ນຸ້ນ ທິດາຈັນ ນາງສາວລາວ 2021 ອວຍພອນວັນສ້າງຕັ້ງສະຫະພັນແມ່ຍິງລາວ

24

ສະຫງ່າງາມ ແລະ ເປັນແບບຢ່າງຂອງຄວາມເປັນແມ່ຍິງລາວ ສົມກັບຕໍາແໜ່ງນາງສາວລາວທີ່ສຸດ ສໍາລັບສາວງາມຄົນນີ້ ນຸ້ນ ທິດາຈັນ ວິສີສົມບັດ Miss Laos 2021 ໂດຍເນື່ອງໃນວັນສ້າງຕັ້ງສະຫະພັນແມ່ຍິງລາວ ຄົບຮອບ 67 ປີນີ້ ນຸ້ນ ກໍໄດ້ອອກມາໂພສຜ່ານ ເຟສບຸ໊ກສ່ວນຕົວຂອງຕົນເອງ ເພື່ອເປັນການສະເຫຼີມສະຫຼອງ ແລະ ອວຍພອນໃນວັນສໍາຄັນດັ່ງກ່າວຢ່າງຈິງໃຈ ແລະ ໜ້າຊື່ນຊົມ.

ໃນຂໍ້ຄວາມດັ່ງກ່າວນັ້ນ ນຸ້ນ ບອກວ່າ: “ ຊົມເຊີຍວັນສ້າງຕັ້ງສະຫະພັນແມ່ຍິງລາວ ຄົບຮອບ 67 ປີຢ່າງສຸດໃຈ, ວັນທີ 20 ກໍລະກົດ 1955 – 20 ກໍລະກົດ 2022 ຂ້າພະເຈົ້າໃນນາມນາງສາວລາວ 2021 ຕົວແທນໃຫ້ແກ່ແມ່ຍິງລາວ ຂໍສະແດງ ຄວາມຮູ້ບຸນຄຸນແດ່ແມ່ຍິງລາວທຸກຊົນເຜົ່າທົ່ວປະເທດໃນການທຸ່ມເທ, ດຸໝັ່ນ ແລະ ເປັນກຳລັງແຮງສຳຄັນໃນການຊ່ວຍເຫຼືອສັງຄົມ, ຂັບເຄື່ອນປະເທດຊາດ ແລະ ມີສ່ວນຮ່ວມໃນທຸກໜ້າວຽກໃຫ້ຈະເລີນກ້າວໜ້າ ”.


ໃນໂພສດັ່ງກ່າວນັ້ນກໍໄດ້ມີແຟນໆຂອງນຸ້ນເອງ ເຂົ້າມາສະແດງຄວາມຄິດເຫັນ ແລະ ຍ້ອງຍໍເປັນຈໍານວນຫຼວງຫຼາຍເລີຍ ສໍາລັບ ນຸ້ນ ທິດາຈັນ ວິສີສົມບັດ ປັດຈຸບັນອາຍຸໄດ້ 23 ປີ ຈົບການສຶກສາສົກຮຽນ 2020 – 2021 ທີ່ມະຫາວິທະຍາໄລແຫ່ງຊາດ & ສາຂາ: ການເງິນ – ການທະນາຄານ ( ໄດ້ບົດຈົບຊັ້ນດີເດັ່ນ ແລະ ນັກຮຽນດີເດັ່ນຄະແນນສະເລ່ຍ ( GPA: 3,5 ຂຶ້ນໄປ ). ພ້ອມນີ້, ນອກຈາກວຽກໃນວົງການບັນເທີງ ປັດຈຸບັນຍັງເປັນ External Auditor ຫຼື ນັກກວດສອບບັນຊີພາຍນອກ ເຮັດວຽກໃຫ້ກັບ ບໍລິສັດ Ernst&Young Lao ເຊິ່ງເປັນ 1ໃນ 4ບໍລິສັດ ຍັກໃຫຍ່ທາງດ້ານການກວດສອບດ້ວຍ.


ນຸ້ນເອງເປັນແມ່ຍິງຄົນໜຶ່ງທີ່ມີຄະຕິປະຈຳໃຈແມ່ນ: “ ກ້າທີ່ຈະລອງສິ່ງໃໝ່ໆ ທ່າມກາງ ຄວາມຢ້ານ ເພື່ອສັກກະຍະພາບ ແລະ ທັກສະທີ່ດີຂຶ້ນ ”, “ Dare to try new things in the face of fear for greater potential ” ແລະ ເປັນແມ່ຍິງລາວຜູ້ມີຈຸດເດັ່ນທາງດ້ານທັດສະນະຄະຕິ, ຄວາມຄິດ – ຄວາມສາມາດ ແລະ ມີຄວາມອ່ອນນ້ອມຖ່ອມຕົນ ພ້ອມຍັງເປັນທີ່ຮັກແພງຂອງຄົນອ້ອມຂ້າງດ້ວຍ.


ສຸດທ້າຍນີ້ຂ່າວບັນເທີງກໍຂໍຝາກທ່ານຜູ້ອ່ານທຸກຄົນ ໃຫ້ການຕິດຕາມທຸກໆຜົນງານ ທັງເກົ່າ – ໃໝ່ ແລະ ການເຄື່ອນໄຫວຂອງນ້ອງຄົນງາມ ແລະ ເກັ່ງຄົນນີ້ດ້ວຍ ຜ່ານຊ່ອງທາງເຟສບຸ໊ກສ່ວນຕົວ N’noon Thidachanhນັ້ນເອງ.