ຕາມນີ້! ອົົດສະຕາລີ ຈະບໍ່ຮັບແຮງງານຈາກຕ່າງປະເທດ ເຂົ້າເຮັດວຽກດ້ານກະສິກຳ

35

ການຫາວຽກເຮັດງານທຳຢູ່ຕ່າງປະເທດ ເປັນຄວາມຫວັງຂອງບັນດາແຮງງານ ໃນນັ້ນລວມທັງແຮງງານລາວ ເຊິ່ງໄລຍະຫຼັງມານີ້ມັກມີຂ່າວປະກົດໃນສື່ສັງຄົມອອນລາຍກ່ຽວກັບການໄປເຮັດວຽກໃນຂະແໜງກະສິກຳຢູ່ຫຼາຍປະເທດ ແລະອົດສະຕຣລີກໍ່ເປັນປະເທດທີ່ມີການກ່າວເຖິງຫຼາຍ ເຖິງຢ່າງໃດກໍ່ຕາມຂໍ້ມູນຈາກສະຖານທູດອົດສະຕາລີ ເປີດເຜີຍວ່າ ລັດຖະບານອົດສະຕາລີ ບໍ່ມີນະໂຍບາຍຮັບເອົາແຮງງານຈາກຕ່າງປະເທດເຂົ້າໄປເຮັດວຽກດ້ານກະສິກຳ ຢູ່ພາຍໃນປະເທດ ໂດຍຜ່ານໂຄງການວິຊ່າກະສິກຳ.

ໂດຍອີງຕາມບົດບັນທຶກຜົນຂອງການພົບປະກັນລະຫວ່າງ ທ່ານ ນາງ ໃບຄຳ ຂັດທິຍະລັດຖະມົນຕີ ກະຊວງກະຊວງແຮງງານ ແລະ ສະຫວັດດີການສັງຄົມ (ຮສສ ) ກັບ ທ່ານ Paul Kelly ເອກອັກຄະລັດຊະທູດອົດສະຕາລີ ປະຈຳ ສປປລາວ, ໃນວັນທີ 7 ກໍລະກົດ 2022 ທີ່ຜ່ານມາ, ຂະນະທີ່ ທ່ານລັດຖະມົນຕີກະຊວງ ຮສສ ໄດ້ຕ້ອນຮັບການເຂົ້າພົບປະ ແລະ ປຶກສາຫາລືວຽກງານຂອງທ່ານ ເອກອັກຄະລັດສະທູດອົດສະຕາລີ ປະຈຳ ສປປ ລາວ ພ້ອມຄະນະ.

ຊຶ່ງທ່ານທູດໄດ້ຖືໂອກາດນີ້ ແຈ້ງຂ່າວກ່ຽວກັບ ວິຊ່າກະສິກຳ ທີ່ຈະມີແຜນທົດລອງເອົາແຮງງານລາວໄປເຮັດວຽກຢູ່ປະເທດ ອົດສະຕາລີ ນັ້ນ ພາຍຫລັງມີການເລືອກຕັ້ງໃນສອງເດືອນຜ່ານມາ ລັດຖະບານຊຸດໃໝ່ ອົດສະຕຣາລີ ໄດ້ຍົກເລີກນະໂຍບາຍ ກ່ຽວກັບ ໂຄງການວິຊ່າກະສິກຳ ໝາຍວ່າ ຈະບໍ່ມີການຮັບເອົາແຮງງານຈາກຕ່າງປະເທດເຂົ້າໄປເຮັດວຽກດ້ານກະສິກຳຢູ່ ອົດສະຕາລີ ອີກ.

ແນວໃດກໍ່ຕາມ ໃນເມື່ອເປັນນະໂຍບາຍຂອງລັດຖະບານຊຸດໃໝ່ ຂອງອົດສະຕາລີ ກະຊວງ ກໍເຂົ້າໃຈ ແລະ ຫວັງວ່າຈະມີການຮ່ວມມືໃນການສົ່ງແຮງງານລາວໄປອອກແຮງງານຢູ່ປະເທດ ອົດສະຕາລີ ໃນຮູບການອື່ນ ເພື່ອຊ່ວຍໃຫ້ແຮງງານລາວສາມາດເກັບກ່ຽວປະສົບການ, ຍົກສູງໃນການພັດທະນາສີມືແຮງງານ ແລະ ການສ້າງລາຍໄດ້ມາໃຫ້ແກ່ຄອບຄົວ ເປັນການປັບປຸງຊີວິດການເປັນຢູ່ຂອງຜູ້ອອກ ແຮງງານໃຫ້ດີຂຶ້ນ.

ຈາກການພົບປະຄັ້ງນີ້, ທັງສອງປະເທດ ແມ່ນຍັງບໍ່ໄດ້ມີນະໂຍບາຍໃນການທີ່ຈະສົ່ງແຮງງານລາວໄປເຮັດວຽກດ້ານກະສິກຳ ຢູ່ປະເທດ ອົດສະຕາລີ ແລະ ຍັງບໍ່ໄດ້ມີການເຊັນ MOU ໃນການຈະຈັດສົ່ງເທື່ອ, ເປັນພຽງການຫາລືເບື້ອງຕົ້ນ, ແຕ່ໃນຄວາມເປັນຈິງຂອງສັງຄົມ ແມ່ນໄດ້ມີບໍລິສັດ ຈຳນວນໜຶ່ງ ອອກໂຄສະນາ ກ່ຽວກັບການຈັດສົ່ງແຮງງານ ແລະ ຮັັບແລ່ນເອກະສານເພື່ອໄປເຮັດວຽກຢູ່ປະເທດດັ່ງກ່າວ, ສະນັ້ນ ທາງກະຊວງ ຈຶ່ງຝາກເຕືອນພໍ່ແມ່ປະຊາຊົນລາວທຸກທົ່ວໜ້າ ຫຼື ແຮງງານລາວທີ່ກຳລັງຈະໄປເຮັດວຽກປະເທດອົດສະຕຣາລີ ແມ່ນໃຫ້ສຶກສາຂໍ້້ມູນໃຫ້ລະອຽດ ເພາະປັດຈຸບັນ ການຮ່ວມມືກັບປະເທດປາຍທາງ ໃນການຈະຈັດສົ່ງແຮງງານໄປເຮັດວຽກຢ່າງເປັນທາງການນັ້ນ ແມ່ນຍັງບໍ່ມີເທື່ອ, ທັງນີ້ກໍເພື່ອບໍ່ໃຫ້ຕົກເປັນເຫຍື່ອຂອງການຈ້າງງານແບບຜິດກົດໝາຍ ແລະ ບໍ່ໄດ້ການປົກປ້ອງເທົ່າທີ່ຄວນ.

ຂ່າວຈາກ: ກະຊວງແຮງງານ ແລະສະຫວັດດີການສັງຄົມ