ໃນວັນທີ 25 ກໍລະກົດຜ່ານມາ ກົມງົບປະມານແຫ່ງລັດ ກະຊວງການເງິນ, ໄດ້ເປີດທົດລອງນໍາໃຊ້ການຈັດຕັ້ງປະຕິບັດວຽກງານ GFIS Plus ກ່ຽວກັບການຫຼຸດຜ່ອນຂັ້ນຕອນ, ຂັ້ນຂອດການປະຕິບັດແຜນງົບປະມານຂອງລັດໃນລະບົບ, ໂດຍການເປັນປະທານຂອງທ່ານ ພູວົງ ກິດຕະວົງ ຫົວໜ້າກົມງົບປະມານແຫ່ງລັດ ກະຊວງການເງິນ,ຮອງຫົວໜ້າຫ້ອງການກະຊວງ, ຮອງຫົວໜ້າກົມ, ຫົວໜ້າພະແນກ, ຮອງຫົວໜ້າພະແນກ, ຕາງໜ້າຈາກຄັງເງິນແຫ່ງຊາດ, ກົມເຕັກໂນໂລຊີຂໍ້ມູນຂ່າວສານການເງິນ, ທະນາຄານໂລກ, ບໍລິສັດລາວຊັອບ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ເພື່ອເປັນການຈັດຕັ້ງປະຕິບັດແຜນພັດທະນາຂະແໜງການເງິນ ເປັນລະບົບດິຈິຕອນ, ກະຊວງການເງິນໄດ້ຮັບ ຮອງແຜນປະຕິຮູບການເງິນພາກລັດດ້ວຍການພັດທະນາລະບົບ GFIS Plus ໃນການກຽມຄວາມພ້ອມຂ້າມຜ່ານໄປສູ່ການຈັດຕັ້ງປະຕິບັດລະບົບ FMIS ໃນຕໍ່ໜ້າ, ໂດຍໄດ້ຮັບທຶນຊ່ວຍເຫຼືອທາງດ້ານງົບປະມານຈາກ EU ແລະ ທະນາ ຄານໂລກ.
ໃນວຽກງານພັດທະນາ GFIS Plus ໂດຍສະເພາະແມ່ນວຽກງານຫຼຸດຜ່ອນຂັ້ນຕອນການອະນຸມັດແມ່ນເປັນວຽກງານໜຶ່ງທີ່ສໍາຄັນໃນການຜັນຂະຫຍາຍວາລະແຫ່ງຊາດຈັດຕັ້ງປະຕິບັດງົບປະມານໃຫ້ປະຢັດມັດທະຍັດ, ພ້ອມທັງ ສອດຄ່ອງກັບກົດໝາຍວ່າດ້ວຍງົບປະມານ ແລະ ພາລະບົດບາດຂອງກົມງົບປະມານແຫ່ງລັດໃນການຫັນໄປສູ່ການຄຸ້ມຄອງມະຫາພາກດ້ວຍການສ້າງແຜນລະອຽດແຕ່ຫົວທີ ແລະ ລົງເລິກການກວດກາຫຼັງຈ່າຍງົບປະມານ.
ໃນໄລຍະຜ່ານມາຄະນະນໍາກະຊວງການເງິນ ໄດ້ມີຄວາມເອົາໃຈໃສ່ວຽກງານດັ່ງກ່າວໂດຍໄດ້ແຕ່ງຕັ້ງຄະນະຮັບຜິດຊອບ ປະກອບມີກົມງົບປະມານແຫ່ງລັດ, ຄັງເງິນແຫ່ງຊາດ, ກົມເຕັກໂນໂລຊີຂໍ້ມູນຂ່າວສານການເງິນ ແລະ ກົມນະໂຍບາຍການເງິນ, ຜ່ານການຈັດຕັ້ງປະຕິບັດມາຮອດປັດຈຸບັນການພັດທະນາລະບົບ GFIS Plus ໃນການຄຸ້ມຄອງງົບປະມານເປັນຕົ້ນ:ການແຈ້ງແຜນຜ່ານລະບົບ, ການອະນຸມັດ ແລະ ການສ້າງໃບຖອນເຊື່ອມຕໍ່ຂໍ້ມູນກັບລະບົບ RTIS ຂອງຄັງເງິນແຫ່ງຊາດຈົນໄປເຖິງຂະແໜງການຄັງເງິນແຫ່ງຊາດ ແລະ ຂະແໜງການລາຍຮັບເພື່ອໃຫ້ເປັນພື້ນຖານໃຫ້ຄັງເງິນແຫ່ງຊາດລົງເຮັດພາລະບົດບາດກວດກາກ່ອນຈ່າຍ.
