ນາຍບ້ານໆ ນາເຕີຍ ພໍໃຈ ບ້ານຈັດສັນໃໝ່ ມີສິ່ງອຳນວຍຄວາມສະດວກຄົບ ຂໍໃຫ້ພໍ່ແມ່ປະຊາຊົນບົວລະບັດຮັກສາ

263

ພາຍຫຼັງທີ່ໄດ້ລົງມືຈັດຕັ້ງປະຕິບັດ ໂຄງການກໍ່ສ້າງບ້ານຈັດສັນ 4 ບ້ານ ໃນ 3 ແຂວງ ທີ່ຖືກຜົນກະທົບຈາກໂຄງການ ກໍ່ສ້າງທາງລົດໄຟ ລາວ-ຈີນ ຄື: ບ້ານນາເຕີຍ ເມືອງນ້ໍາທາ ແຂວງຫຼວງນ້ໍາທາ, ບ້ານນາໝໍ້ໃຕ້ ເມືອງນາໝໍ້; ບ້ານນາຄົກ ເມືອງງາ ແຂວງອຸດົມໄຊ ແລະ ບ້ານບວມອໍ້ ເມືອງຊຽງເງິນ ແຂວງຫຼວງພະບາງ.

ບ້ານຈັດສັນໃໝ່ ນາເຕີຍ

ເຊິ່ງສະເພາະຈຸດບ້ານນາເຕີຍ ເມືອງນໍ້າທາ ແຂວງຫຼວງນນໍ້າທາ ແມ່ນນຳໃຊ້ເນື້ອທີ່ທັງໝົດ 19,6 ເຮັກຕາ ມີຈຳນວນ 159 ຫຼັງຄາເຮືອນ ໃນນັ້ນ: ຂະໜາດໃຫຍ່ມີ 76 ຫຼັງ, ຂະໜາດກາງ ມີ 45 ຫຼັງ ຂະໜາດນ້ອຍ 38 ຫຼັງ.

ຮອງນາຍົກ ສອນໄຊ ສີພັນດອນ ລົງຢ້ຽມຢາມເຮືອນໃນບ້ານຈັດສັນໃໝ່ ນາເຕີຍ

ເນື່ອງໃນໂອກາດເຂົ້າຮ່ວມພິທີມອບ-ຮັບໂຄງການຊ່ວຍເຫຼືອລ້າ ກໍ່ສ້າງບ້ານຈັດສັນໃຫ້ແກ່ປະຊາຊົນ 4 ບ້ານ ທີ່ຖືກຜົນກະທົບຈາກໂຄງການ ກໍ່ສ້າງທາງລົດໄຟ ລາວ-ຈີນ ຂຶ້ນ, ທີ່ບ້ານນາເຕີຍ ເມືອງຫຼວງນໍ້າທາ ແຂວງຫຼວງນໍ້າທາ ໃນວັນທີ 29 ພຶດສະພາ 2022 ຜ່ານມາ ທ່ານ ນາງ ໃສ ຈະເລີນສີ ນາຍບ້ານໆນາເຕີຍ ເມືອງນໍ້າທາ ແຂວງຫຼວງນໍ້າທາ ໄດ້ໃຫ້ສຳພາດຕໍ່ທີມຂ່າວເສດຖະກິດ-ການຄ້າ ວ່າ: ທາງອົງການປົກຄອງບ້ານ ແລະ ພໍ່ແມ່ປະຊາຊົນແມ່ນມີຄວາມດີໃຈ ແລະ ພູມໃຈ ໃນການຮັບບ້ານຈັດສັນໃຈຄັ້ງນີ້ ເນື່ອງຈາກບ້ານຈັດສັນໃໝ່ນີ້ແມ່ນມີເສັ້ນທາງເຂົ້າບ້ານທີ່ສະດວກສະບາຍ, ມີເຮືອນຢູ່ທີ່ມີມາດຕະຖານຖາວອນ, ມີນໍ້າປະປາ, ໄຟຟ້າ, ໂຮງຮຽນ, ສຸກສາລາ ແລະ ຫ້ອງການບ້ານ ເຊິ່ງສະດວກສະບາຍໃຫ້ແກ່ປະຊາຊົນ ແລະ ບ້ານຈັດສັນແຫ່ງໃໝ່ນີ້ແມ່ນຈະສ້າງຄວາມອຳນວຍຄວາມສະດວກໃຫ້ປະຊາຊົນ ກໍ່ຄືລູກໆຫຼານໆໄດ້ ເພາະວ່າມີໂຮງຮຽນຢູ່ພາຍໃນບ້ານ ທຽບໃສ່ບ້ານເກົ່າທີ່ໄດ້ຮັບຜົນກະທົບຈາກໂຄງການກໍ່ສ້າງທາງລົດໄຟກໍ່ຖືວ່າດີຫຼາຍ.

ນາຍບ້ານໆ ນາເຕີຍ ເມືອງນໍ້າທາ ແຂວງຫຼວງນໍ້າທາ

ສ່ວນສະຖານທີ່ທຳການຜະລິດ ຫຼື ພື່ນທີ່ທຳມາຫາກິນແມ່ນປະຊາຊົນຍັງສາມາດໄປເຮັດຢູ່ພື້ນທີ່ເກົ່າຂອງຄົນເອງໄດ້ ເນື່ອງຈາກພື້ນທີ່ທຳການຜະລິດບໍ່ໄດ້ຮັບຜົນກະທົບຈາກໂຄງການກໍ່ສ້າງທາງລົດໄຟ ແລະ ໂຄງການບ້ານຈັດສັນນີ້ແມ່ນຊົດເຊີຍສະເພາະເຮືອນທີ່ໄດ້ຮັບຜົນກະທົບເທົ່ານັ້ນ.


ໂອກາດນີ້ຂໍຝາກເຖິງພໍ່ແມ່ປະຊາຊົນບ້ານນາເຕີຍ ກໍ່ຄືຜູ້ທີ່ຈະຍ້າຍເຂົ້າມາຢູ່ບ້ານຈັດສັນໃໝ່ ໃຫ້ຊ່ວຍກັນປົກປັກຮັກສາ ແລະ ບູລະນະໃຫ້ມີຄວາມສະອາດຈົບງາມ ແລະ ມີຄວາມຍືນຍົງ.