ລາວ-ຈີນຈັດສໍາມະນາການຜະລິດ,ປຸງແຕ່ງແລະສົ່ງອອກສິນຄ້າກະສິກໍາໄປ ສປ ຈີນ

134

​ການເຈລະຈາສົ່ງສິນຄ້າກະສິກຳຈາກລາວໄປ ສປ ຈີນ ໄລຍະຜ່ານມາມີ 10 ກວ່າລາຍການທີ່ສອງຝ່າຍໄດ້ຕົກລົງໃຫ້ມີການຊື້-ຂາຍຮ່ວມກັນແລ້ວ  ຈີນຖືເປັນຕະຫຼາດທີ່ໃຫຍ່ ແລະມີກຳລັງການຊື້ຫຼາຍ ລາວ-ຈີນກໍ່ເປັນປະເທດຄູ່ຮ່ວມມືຍຸດທະສາດທີ່ລວມມີຫຼາຍຂົງເຂດການພົວພັນຮ່ວມມື ແລະລາວກໍເປັນປະເທດທີ່ຍັງມີທ່າແຮງດ້ານກະສິກຳຫຼາຍບວກກັບການມີເສັ້ນທາງລົດໄຟລາວ-ຈີນ ພັກ-ລັດຖະບານສອງປະເທດຈິ່ງຊຸກຍູ້ຢ່າງຕໍ່ເນື່ອງໃຫ້ເກີດການຄ້າໃນຂົງເຂດກະສິກຳຫຼາຍຂຶ້ນ.

ຫຼ້າສຸດນີ້ ໃນລະຫວ່າງວັນທີ 1-2 ກັນຍາ 2022 ນີ້ ກະຊວງກະສິກໍາ ແລະປ່າໄມ້ (ກປ) ໄດ້ຮ່ວມກັບສະພາການຄ້າແຂວງກວາງຊີແຫ່ງສປຈີນ ປະຈໍາ ສປປ ລາວ ຈັດກອງປະຊຸມສໍາມະນາກ່ຽວກັບການຜະລິດ, ການປຸງແຕ່ງ ແລະການສົ່ງອອກສິນຄ້າກະສິກໍາຈາກ ສປປ ລາວໄປສປ ຈີນ ໃນໄລຍະໃໝ່,ໂດຍການເປັນປະທ່ານຮ່ວມຂອງທ່ານ ກິແກ້ວ ສິງນາວົງ ຮອງລັດຖະມົນຕີກະຊວງ ກະສິກຳ ແລະປ່າໄມ້ ແລະທ່ານ ຈາວເຫວີນຢຸຍ(Zhao wenyu) ທີ່ປຶກສາເສດຖະກິດ-ການຄ້າ ສະຖານທູດ ສປ ຈີນ ປະຈໍາ ສປປ ລາວ.


ກອງປະຊຸມຄັ້ງນີ້, ເປັນເວທີສໍາຄັນໃຫ້ຫຼາຍພາກສ່ວນທັງສູນກາງ ແລະທ້ອງຖິ່ນ ໃນການຈັດຕັ້ງປະຕິບັດອະນຸສັນຍາ, ຂໍ້ກໍານົດເງື່ອນໄຂການສົ່ງອອກພືດຈາກລາວໄປຈີນ ໃຫ້ໄປຕາມການຕົກລົງຂອງລັດຖະບານສອງຝ່າຍລາວ-ຈີນ, ຈີນ-ລາວ ແລະເພື່ອໃຫ້ທຸກພາກສ່ວນທີ່ເຂົ້າຮ່ວມໄດ້ຮັບຮູ້ ແລະເຂົ້າໃຈ ຢ່າງຖືກຕ້ອງຕໍ່ຂະບວນການຜະລິດ ແລະສົ່ງອອກພືດ ແລະຜະລິດຕະພັນພືດໄປຍັງ ສປ ຈີນ ລວມເຖິງເປັນເວທີປຶກສາຫາລືກ່ຽວກັບແຜນການ ແລະວິທີການໃນການຊຸກຍູ້ສົ່ງເສີມການຜະລິດ ແລະການສົ່ງອອກພືດ ແລະຜະລິດຕະພັນພືດຈາກລາວໄປຈີນໃນຕໍ່ໜ້າໃຫ້ມີຄວາມສະດວກຫຼາຍຂຶ້ນ.


ທ່ານຮອງລັດຖະມົນຕີໄດ້ຕີລາຄາວ່າ: ນັບແຕ່ທາງລົດໄຟລາວ-ຈີນເປີດໃຫ້ບໍລິການໂດຍສານ ແລະຂົນສົ່ງສິນຄ້າເປັນຕົ້ນມາໄດ້ກາຍເປັນທ່າແຮງສໍາຄັນໃນການສົ່ງອອກສິນຄ້າຫຼາຍດ້ານໃຫ້ກັບ ສປປ ລາວ ເວົ້າສະເພາະກໍຄືສິນຄ້າກະສິກໍາ. ສະນັ້ນ, ກອງປະຊຸມຄັ້ງນີ້ເປັນບາດກ້າວສໍາຄັນໜຶ່ງ ຕໍ່ກັບວຽກງານການສົ່ງອອກສິນຄ້າກະສິກໍາລາວໄປ ສປ ຈີນໃຫ້ນັບມື້ຫຼາຍຂຶ້ນ ແລະເຊື່ອໝັ້ນວ່າທຸກພາກສ່ວນທັງພາກລັດ, ວິສາຫະກິດ ລວມເຖິງຄູ່ຮ່ວມພັດທະນາ, ກຸ່ມການຜະລິດ ແລະສະຫະກອນຈະຮ່ວມມືກັນຈັດຕັ້ງປະຕິບັດໃຫ້ມີປະສິດທິຜົນ, ຍືນຍົງ ແລະໄດ້ຮັບຜົນສໍາເລັດຕາມຄາດໝາຍທີ່ວາງໄວ້.


