ວັນທີ 12 ກໍລະກົດ 2022, ກົມການຄ້າພາຍໃນ, ກະຊວງອຸດສາຫະກຳ ແລະ ການຄ້າ (ອຄ) ໄດ້ຈັດກອງປະຊຸມຮ່ວມກັບບັນດາພະແນກອຸດສາຫະກຳ ແລະການຄ້າແຂວງ, ນະຄອນຫຼວງ ໃນທົ່ວປະເທດຜ່ານ ວີດີໂອ ທາງໄກ ເພື່ອປຶກສາຫາລື, ແລກປ່ຽນບົດຮຽນ ແລະ ເອກະພາບທິດທາງໃນການແກ້ໄຂລາຄາສິນຄ້າ ແລະ ຄ່າບໍລິການທີ່ເພີ່ມສູງ ໂດຍການເປັນປະທານຂອງ ທ່ານ ພູວຽງ ພົງສາ ຫົວໜ້າກົມການຄ້າພາຍໃນ ພ້ອມດ້ວຍຮອງຫົວໜ້າກົມ ແລະ ພາກສ່ວນກ່ຽວຂ້ອງເຂົ້າຮ່ວມ.
ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອຜ່ານຮ່າງລາຍງານສະພາບເສດຖະກິດ, ການສະໜອງ ແລະ ວິທີແກ້ໄຂລາຄາສິນຄ້າ ແລະ ຄ່າບໍລິການທີ່ເພີ່ມຂຶ້ນສູງ ພ້ອມທັງປຶກສາຫາລືແລກປ່ຽນ ແລະ ສະເໜີຄວາມເປັນເອກະພາບຕໍ່ກັບວີທີແກ້ໄຂລາຄາສິນຄ້າເພີ່ມຂຶ້ນສູງ ໂດຍສະເພາະຕິດພັນກັບພາລະບົດບາດຂອງກະຊວງ ອຄ.
ໂອກາດດັ່ງກ່າວ, ທ່ານ ພູວຽງ ພົງສາ ໄດ້ລາຍງານໃຫ້ຮູ້ກ່ຽວກັບສະພາບເສດຖະກິດຂອງໂລກໃນປັດຈຸບັນວ່າ ທົ່ວໂລກແມ່ນພົບພາວະວິກິດການທາງດ້ານເສດຖະກິດຖົດຖອຍນັບແຕ່ປີ 2019 ເປັນຕົ້ນມາ, GDP ຂອງໂລກໃນປີ 2022 ຢູ່ທີ່ 3,6% ຫຼຸດລົງຈາກ 6,1% ໃນປີ 2021. ໃນນັ້ນ, ສະຫະລັດອາເມລິກາ ຫຼຸດລົງຈາກ 5,7% ມາເປັນ 3,7%, ເອີຣົບ ຈາກ 5,3% ມາເປັນ 2,8% ແລະ ສປ ຈີນແມ່ນ 8,1% ມາເປັນ 4,4%, ສ່ວນຍີ່ປຸ່ນ ເພີ່ມຂຶ້ນຈາກ 1,6% ມາເປັນ 2,4. ໃນຂະນະດຽວກັນນັ້ນ, ອັດຕາເງິນເຟີ້ຂອງໂລກກໍ່ມີແນວໂນ້ມເພີ່ມຂຶ້ນເຊັ່ນດຽວກັນ ຄື: ໃນປີ 2021 ຢູ່ທີ່ 3,4% ເພີ່ມຈາກ 1,94% ໃນປີ 2020.
