ສຸກອາພອນ ວົງຈຽງຄໍາ ອະດີດນັກເຕະທີມຊາດລາວ ສໍາເລັດພາລະກິດໃນການເປີດຄິນິກບານເຕະ ແລະ ກິດຈະກຳຕ່າງໆ ໃຫ້ກັບສະໂມສອນ ວອນທະບິງ ( Vonethabing ACADEMY ) ທີ່ແຂວງຫຼວງພະບາງ ເມື່ອວັນທີ 29 ພຶດສະພາ 2022 ກ່ອນທີ່ຈະເດີນທາງໄປໄລ່ລ່າຄວາມຝັນໃນໄທລີກ.
ເນື່ອງໃຈໂອກາດທີ່ ໄທລີກ 2 ລະດູການ 2021-2022 ໄດ້ປິດສາກຢ່າງເປັນທາງການ ແລະ ສຸກອາພອນ ກໍໄດ້ໝົດສັນຍາກັບສະໂມສອນ ກະເສດສາດ ຫຼ້າສຸດ ສຸກອາພອນ ໄດ້ຮັບເຊີນຈາກ ສະໂມສອນ ວອນທະບິງ ໃຫ້ຂຶ້ນໄປສອນທັກສະການຫຼິ້ນບານເຕະຂັ້ນພື້ນຖານ ແລະ ເຮັດກິດຈະກໍາຕ່າງ ລວມທັງໄດ້ມີການເລົ່າປະສົບການໆເປັນນັກເຕະກັບນັກເຕະຂອງສະໂມສອນດັ່ງກ່າວ ເພື່ອຕຸ້ນໃຫ້ເຂົາເຈົ້າຫັນມາຫຼິ້ນບານເຕະ ແລະ ມີຄວາມຝັນຢາກປະສົບຜົນສໍາເລັດໃນການເປັນນັກເຕະ.
ໂອກາດດັ່ງກ່າວ ສຸກອາພອນ ໃຫ້ສໍາພາດກັບທີມຂ່າວພວກເຮົາວ່າ: ດີໃຈຫຼາຍທີ່ໄດ້ເດີນທາງມາແຕ່ປະເທດໄທ ຫຼັງຈົບລະດູການ ແລະ ຮູ້ສຶກດີໃຈຫຼາຍທີ່ໄດ້ມາສອນນັກເຕະເຍົາວະຊົນໃຫ້ກັບ ສະໂມສອນ ວອນທະບິງ ໂດຍສະເພາະແມ່ນການມາສອນບານເຕະຂັ້ນພື້ນໃຫ້ເຂົາເຈົ້າໄດ້ຮູ້ ແລະ ອັນທີ່ສໍາຄັນແມ່ນການສົ່ງບານໃຫ້ເພື່ອນຮ່ວມທີມໄດ້ຖືກເປົ້າໝາຍ ລວມທັງຍັງໄດ້ມີຂອງທີ່ລະນຶກໃຫ້ກັບນ້ອງໆໜ້ອຍໜຶ່ງ ເພື່ອເປັນກໍາລັງໃຈ ແລະ ແຮງພັກດັນໃຫ້ເຂົາເຈົ້າໄດ້ ເຊື່ອວ່າໃນອະນາຄົດຈະເຫັນນ້ອງທີ່ນີ້ກ້າວໄປສູ່ນັກເຕະທີມຊາດ ແລະ ນັກເຕະອາຊີບ ແນ່ນອນການມາຄັ້ງນີ້ແມ່ນໄດ້ຮັບການຕ້ອນຮັບເປັນຢ່າງດີ ແລະ ເຫັນນ້ອງດີໃຈທີ່ເຫັນໜ້າເຮົາທີ່ເປັນແບບຢ່າງ ລວມເຖິງມາຂໍຖ່າຍຮູບກັນຢ່າງຫຼວງຫຼາຍ.
ຂະນະທີ່ ທ່ານ ເພັດຕິກອນ ປັນຍາສິດ ຜູ້ຈັດການສະໂມສອນ ວອນທະບິງ ອະຄາເດມີ ທັງເປັນອະດີດນັກເຕະທີມຊາດລາວ ແລະ ຫົວໜ້າຄູຝຶກ ໃຫ້ສໍາພາດວ່າ: ການທີ່ເຊີນ ສຸກອາພອນ ມາແນະນໍາ ແລະ ສອນບານເຕະໃນຄັ້ງນີ້ ກໍເພື່ອຖ່າຍທອດຊີວິດການເປັນນັກກີລາ ເພື່ອໃຫ້ນັກເຕະເຍົາວະຊົນຂອງພວກເຮົາ ໄດ້ມີຄວາມຝັນ ແລະ ແບບຢ່າງໃນການຈະກ້າວໄປເຖິງຈຸດໆນັ້ນ. ຢ່າງໃດກໍຕາມ ກິດຈະກໍາຄັ້ງນີ້ໄດ້ຮັບການສະໜັບສະໜູນຈາກຫຼາຍພາກສ່ວນ ໂດຍສະເພາະແມ່ນ ສຸກອາພອນ ເພິ່ນຢາກມາຊ່ວຍໃນການພັດທະນາເດັກນ້ອຍພວກເຮົາ ແນ່ອນໃນອະນາຄົດຈະເຊີນເພິ່ນມາສອນອີກແນ່ນອນ.(ເບິ່ງບັນຍາກາດເພີ່ມຕື່ມໄດ້ທີ່ຄລິບລຸ່ມນີ້:
ຂ່າວ: ຫຼ້າ; ຮູບ: ສອນໄຊ