​ ທ່ານ Zhao wenyu ໄດ້ກ່າວວ່າ: ທາງລົດໄຟລາວ-ຈີນໄດ້ເປີດນໍາໃຊ້ຢ່າງເປັນທາງການແລ້ວ ພ້ອມກັນນັ້ນ, ສັນຍາການພົວພັນຄູ່ຮ່ວມມືເສດຖະກິດຮອບດ້ານໃນພາກພື້ນ (RCEP) ໄດ້ມີຜົນສັກສິດຈັດຕັ້ງປະຕິບັດນັບແຕ່ວັນທີ 1 ມັງກອນປີນີ້ເປັນຕົ້ນມາ, ຝ່າຍຈີນໄດ້ອໍານວຍຄວາມສະດວກໃຫ້ແກ່ 16 ປະເທດທີ່ດ້ອຍພັດທະນາລວມທັງປະເທດລາວໃນຂອບ 98% ຂອງລາຍການສິນຄ້າສາມາດຍົກເວັ້ນພາສີ ເຊິ່ງໄດ້ເລີ່ມຈັດຕັ້ງປະຕິບັດໃນວັນທີ 1 ກັນຍາ2022 ກໍ່ຄືມື້ນີ້. ການເຊື່ອມໂຍງເຊື່ອມຈອດກັນລະຫວ່າງຈີນ-ລາວ ບວກກັບນະໂຍບາຍຕ່າງໆ ທີ່ອໍານວຍຄວາມສະດວກໃຫ້ແກ່ຝ່າຍລາວເຊັ່ນ ການຫຼຸດຜ່ອນ ຫຼືຍົກເວັ້ນພາສີຜະລິດຕະພັນກະສິກໍາ, ມີກົດລະບຽບທີ່ສະດວກສະບາຍກວ່າເກົ່າ ແລະການຈັດວາງຄວາມສະດວກດ້ານການຄ້າທີ່ມີລະດັບສູງຈະຊ່ວຍບັນລຸເປົ້າໝາຍການເຊື່ອມໂຍງເຊື່ອມຈອດທາງດ້ານການຄ້າ ແລະພື້ນຖານໂຄງລ່າງໃນພາກພື້ນໃຫ້ດີກວ່າເກົ່າ ເຊິ່ງໄດ້ສ້າງໂອກາດໃໝ່ແກ່ການຮ່ວມມືດ້ານກະສິກໍາລະຫວ່າງຈີນ-ລາວ.


ກອງປະຊຸມໃນຄັ້ງນີ້ຈະໄດ້ດໍາເນີນໄປເປັນເວລາ 2 ວັນ, ໂດຍຈະສືບຕໍ່ຮັບຟັງບົດລາຍງານຕ່າງໆ ໂດຍສະເພາະການຊຸກຍູ້ການຜະລິດເປັນສິນຄ້າ ແລະການສົ່ງອອກພືດ ແລະຜະລິດຕະພັນພືດໄປຈີນ ໃນໄລຍະໃໝ່, ບັນດາກົດໝາຍ ແລະນິຕິກໍາລຸ່ມກົດໝາຍທີ່ກ່ຽວຂ້ອງ ລວມເຖິງການດໍາເນີນການເຈລະຈາເຕັກນິກເປີດຕະຫຼາດກັບ ສປ ຈີນ ພາລະບົດບາດທາງລົດໄຟລາວ-ຈີນຕໍ່ການນໍາເຂົ້າ-ສົ່ງອອກ ແລະອື່ນໆ, ສໍາລັບວັນທີ 2 ຈະໄດ້ຮັບຟັງບົດລາຍງານສະພາບການຜະລິດ ແລະການສົ່ງອອກໝາກກ້ວຍ, ໝາກພຸກ ແລະເຂົ້າສານໄປ ສປ ຈີນ.

ກອງປະຊຸມນີ້ຈັດຂຶ້ນທີ່ຫໍປະຊຸມແຫ່ງຊາດລາວໃນວັນທີ 01 ກັນຍາ 2022 ເຊິ່ງມີຜູ້ແທນທັງສູນກາງ,ບັນດາພະແນກກະສິກໍາ ແລະປ່າໄມ້ໃນທົ່ວປະເທດ ລວມເຖິງບັນດາຜູ້ປະກອບການທາງດ້ານການຜະລິດ, ປຸງແຕ່ງ ແລະສົ່ງອອກກະສິກໍາເຂົ້າຮ່ວມນໍາ.

Cr: CRI-FM93