ການແຂ່ງຂັນດອກປີກໄກ່ ຊີງແຊັມທົ່ວປະເທດ 2022 ເປີດສາກຂຶ້ນຢ່າງເປັນທາງການ

38

ການແຂ່ງຂັນກີລາດອກປີກໄກ່ ຊີງແຊັມທົ່ວປະເທດ ຄັ້ງທີ 21 ຊີງຂັນທ່ານປະທານສະພາແຫ່ງຊາດ ປະຈຳປີ 2022 ເປີດຂຶ້ນຢ່າງເປັນທາງການ ໃນວັນທີ 1 ກັນຍາ 2022 ຢູ່ສະໂມສອນດອກປີກໄກ່ເສດຖາ ນະຄອນຫຼວງວຽງຈັນ ໂດຍມີທ່ານ ຄໍາໃບ ດໍາລັດ ຮອງປະທານສະພາແຫ່ງຊາດ ທ່ານ ບຸນເຫຼືອ ສິນໄຊວໍຣະວົງ ຜູ້ວ່າການທະນາຄານແຫ່ງ ສປປປ ລາວ ທັງເປັນປະທານສະຫະພັນກີລາດອກປີໄກ່ແຫ່ງຊາດ ທ່ານ ສຸລິວັນ ເຊີນວິໄລ ຮອງຫົວໜ້າກົມກີລາລະດັບສູງ ກະຊວງສຶກສາທິການ ແລະ ກີລາ, ທ່ານ ຈັນສະໝອນ ຜ່ອງຈັນທາ ຜູ້ອຳນວຍການຝ່າຍການຕະຫຼາດ ບໍລິສັດ ເບຍລາວ ຈຳກັດ ພ້ອມດ້ວຍຄະນະບໍລິຫານງານສະຫະພັນດອກປີກໄກ່ແຫ່ງຊາດ ຕາງໜ້າຜູ້ໃຫ້ການສະໜັບສະໜູນຫຼັກ ຄະນະນັກກີລາ ຄູເຝິກ ແລະ ນັກກີລາ ເຂົ້າຮ່ວມ.

ທ່ານ ໄຊບັນດິດ ຣາຊະພົນ ເລຂາທິການສະຫະພັນດອກປີກໄກ່ແຫ່ງຊາດ ກ່າວວ່າ:ຂ້າພະເຈົ້າຕາງໜ້າສະຫະພັນກີລາດອກປີກໄກ່ແຫ່ງຊາດລາວ ໃນນາມຄະນະຮັບຜິດຊອບຊີ້ນຳລວມການຈັດແຂ່ງຂັນກີລາດອກປີກໄກ່ ທົ່ວປະເທດ ຄັ້ງທີ 21 ຊີງຂັນທ່ານປະທານສະພາແຫ່ງຊາດ ຫຼື ລາຍການ 21th BeerLao Badminton Championship ປະຈຳປີ 2022 ເຊິ່ງການແຂ່ງຂັນລາຍການນີ້ ແມ່ນລາຍການແຂ່ງຂັນໃຫຍ່ຂອງກີລາດອກປີກໄກ່ປະຈຳປີ ຈະຈັດຂຶ້ນເປັນ ຄັ້ງທີ 21 ໂດຍໄດ້ຮັບການສືບຕໍ່ສະໜັບສະໜູນທີ່ດີຈາກບໍລິສັດ ເບຍລາວ ຈຳກັດ ຕັ້ງແຕ່ຄັ້ງທີ 1 ຕະຫຼອດມາຈົນເຖິງປັດຈຸບັນ ເຊິ່ງທາງຄະນະຮັບຜິດຊອບທຸກຝ່າຍໄດ້ມີການປະຊຸມປຶກສາຫາລືຄົ້ນຄວ້າ ແລະ ກະກຽມຄວາມພ້ອມເປັນເວລາຍາວນານ ໂດຍສະ ເພາະທາງຜູ້ໃຫ້ການສະໜັບສະໜູນຫຼັກ ກໍຄື ບໍລິສັດ ເບຍລາວ ຈຳກັດ ເພື່ອເຮັດໃຫ້ການແຂ່ງຂັນໃນຄັ້ງນີ້ມີຄວາມພ້ອມໃນທຸກດ້ານ ແລະ ສາມາດບັນລຸຕາມຄາດໝາຍທີ່ຕັ້ງໄວ້.

ທ່ານກ່າວອີກວ່າ ຈຸດປະສົງຂອງການຈັດແຂ່ງຂັນ ກໍເພື່ອສະເຫຼີມສະຫຼອງວັນສ້າງຕັ້ງວັນລັດຖະທຳມະນູນ ຄົບຮອບ 31 ປີ ທັງເປັນການສ້າງຂະບວນການແຂ່ງຂັນກີລາດອກປີກໄກ່ພາຍໃນປະເທດ ໃຫ້ມີຄວາມຟົດຟື້ນ ໃຫ້ນັກກີລາໄດ້ມີໂອກາດໃນການທົດສອບສີມືຂອງຕົນເອງ ແລະ ສາມາດເລືອກໄດ້ນັກກີລາດີເດັ່ນ ປະກອບເຂົ້າເປັນນັກກີລາທີມຊາດ ໃນຮຸ່ນເຍົາວະຊົນ ແລະ ຮຸ່ນທົ່ວໄປ.

ການແຂ່ງຂັນໃນຄັ້ງນີ້ ໄດ້ປະກາດການຮັບສະໝັກມີທັງໝົດ 11 ລາຍການ ປະກອບມີ: ຮຸ່ນເຍົາວະຊົນ 8 ລາຍການ ໄດ້ແກ່ ດ່ຽວເຍົາວະຊົນຊາຍ-ຍິງ ອາຍຸບໍ່ເກີນ 12 ປີ ດ່ຽວເຍົາວະຊົນຊາຍ ອາຍຸບໍ່ເກີນ 15 ປີ ຄູ່ເຍົາວະຊົນຊາຍ ອາຍຸບໍ່ເກີນ 15 ປີ ດ່ຽວເຍົາວະຊົນຊາຍ ອາຍຸບໍ່ເກີນ 18 ປີ ຄູ່ເຍົາວະຊົນຊາຍອາຍຸບໍ່ເກີນ 18 ປີ ຄູ່ເຍົາວະຊົນປະສົມ ອາຍຸບໍ່ເກີນ 18 ປີ ນອກຈາກນັ້ນ ຍັງມີຮຸ່ນຊາວໜຸ່ມ-ທົ່ວໄປ ອີກ 5 ລາຍການ ຄື:ດ່ຽວຊາຍທົ່ວໄປ ຄູ່ຍິງທົ່ວໄປ ຄູ່ຊາຍທົ່ວໄປ ຄູ່ປະສົມທົ່ວໄປ ຄູ່ສະໝັກຫຼິ້ນຊາຍທົ່ວໄປ ເຊິ່ງຈະໄດ້ດຳເນີນການແຂ່ງຂັນແຕ່ວັນທີ 1 ເຖິງ 4 ກັນຍາ 2022 ຢູ່ສະໂມສອນດອກປີກໄກ່ເສດຖາ (ບຶງຂະຫຍອງ) ໂດຍມີ 20 ສະໂມສອນທັງໃນນະຄອນຫຼວງ ແລະ ຕ່າງແຂວງເຂົ້າຮ່ວມ