ສຳລັບການຈັດຕັ້ງປະຕິບັດວຽກງານຫຼຸດຜ່ອນຂັ້ນຕອນການອະນຸມັດລາຍຈ່າຍງົບປະມານແມ່ນການຫັນໃຫ້ຫົວໜ່ວຍງົບປະມານມີສ່ວນຮ່ວມ ແລະ ມີຄວາມຮັບຜິດຊອບໃນວຽກງານເບີກຈ່າຍງົບປະມານ ໂດຍກົງກັບຄັງເງິນແຫ່ງຊາດ, ການຈັດຕັ້ງປະຕິບັດລະບົບດັ່ງກ່າວຈະເປັນເຄື່ອງມືຊ່ວຍໃນການຫຼຸດຜ່ອນຂອດຂັ້ນການຈັດຕັ້ງປະຕິບັດລາຍຈ່າຍງົບປະມານເຊິ່ງຈະເຮັດໃຫ້ສາມາດປະຢັດທັງເວລາ ແລະ ງົບປະມານບໍລິຫານລົງ.
ສ່ວນການເປີດທົດລອງນໍາໃຊ້ລະບົບ GFIS Plus ເລີ່ມແຕ່ງວດ 3 ປີ 2022ໂດຍໄດ້ກໍານົດເອົາກະຊວງການເງິນເປັນຫົວໜ່ວຍທົດລອງທໍາອິດ(ຫ້ອງການກະຊວງ, ກົມສ່ວຍສາອາກອນ, ກົມພາສີ ແລະ ຄັງເງິນແຫ່ງຊາດ) ໂດຍກໍານົດເອົາພາກລາຍຈ່າຍເງິນເດືອນ (ພາກ60) ແລະ ເງິນອຸດໜູນ (ພາກ 61) ໃນການເຮັດທົດລອງ, ສ່ວນໃນງວດ 4/2022 ຈະຂະຫຍາຍເພີ່ມຫົວໜ່ວຍທົດລອງ 9 ພາກສ່ວນ (ກະຊວງໂຍທາທິການ ແລະ ຂົນສົ່ງ, ກະຊວງສຶກສາທິການ ແລະ ກິລາ, ກະຊວງສາທາລະນະສຸກ, ກະຊວງກະສິກຳ ແລະ ປ່າໄມ້, ສະພາແຫ່ງຊາດ, ອົງການໄອຍາການ ປະຊາຊົນສູງສຸດ, ສານປະຊາຊົນສູງສຸດ, ກະຊວງແຮງງານ ແລະ ສະຫວັດດີການສັງຄົມ, ກະຊວງການເງິນ.
ພ້ອມນັ້ນໃຫ້ຂະຫຍາຍພາກລາຍຈ່າຍເຮັດທົດລອງເພີ່ມຄື: ເລີ່ມແຕ່ພາກລາຍຈ່າຍເງິນເດືອນ (ພາກ60), ເງິນອຸດໜູນ (ພາກ 61), ລາຍຈ່າຍບໍລິຫານ (ພາກ 62), ລາຍຈ່າຍເງິນດັດສົມ (ພາກ 63), ລາຍຈ່າຍຊື້ໃໝ (ພາກ 66)ພ້ອມທັງຊອກບາງຈຸດຄົງຄ້າງທີ່ຕ້ອງໄດ້ປັບປຸງໃຫ້ດີຂື້ນໃນຕໍ່ໄປ, ເພື່ອຈະກ້າວໄປເຮັດທົດລອງໃຫ້ຫຼາຍຫົວໜ່ວຍ ແລະ ນໍາໃຊ້ລາຍຈ່າຍຫຼາຍພາກຂຶ້ນອີກໃນງວດ 4/2022 ແລະ ກ້າວໄປສູ່ການນໍາໃຊ້ຕົວຈິງໃນປີ 2023 ນີ້.