ໃນປັດຈຸບັນ ການລະບາດຂອງເຊື້ອພະຍາດໂຄວິດ-19 ແມ່ນຜ່ອນຄາຍ ແລະ ບັນດາປະເທດຕ່າງໆໃນທົ່ວໂລກກໍໄດ້ກຽມຄວາມພ້ອມແກ້ໄຂບັນຫາຫຍຸ້ງຍາກທາງດ້ານເສດຖະກິດທີ່ເກີດຂຶ້ນໃຫ້ກັບມາຢູ່ສະພາບການປົກກະຕິໂດຍໄວ, ແຕ່ໃນທາງກັບກັນສະຖານະການຂອງໂລກຍັງພົບບັນຫາການປະຕິບັດການທະຫານພິເສດຂອງຣັດເຊຍຕໍ່ຢູເຄນ ເຮັດໃຫ້ຫຼາຍປະເທດຂວໍ້າບາດດ້ານເສດຖະກິດຣັດເຊຍ ໂດຍສະເພາະສະຫະພາບເອີຣົບ ແລະ ສະຫະລັດອາເມລິກາ, ບັນຫາດັ່ງກ່າວໄດ້ສ້າງແຮງກົດດັນ ເຮັດໃຫ້ເກີດວິກິດການທາງດ້ານພະລັງງານ ແລະ ສະບຽງອາຫານທີ່ຮຸນແຮງຂຶ້ນ, ການຢຸດສົ່ງພະລັງງານນໍ້າມັນເຊື້ອໄຟຂອງຣັດເຊຍ ໃຫ້ບັນດາປະເທດສະມາຊິກເອີຣົບ ບວກກັບການບໍ່ເພີ່ມກໍາລັງການຜະລິດຂອງບັນດາປະເທດຜູ້ສະໜອງນໍ້າມັນເຊື້ອໄຟໃນຕ່ອງໂສ້ການສະໜອງຂອງໂລກ ເຮັດໃຫ້ການຊອກຫາແຫຼ່ງພະລັງງານເຊື້ອໄຟດັ່ງກ່າວມີຄວາມຈໍາກັດ ແລະ ໃນເດືອນ ພຶດສະພາ 2022 ເຮັດໃຫ້ມີຫຼາຍກວ່າ 30 ປະເທດທົ່ວໂລກນຳໃຊ້ມາດຕະການຈຳກັດການສົ່ງອອກສະບຽງອາຫານ.
ທ່ານ ພູວຽງ ພົງສາ ກ່າວຕື່ມວ່າ: ບັນຫາດັ່ງກ່າວໄດ້ສົ່ງຜົນກະທົບຕໍ່ ສປປ ລາວ ທາງກົງ ແລະ ທາງອ້ອມ ເຖິງແມ່ນວ່າເສດຖະກິດ ຫຼື GDP ຂອງ ສ ປປ ລາວ ຍັງຢູ່ໃນລະດັບດີຂຶ້ນເລັກໜ້ອຍ 4,5% ປີ 2022 ເມື່ອສົມທຽບ ປີ 2021 ທີ່ 3,5% ເຫັນວ່າ ເພີ່ມຂຶ້ນ 1%. ໃນຂະນະອັດຕາເງິນເຟີ້ແມ່ນມີທ່າອ່ຽງເພີ່ມຂຶ້ນສູງ ຢູ່ໃນລະດັບ 9% ໃນໄຕມາດ 1 ປີ 2022 ເມື່ອທຽບໄລຍະດຽວກັນ ປີ 2021 ເຫັນວ່າເພີ່ມຂຶ້ນ 5,25% ແລະ ເພີ່ມຂຶ້ນສູງ ແລະ ກະໂດດເມື່ອທຽບໃນຫຼາຍປີຜ່ານມາ ສົ່ງຜົນເຮັດໃຫ້ສະພາບການຜະລິດ, ດຸນການຄ້າ, ການສະໜອງ ແລະ ລາຄາສິນຄ້າພາຍໃນປະເທດບໍ່ມີສະຖຽນລະພາບ, ມີຄວາມຫຍຸ້ງຍາກ ແລະ ສິ່ງທ້າທາຍຫຼາຍດ້ານທີ່ຕ້ອງໄດ້ແກ້ໄຂ ໂດຍສະເພາະການແກ້ໄຂບັນຫາລາຄາສິນຄ້າ ແລະ ຄ່າບໍລິການສູງ ທີ່ຕິດພັນກັບຂະແໜງ ອຄ.
