ໜ່ວຍແພດ “ຂະບວນລົດໄຟສັນຕິພາບ”ກອງທັບປົດປ່ອຍປະຊາຊົນຈີນເດີນທາງຮອດລາວມື້ນີ້

730

ທາງລົດໄຟມາ ລາວ-ຈີນໃກ້ຊິດກັນຫຼາຍຂຶ້ນຈາກປະເທດຄູ່ຮ່ວມມືຍຸດທະສາດ ການພົວພັນໃກ້ຊິດຍິ່ງທະວີຄູນຂຶ້ນ ມີການຊ່ວຍເຫຼືອ ເຊິ່ງກັນ ແລະກັນໃນຫຼາຍໆດ້ານເພີ່ມຂຶ້ນ ໂດຍສະເພາະ ສປ ຈີນແມ່ນໃຫ້ການຊ່ວຍເຫຼືອດ້ານການແພດແກ່ລາວມາຢ່າງຕໍ່ເນື່ອງ ນັບແຕ່ມີການລະບາດຂອງພະຍາດໂຄວິດ-19, ຫຼ້າສຸດນີ້ຂະບວນລົດໄຟສັນຕິພາບຈາກຈີນກໍ່ເຄື່ອນມາລາວ ເພື່ອພ້ອມກັນສ້ອມການກູ້ໄພສຸກເສີນຕໍ່ວຽກໄພພິບັດໃນຂົງເຂດປ້ອງກັນຊາດ.


ໜ່ວຍແພດເສນາຮັກແລະໜ່ວຍພະລາທິການ “ຂະບວນລົດໄຟສັນຕິພາບ” ຂອງກອງທັບປົດປ່ອຍປະຊາຊົນຈີນໄດ້ເດີນທາງຮອດສະຖານີລົດໄຟບໍ່ເຕັນໃນຕອນເຊົ້າຂອງວັນທີ 19 ກໍລະກົດນີ້ ແລະພວມເດີນທາງມຸ່ງໜ້າສູ່ນະຄອນຫຼວງວຽງຈັນດ້ວຍລົດໄຟລາວ-ຈີນໂດຍຜ່ານສະຖານີນະຄອນຫຼວງວຽງຈັນ ເພື່ອຮ່ວມກັບກອງທັບປະຊາຊົນລາວ ຈັດການຝຶກຊ້ອມຮ່ວມກ່ຽວກັບການຊ່ວຍເຫຼືອທາງການແພດດ້ານມະນຸດສະທຳ ກໍຄືກິດຈະກຳການບໍລິການທາງການແພດ “ຂະບວນລົດໄຟສັນຕິພາບ 2022” ໃນລະຫວ່າງວັນທີ 19 ຫາ 29 ກໍລະກົດນີ້.


“ຂະບວນລົດໄຟສັນຕິພາບ 2022” ຄັ້ງນີ້, ມີຫົວຂໍ້ວ່າ “ການຊ່ວຍເຫຼືອທາງການແພດດ້ານມະນຸດສະທຳເພື່ອກູ້ໄພພິບັດລົມພາຍຸໄຕ້ຝຸ່ນ”. ພາຍຫຼັງການຝຶກຊ້ອມຄັ້ງນີ້ສິ້ນສຸດລົງແລ້ວ, ໜ່ວຍແພດ “ຂະບວນລົດໄຟສັນຕິພາບ” ຍັງຈະໃຫ້ການບໍລິການດ້ານການແພດເປັນເວລາ 2 ວັນຢູ່ໂຮງໝໍ 103 ກອງທັບ.

ນີ້ເປັນຄັ້ງທີ 4 ແລ້ວທີ່ກອງທັບປົດປ່ອຍປະຊາຊົນຈີນ ສົ່ງໜ່ວຍແພດ “ຂະບວນລົດໄຟສັນຕິພາບ” ມາບໍລິການຢູ່ລາວ ແລະຄັ້ງນີ້ໄດ້ສົ່ງໜ່ວຍແພດເສນາຮັກແລະໜ່ວຍພະລາທິການທັງໝົດ 149 ຄົນມາປະຕິບັດໜ້າທີ່ຮ່ວມກັບຝ່າຍລາວ.


ຕາມຂ່າວແຈ້ງວ່າ, ກິດຈະກຳຄັ້ງນີ້ເປັນການເສີມຂະຫຍາຍແລະສືບຕໍ່ຈາກພາລະກິດຮວ່ມກັນລະຫວ່າງສອງກອງທັບລາວແລະຈີນໃນ“ຂະບວນລົດໄຟສັນຕິພາບ” ປີ 2017 ແລະ ປີ 2019.


Cr: CRI