ເຢຍລະມັນ ຫັນມານຳໃຊ້ຖ່ານຫີນຫຼາຍຂຶ້ນ ຫຼັງ ຣັດເຊຍ ຫຼຸດປະລິມານສົ່ງແກັສໃຫ້

53

ສຳນັກຂ່າວຕ່າງປະເທດລາຍງານວ່າ ກະຊວງພະລັງງານຂອງ ເຢຍລະມັນ ອອກຖະແຫຼງການລະບຸວ່າ ເຢຍລະມັນ ຈຳເປັນຕ້ອງກັບໄປຜະລິດກະແສໄຟຟ້າຈາກຖ່ານຫີນເພີ່ມຂຶ້ນ ເປັນການປະຢັດການໃຊ້ແກັສທຳມະຊາດ ຫຼັງຈາກທີ່ ບໍລິສັດ ແກັສປຣອມຂອງຣັດເຊຍ ປະກາດຫຼຸດປະລິມານການຈັດສົ່ງແກັສໃຫ້ສະຫະພາບເອີຣົບ.

ກ່ອນໜ້ານີ້, ລັດຖະບານເຢຍລະມັນ ມີເປົ້າໝາຍຍົກເລີກການນຳໃຊ້ພະລັງງານຈາກຖ່ານຫີນໃຫ້ໄດ້ປີ 2030 ແຕ່ເພື່ອປ້ອງກັນຄວາມສ່ຽງທີ່ອາດຈະເກີດຂຶ້ນໃນລະດູໜາວຈະເຖິງນີ້ ຈຳເປັນຕ້ອງນຳໃຊ້ພະລັງງານຈາກຖ່ານຫີນເພີ່ມຂຶ້ນ ເພື່ອຫຼຸດການນຳໃຊ້ແກັສລົງໃນໄລຍະນີ້.

ທັງນີ້, ເມື່ອວັນທີ 15 ມິຖຸນາຜ່ານມາ ບໍລິສັດ Gazprom ຂອງຣັດເຊຍ ໄດ້ແຈ້ງເຖິງທາງການເຢຍລະມັນ ວ່າຈະຫຼຸດປະລິມານການສົ່ງແກັສທຳມະຊາດໃຫ້ເຢຍລະມັນ ຈາກ 167 ລ້ານແມັດກ້ອນຕໍ່ວັນ ລົງມາເຫຼືອພຽງ 67 ລ້ານແມັດກ້ອນຕໍ່ວັນ ເນື່ອງຈາກຂັດຂ້ອງທາງເຕັກນິກ ເພາະບໍລິສັດຊີເມັນຂອງເຢຍລະມັນບໍ່ສາມາດສ້ອມແປງລະບົບ ຄອມເພຣສເຊີ ທີ່ສະຖານີ ປໍໂຕມາຢາ ໄດ້ທັນຕາມກຳນົດເວລາ.

ປັດຈຸບັນທໍ່ສົ່ງແກັສ Nord Stream 1 ຍັງເປັນໜຶ່ງໃນສອງຊ່ອງທາງຫຼັກໃນການສົ່ງແກັສຈາກຣັດເຊຍ ໄປຍັງສະຫະພາບເອີຣົບ ລອດຜ່ານທະເລດຳໄປຍັງທິດຕາເວັນຕົກສ່ຽງເໜືອ ຂອງເຢຍລະມັນ.