ທ່ານ ອານຸສັກ ອ່ອນສະຫວັດ ຫົວໜ້າພະແນກຄົ້ນຄວ້າ, ວິໄຈ ແລະ ພະຍາກອນ, ກົມການຄ້າພາຍໃນ ໄດ້ລາຍງານກ່ຽວກັບການນໍາເຂົ້າ-ສົ່ງອອກ, ການສະໜອງ ແລະ ລາຄາສິນຄ້າ ແລະ ສະເໜີທິດທາງແກ້ໄຂໃນຕໍ່ໜ້າ ເຊິ່ງທ່ານໄດ້ລາຍງານ ການຄິດໄລ່, ກໍານົດໂຄງປະກອບລາຄາ ແລະ ແຈ້ງການຈັດຕັ້ງປະຕິບັດສິນຄ້າຄວບຄຸມ, ລວມເຖິງບາງລາຍການສິນຄ້າທີ່ີບໍ່ນອນຢູ່ໃນບັນຊີຄວບຄຸມ ໃນບັນຊີ ຂ ໂດຍສະເພາະສິນຄ້າຈໍາເປັນ ເຊັ່ນ: ນໍ້າປູ, ນໍ້າປາ, ໝີ່, ນໍ້າມັນພືດ, ນໍ້າຕານ, ແປ້ງນົວ ເປັນຕົ້ນ ແຕ່ມີການເໜັງຕີງເພີ່ມຂຶ້ນສູງ ແລະ ຕໍ່ເນື່ອງ ທີ່ສົ່ງຜົນກະທົບຕໍ່ຊີວິດການເປັນຢູ່ຂອງປະຊາຊົນ ໂດຍສະເພາະການກໍານົດລາຄາ CIF ນໍາເຂົ້າເພື່ອຈໍາໜ່າຍພາຍໃນ ຕິດພັນກັບອັດຕາແລກປ່ຽນ ແລະ ເງິນຕາຕ່າງປະເທດໃນການຊໍາລະ.
ນອກຈາກນີ້, ກອງປະຊຸມຍັງໄດ້ຮັບຟັງການລາຍງານການຈັດຕັ້ງປະຕິບັດ ແຈ້ງການສະບັບເລກທີ 0519/ກຄພນ, ລົງວັນທີ 17 ມິຖຸນາ 2022 ວ່າດ້ວຍການລົງຕິດ ຕາມ, ກວດກາ ການຈໍລະຈອນນໍ້າມັນເຊື້ອໄຟຈາກສາງປໍ້ານໍ້າມັນເຊື້ອໄຟ ແລະ ແຈ້ງການ ສະບັບເລກທີ 0768/ອຄ, ລົງວັນທີ 17 ມິຖຸນາ 2022 ວ່າດ້ວຍການຕິດຕາມ, ກວດກາການແຈກຢາຍສິນຄ້າອຸປະໂພກ-ບໍລິໂພກ, ການຈັດຕັ້ງປະຕິບັດກົນໄກ, ມາດຕະການ ແລະ ລະບຽບການຕ່າງໆຂອງຄະນະຄຸ້ມຄອງລາຄາສິນຄ້າ ແລະ ຄ່າບໍລິການ ເພື່ອຄຸ້ມຄອງລາຄາສິນຄ້າ ແລະ ຄ່າບໍລິການ ທີ່ມີຫຼາຍພາກສ່ວນ ຫຼື ຂະແໜງການຕ່າງໆກ່ຽວຂ້ອງຮັບຜິດຊອບ, ການຈັດຕັ້ງປະຕິບັດວຽກງານຊຸກຍູ້ສົ່ງເສີມການຜະລິດພາຍໃນ, ຄຸ້ມຄອງການນຳເຂົ້າ-ສົ່ງອອກ ເພື່ອແກ້ໄຂການສະໜອງສິນຄ້າທີ່ຜະລິດໄດ້ພາຍໃນທົດແທນສິນຄ້ານຳເຂົ້າ. ນອກນີ້, ຍັງມີພະແນກ ອຄ ນະຄອນຫຼວງ ແລະ ແຂວງ ສະເໜີພາບຄວາມຫຍຸ້ງຍາກທີ່ເກີດຂຶ້ນ ເພື່ອໃຫ້ຂັ້ນເທິງມີທິດທາງໃນການແກ້ໄຂ.
