ສຸດຍອດໄດ້ທີ 3 ເຫລົ່າຮົບຊ່າງແສງ ກອງທັບປະຊາຊົນລາວໃນກິລາການທະຫານສາກົນ

86

ກັບມາສ້າງຄວາມຄຶກຄັກອີກຄັ້ງສຳລັບການແຂ່ງຂັນກິລາການທະຫານສາກົນ  ຫລື ARMY GAMES ເຊິ່ງຄະນະກຳມະການຈັດການແຂ່ງຂັນຂອງເຫລົ່າຮົບຊ່າງແສງໄດ້ຈັດພິທີສະຫລຸບ ປິດການແຂ່ງຂັນກິລາ ARMY GAMES 2022 ໃນວັນທີ 21 ສິງຫາ ຜ່ານມາ ຢູ່ທີ່ກອງພົນນ້ອຍຊ່າງແສງ 73420 ເມືອງໂວນກາກຣາດ, ແຫ່ງສະຫະພັນລັດເຊຍ ໂດຍການເຂົ້າຮ່ວມເປັນປະທານຂອງ ທ່ານ ພັນເອກ ກຮູກະລົບ ອັນເດຮ ອາເລັກເຊວິດ ຮອງຫົວໜ້າກົມຊ່າງແສງ ສະຫະພັນລັດເຊຍ, ມີ ສະຫາຍ ພັນເອກ ບຸນທະວີ ໂພໄຊ ຮອງຫົວໜ້າກົມຊ່າງແສງ, ຫົວໜ້າຄະນະຊີ້ນຳທິມນັກກິລາ ເຫລົ່າຮົບຊ່າງແສງ ກອງທັບປະຊາຊົນລາວ, ມີບັນດາຄະນະຮັບຜິດຊອບຊີ້ນໍາທິມນັກກິລາ, ອານຸກຳມະ ການ ແລະ ນັກກິລາແຕ່ລະປະເທດເຂົ້າຮ່ວມ. ໃນນັ້ນ, ເຫລົ່າຮົບຊ່າງແສງ ກອງທັບປະຊາຊົນລາວ ສາມາດຍາດໄດ້ ອັນດັບມີ 3.


ສະຫາຍ ພັນໂທ ອານຸສັກ ພົມວົງສາ ຮອງຫົວໜ້າ ຄະນະຊີ້ນຳທິມນັກກິລາ ເຫລົ່າຮົບຊ່າງແສງ ກອງທັບປະຊາຊົນລາວ ໃຫ້ຮູ້ວ່າ: ງານແຂ່ງຂັນກິລາ ການທະຫານສາກົນ (ARMY GAME 2022) ໃນຮູບແບບຊ່າງແສງ ໃນຄັ້ງນີ້ປະກອບມີ 5 ປະເທດຄື: ຣັດເຊຍ, ລາວ, ອຸສເບກີສະຖານ, ເບລາຣຸດ ແລະ ອາຣເມເນຍ.

ສຳລັບທິມນັກກິລາເຫລົ່າຮົບຊ່າງແສງ ກອງທັບປະຊາຊົນລາວ ແມ່ນຈົກສະຫຼລກໄດ້ ເບີ 2 ປະກອບມີ: ລົດດຸດ, ລົດຂຸດຂຸມຄອງ, ລົດສ້າງສິ່ງກີດຂວາງແຕກ, ລົດສ້າງສິ່ງກີດຂວາງບໍ່ແຕກ, ລົດທຳລາຍສະ ໜາມມິນ, ລົດລອຍນ້ຳ ແລະ ລົດສ້າງສະໜາມມິນ, ມີນັກກິລາເຂົ້າຮ່ວມ 21 ສະຫາຍ ໂດຍໄດ້ເລີ່ມມາແຕ່ວັນ 8-21 ສິງຫາ 2022 ພ້ອມທັງຫລຸບຜົນການແຂ່ງຂັນ ເຊິ່ງຜົນການແຂ່ງຂັນ ອັດດັບທີ l ແມ່ນສະຫະພັນລັດເຊຍ, ທີ ll ເບລາຣຸດ ແລະ ທີ lll ກອງທັບປະຊາຊົນລາວ.


ການເຂົ້າຮ່ວມແຂ່ງຂັນ ກິລາການທະຫານສາກົນ(ARMY GAME 2022) ແມ່ນມີຄວາມໝາຍ-ຄວາມສຳຄັນທີ່ສຸດ, ທັງເປັນການສ້າງສາຍພົວພັນມິດຕະພາບ, ຮັດແໜ້ນຄວາມສາມັກຄີກັບບັນດາປະເທດ ທີ່ເຂົ້າຮ່ວມໂດຍສະເພາະ ເພື່ອຍົກສູງສາຍພົວພັນ ມິດຕະ ພາບ ລະຫວ່າງ ກອງທັບ ປະຊາຊົນລາວ ກັບ ກອງທັບ ສ ລັດເຊຍ ແລະ ປະເທດເພື່ອນມິດ ທັງເປັນການ ຖອດຖອນບົດຮຽນ ໃນວຽກງານວິຊາສະເພາະ ເຫລົ່າຮົບຊ່າງແສງ ໃຫ້ນັບມື້ເຕີບໃຫ່ຍ, ເຂັ້ມແຂງ ທັນສະໄໝເທື່ອລະກ້າວ.


ຂ່າວ: ເກນ ວິໄລສານ