ເປີດໂອກາດໃຫ້ໄວໜຸ່ມໄດ້ສະແດງຄວາມສາມາດແລ້ວ ອີກໜຶ່ງເວທີ Face of Laos 2022

10

ອີກເວທີໜຶ່ງທີ່ເປີດໂອກາດໃຫ້ໄວໜຸ່ມທັງຍິງ ແລະ ຊາຍ ໄດ້ເຂົ້າຮ່ວມປະກວດ ເພື່ອສະແດງສັກກະຍະພາບ, ຄວາມຄິດ, ຄວາມສາມາດ ແລະ ໄຫວພິບຕ່າງໆທີ່ມີ ເພື່ອສົ່ງເປັນຕົວແທນຂອງປະເທດລາວ ເຂົ້າຮ່ວມປະກວດໃນສາກົນທີ່ ສ.ເກົາຫຼີ ໃນ Face of Laos 2022 ນັ້ນເອງ.

ໂດຍທາງເພຈຂອງ Face of Laos 2022 ກໍໄດ້ຂໍເຊີນບັນດານາງແບບ – ຊາຍແບບລາວ ທີ່ມາພ້ອມຄວາມສາມາດ ແລະ ຄວາມກ້າສະແດງອອກ ຮ່ວມຄັດເລືອກແບບຕົວຕໍ່ຕົວ ກັບໂຄງການປະກວດ Face of Laos 2022 ເພື່ອເປັນຕົວແທນປະເທດລາວເຂົ້າປະກວດໃນ Face of Asia 2022 – Asia Model Festival ທີ່ ສ.ເກົາຫຼີ.

ໃນຮອບຄັດເລືອກຈະຈັດຂຶ້ນໃນວັນທີ 9 ກໍລະກົດ 2022 ( ພຽງ 1 ວັນເທົ່ານັ້ນ ) ເວລາ 10:00 – 17:00 ໂມງ ທີ່ສູນການຄ້າ Naga Mall ຊັ້ນ 2, ເຂົ້າທາງສູນການຄ້າ Parkson.

ທາງກອງປະກວດ Face of Laos ແມ່ນຈະຄັດເລືອກເອົາບໍ່ເກີນ 20 ຄົນ ທັງນາງແບບ ແລະ ຊາຍແບບ ( ແບບບໍ່ກຳນົດວ່າຈະເປັນຍິງ 10 ຫຼື ຊາຍ 10 ) ເພື່ອຜ່ານເຂົ້າຮອບ 20 ຄົນສຸດທ້າຍ ໃນ Final Walk ຂອງ Face of Laos 2022 ທີ່ຈະປະກວດໃນວັນທີ 31 ກໍລະກົດ ທີ່ຈະມາເຖິງນີ້.

ສໍາລັບເງື່ອນໄຂຂອງຜູ້ເຂົ້າສະໝັກໃນຄັ້ງນີ້ ແມ່ນໄດ້ກໍານົດເປັນຜູ້ທີ່ມີອາຍຸ 18 – 28 ປີ ເປັນເພດຍິງ ຫຼື ຊາຍໂດຍກຳເນີດ ເຊິ່ງໃນນີ້ແມ່ຍິງແມ່ນຕ້ອງສູງ 170 ຊັງຕີແມັດຂຶ້ນໄປ ແລະ ສໍາລັບຜູ້ຊາຍ ແມ່ນຕ້ອງສູງ 178 ຊັງຕີແມັດຂຶ້ນໄປ ແລະ ທີ່ສໍາຄັນແມ່ນສາມາດສື່ສານພາສາອັງກິດໄດ້ ຍິ່ງເປັນການດີ ( ເພາະຈະມີ ຄວາມຈຳເປັນໃນການສື່ສານກັບບັນດານາງແບບ – ຊາຍແບບ ປະເທດອື່ນໆດ້ວຍ ).

ໜຸ່ມສາວນາງແບບ – ຊາຍແບບຜູ້ທີ່ມີຄວາມສົນໃຈໃນການຕາມຫາຄວາມຝັນຂອງຕົນເອງ ກໍສາມາດສອບຖາມເອົາໃບສະໝັກລ່ວງໜ້າ ພ້ອມຕິດຄັດຮູບມູມໃກ້ ( Head Shot ), ເຄິ່ງຕົວ ແລະ ເຕັມຕົວ ( ຮູບຢືນ ) ໂດຍສາມາດສົ່ງເປັນ file ໃຫ້ທີມງານ Face of Laos ໄດ້ເລີຍ.

ຜູ້ທີ່ສົນໃຈຢາກເຂົ້າຮ່ວມ Audition ແລະ ຂໍໃບສະໝັກໂດຍການ Inbox ໄດ້ທີ່ page: Face of Laos ຫຼື ສອບຖາມໄດ້ທີ່ whatsapp: 020 5960 1198 ນັ້ນເອງ.

ໝາຍເຫດ: ໃນການສົ່ງໃບສະໝັກລ່ວງໜ້າຈະມີສິດເຂົ້າ Audition ກ່ອນ ແລະ ມີສິດຖືກ Pre-Selecting ຈາກຄະນະກຳມະການກ່ອນ, ສາມາດມາລົງທະບຽນທີ່ວັນງານໄດ້ ໃນວັນຄັດເລືອກ ທີ 9 ກໍລະກົດ 2022, ແຕ່ຜູ້ເຂົ້າສະໝັກຈະຕ້ອງການລໍຖ້າເຂົ້າຄິວຕາມຫຼັງຄົນທີ່ສົ່ງໃບສະໝັກກ່ອນ.

ນ້ອງໆຜູ້ມີຄວາມຝັນຢາກເປັນນາງແບບ – ຊາຍແບບ ກໍບໍ່ຄວນລໍຊ້າ ແລະ ປ່ອຍໃຫ້ໂອກາດດີໆແບບນີ້ຫຼຸດມືໄປ ເພາະມີໜຶ່ງຈະມີການຈັດປະກວດພຽງຄັ້ງດຽວເທົ່ານັ້ນ ຜູ້ທີ່ມີຄວາມພ້ອມກໍຟ້າວກຽມສະໝັກເລີຍ ແລະ ທີມຂ່າວບັນເທີງກໍຂໍເປັນກໍາລັງໃຈໃຫ້ ສໍາລັບຜູ້ທີ່ມີຄວາມຝັນ ແລະ ເດີນຕາມມັນ ເຊື່ອວ່າໄວໜຸ່ມລາວ ກໍມີຄວາມຮູ້ ແລະ ຄວາມສາມາດບໍ່ດ້ອຍກວ່າຊາດໃດໃນໂລກຢ່າງແນ່ນອນເລີຍ. ທັງ  ນີ້, ພ້ອມທັງຍັງເປັນການໄປເຜີຍແຜ່ຄວາມເປັນລາວໃນສາກົນໄດ້ຮັບຮູ້ເຖິງຄວາມງົດງາມທໍາມະຊາດ, ວັດທະນະທໍາ ແລະ ສະຖານທີ່ທ່ອງທ່ຽວທີ່ສວຍງາມດ້ວຍ.

[ ຮູບ: Face of Laos ]