ຂໍສະແດງຄວາມຍິນດີກັບນ້ອງ ດີນ້າ ພຸດສະຫວັນ ວົງຄຳຊາວ MGL15 ທີ່ສາມາດຄວ້າຕໍາແໜ່ງ Miss Grand Laos 2022 ຄົນຫຼ້າສຸດ ເຊິ່ງມີຄວາມຮູ້, ຄວາມສາມາດ ແລະ ກ້າສະແດງອອກທີ່ໝັ້ນໃຈ ສາມາດເຮັດໃຫ້ຄະນະກໍາມະການ ແລະ ແຟນໆນາງງາມຫຼົງຮັກໃນ ຄວາມເກັ່ງຂອງສາວງາມຄົນນີ້ ແລະ ທີ່ສໍາຄັນແມ່ນເປັນຜູ້ທີ່ພ້ອມດ້ວຍຄວາມຮູ້ ເຊິ່ງມີດີກຣີເປັນເຖິງນັກຮຽນນອກ ພາສາຕ່າງປະເທດກໍຄ່ອງ ສົມແລ້ວກັບມົງກຸດອັນຊົງຄຸນຄ່າຈາກເວທີ Miss Grand Laos.
ມື້ນີ້ທີມຂ່າວບັນເທີງຈະພາມາທໍາຄວາມຮູ້ຈັກກັບສາວງາມເຈົ້າຂອງຕໍາແໜ່ງ Miss Grand Laos 2022 ຄົນນີ້ໃຫ້ຫຼາຍຂຶ້ນ ໂດຍຜ່ານບົດສໍາພາດຄື: ດີນ້າ ພຸດສະຫວັນ ວົງຄໍາຊາວ ປັດຈຸບັນອາຍຸ 25 ປີ, ສ່ວນສູງ 168 ຊັງຕີແມັດ, ຈົບປະລິນຍາຕີ ພາກວິຊາບັນຊີ – ການເງິນ ຈາກ Kent Institue, Sydney, Australia.
ຜ່ານມາຜົນງງານການເດີນສາຍປະກວດ ແມ່ນເຄີຍປະກວດ Laos Super Model 2015 ມາກ່ອນ ແລະ ໃນປີນີ້ ເນື່ອງດ້ວຍຄວາມພ້ອມທາງອາຍຸ, ວິໄສທັດ ແລະ ຄວາມໝັ້ນໃຈທີ່ເຕັມ 100 ຈຶ່ງຕັດສິນໃຈເຂົ້າປະກວດໃນເວທີ Miss Grand Laos 2022 ແລະ ໄດ້ມົງກຸດໃຫຍ່ຈາກເວທີປະກວດໃນຄັ້ງນີ້ມາຄອງ.
ດີນ້າ ບອກວ່າ: ສໍາລັບເຫດຜົນທີ່ເຮັດໃຫ້ ດີນ້າ ເລືອກທີ່ຈະປະກວດໃນເວທີ Miss Grand Laos 2022 ນີ້ ຍ້ອນວ່າຢາກຈະເອົາຊະນະຕົວເອງ ແລະ ຖ້າມີໂອກາດໄດ້ໄປຕໍ່ Miss Grand International 2022 ຢາກເຮັດໃຫ້ທົ່ວໂລກຮູ້ວ່າ ປະເທດລາວ, ຄົນລາວ ໂດຍສະເພາະແມ່ຍິງລາວກໍເກັ່ງ ທັງດ້ານ ຄວາມຄິດ ແລະ ຄວາມສາມາດ ບໍ່ດ້ອຍກວ່າຊາດອື່ນໃດໃນໂລກ ແລະ ຈະນໍາເອົາວັດທະນະທຳຮີດຄອງປະເພນີອັນດີງາມ, ສະຖານທີ່ທ່ອງທ່ຽວທາງທໍາມະຊາດ ແລະ ມໍລະດົກທີ່ເປັນເອກະລັກຂອງລາວເຮົາໄປເຜີຍແຜ່ໃຫ້ສາກົນໄດ້ຮັບຮູ້ດ້ວຍ.
ສ່ວນຄະຕິປະຈຳໃຈຂອງດີນ້າແມ່ນ: “ Action, Consistent and endure lead to greatness in life, ການລົງມືທຳ, ຄວາມພະຍາຍາມ ແລະ ຄວາມສູ້ ຄວາມອົດທົນ ເປັນສິ່ງທີ່ນຳສິ່ງດີທີ່ສຸດເຂົ້າມາໃນຊີວິດ ”.
ສິ່ງທີ່ຕັ້ງເປົ້າໄວ້ເມື່ອໄດ້ໃຊ້ນາມສະກຸນຂອງ Miss Grand Laos ດີນ້າ ກໍມີຄວາມຄິດໄວ້ວ່າສິ່ງທີ່ຢາກຈະປະກອບສ່ວນເພື່ອຊ່ວຍເຫຼືອສັງຄົມ ນັ້ນກໍຄືການປະກອບສ່ວນປຸກລະດົມ ແລະ ເນັ້ນຢໍ້າຄວາມສຳຄັນຂອງການສຶກສາຕໍ່ຊາວໜຸ່ມຮຸ່ນສືບທອດໃຫ້ມີຄວາມຮູ້, ຄວາມສາມາດ ເພື່ອຕົນເອງ ແລະ ເພື່ອພັດທະນາເສດຖະກິດຂອງປະເທດລາວ. ພ້ອມນີ້, ກໍຈະຍົກຫົວຂໍ້ ການພັດທະນາ – ການຊ່ວຍເຫຼືອປະຊາຊົນທີ່ຢູ່ໃນເຂດຫ່າງໄກສອກຫຼີກ ເປັນຕົ້ນແມ່ນການຮຽນວິຊາຊີບທີ່ສາມາດນຳໄປໃຊ້ໄດ້ຕົວຈິງ ( ເຊິ່ງດີນ້າເຄີຍເປັນ Finance Associate ທີ່ Swisscontract ເຊິ່ງໂຄງການນີ້ມອບໂອກາດ ແລະ ປຸກລະດົມໃຫ້ປະຊາຊົນໄດ້ມີວຽກເຮັດງານທຳ ) ເພື່ອຫຼຸດຜ່ອນການວ່າງງານ ແລະ ສ້າງລາຍໄດ້ໃຫ້ແກ່ຕົນເອງ ແລະ ຄອບຄົວ.
ທ້າຍນີ້ກໍຂໍຝາກແຟນໆນາງງາມທຸກຄົນຊ່ວຍເປັນກໍາລັງໃຈ ແລະ ໃຫ້ການສະໜັບສະໜູນສາວງາມຄົນນີ້ ດີນ້າ ພຸດສະຫວັນ ວົງຄຳຊາວ ທີ່ຈະເປັນຕົວແທນຂອງປະເທດລາວໃນການປະກວດ Miss Grand International 2022 ທີ່ປະເທດອິນໂດເນເຊຍ ຕິດຕາມຜົນງານທີ່ Facebook: Dina Phoutsavanh vongkhamxao ແລະ ເພຈ Miss Grand Laos ດ້ວຍ.
[ ຮູບ: Miss Grand Laos ]