຽນເຂົ້າຮ່ວມ ເຊິ່ງຈຸດປະສົງຂອງກອງປະຊຸມຄັ້ງນີ້ ແມ່ນເພື່ອຮັບຊາບກ່ຽວກັບຄວາມຄືືບໜ້າຂອງການເຈລະຈາສັນຍາເຂດການຄ້າເສລີ ອາຊຽນ-ອົດສະຕຣາລີ-ນິວຊີແລນ, ພ້ອມທັງ ປຶກສາຫາລື ແລະ ໃຫ້ທິດຊີ້ນໍາກ່ຽວກັບປະເດັນທີ່ຍັງຄົງຄ້າງໃນການເຈລະຈາສັນຍາດັ່ງກ່າວ ໂດຍສະເພາະການຢໍ້າຄືນຄາດໝາຍການເຈລະຈາໃຫ້ສໍາເລັດພາຍໃນທ້າຍປີ 2022 ຕາມທີ່ໄດ້ຕົກລົງນໍາກັນ.

ນອກຈາກນັ້ນ, ກອງປະຊຸມຍັງເປັນເອກະພາບດ້ານຫຼັກການລວມໃນການຈະສືບຕໍ່ເຈລະຈາປະເດັນທີ່ຍັງຄົງຄ້າງດັ່ງກ່າວ ໂດຍສະເໜີໃຫ້ແຕ່ລະປະເທດມີການຜ່ອນສັ້ນຜ່ອນຍາວໃນຈຸດຢືນຂອງຕົນຕໍ່ແຕ່ລະບັນຫາ ເພື່ອໃຫ້ສາມາດສະຫຼຸບການເຈລະຈາໄດ້ສໍາເລັດຕາມແຜນທີ່ວາງໄວ້. ໃນກອງປະຊຸມຄັ້ງນີ້ ຕາງໜ້າໃຫ້ຄະນະຜູ້ແທນ ສປປ ລາວ ກໍໄດ້ປະກອບຄໍາເຫັນໂດຍສະເພາະເຫັນດີເປັນເອກະພາບຕໍ່ກັບການສະເໜີດ້ານຫຼັກການທີ່ຈະສືບຕໍ່ເຈລະຈາໃນຕໍ່ໜ້າ ໂດຍໃຫ້ຄໍານຶງເຖິງຄວາມພ້ອມ ແລະ ລະດັບຄວາມແຕກໂຕນດ້ານການພັດທະນາຂອງແຕ່ລະປະເທດສະມາຊິກ.

ພ້ອມກັນນັ້ນ, ກໍສະເໜີໃຫ້ແຕ່ລະປະເທດເອົາໃຈໃສ່ຢ່າງຕັ້ງໜ້າໃນການແກ້ໄຂບັນຫາຕ່າງໆໃນການເຈລະຈາເພື່ອຊອກຫາທາງອອກທີ່ເໝາະສົມ ແລະ ຕ່າງຝ່າຍຕ່າງໄດ້ຮັບຜົນປະໂຫຍດຮ່ວມກັນ. ການເຈລະຈາເພື່ອຍົກລະດັບສັນຍາເຂດການຄ້າເສລີ ອາຊຽນ-ອົດສະຕຣາລີ-ນິວຊີແລນ ບໍ່ສະເພາະແຕ່ຈະເປັນການສົ່ງເສີມເສດຖະກິດການຄ້າ ແລະ ການລົງທຶນລະຫວ່າງອາຊຽນ ແລະ ອົດສະຕາລີ-ນິວຊີແລນ ໃຫ້ມີການຂະຫຍາຍຕົວຍິ່ງຂຶ້ນເທົ່ານັ້ນ, ແຕ່ຍັງເຮັດໃຫ້ສັນຍານີ້ມີລັກສະນະກວມລວມ, ຮອບດ້ານ ແລະ ທັນສະໄໝຂຶ້ນກວ່າເກົ່າ. ພ້ອມກັນນັ້ນ, ສັນຍາດັ່ງກ່າວຍັງເປັນໜຶ່ງໃນແຜນວຽກບູລິມະສິດດ້ານເສດຖະກິດສໍາລັບ ປີ 2022 ທີ່ອາຊຽນຈະຕ້ອງເຮັດສໍາເລັດໃນໄລຍະການເປັນປະທານອາຊຽນຂອງປະເທດກໍາປູເຈຍ.