ດ່ານສາກົນສິນຄ້າ ທ່າບົກທ່ານາແລ້ງ ສະຫຼຸບການເຄື່ອນໄຫວວຽກງານ ໄຕມາດ I ແລະ ແຜນໄຕມາດ II ປີ 2022

134

ວັນທີ 17 ພຶດສະພາ 2022 ທີ່ດ່ານສາກົນສິນຄ້າ ທ່າບົກທ່ານາແລ້ງ ນະຄອນຫຼວງວຽງຈັນ ( ນວ ) ໄດ້ມີການຈັດກອງປະຊຸມສະຫຼຸບການເຄື່ອນໄຫວວຽກງານຂອງດ່ານສາກົນສິນຄ້າ ທ່າບົກທ່ານາແລ້ງ ປະຈຳໄຕມາດ I ແລະ ທິດທາງແຜນການປະຈຳໄຕມາດ II ປີ 2022 ໂດຍການເປັນປະທານຂອງ ທ່ານ ພູວົງ ວົງຄຳຊາວ ຮອງເຈົ້າຄອງນະຄອນຫຼວງວຽງຈັນ ( ນວ ), ມີ ທ່ານ ນາງ ສີລາວັນ ທຳມະວົງ ຄະນະຄຸ້ມຄອງດ່ານສາກົນສິນຄ້າທ່າບົກທ່ານາແລ້ງ, ທ່ານ ວຽງຄອນ ສິດທິໄຊ ຮອງປະທານ ບໍລິສັດ ວຽງຈັນ ໂລຊິດສະຕິກ ພາກ, ພາກສ່ວນກ່ຽວຂ້ອງຈາກຫ້ອງວ່າການປົກຄອງ ນວ, ຫົວໜ້າ – ຮອງຫົວ ໜ້າພະແນກ, ຄະນະຄຸ້ມຄອງດ່ານສາກົນ ຂົວມິດຕະພາບລາວ – ໄທ ແຫ່ງທີ 1 ແລະ ແຂກຖືກເຊີນເຂົ້າຮ່ວມ.

ທ່ານ ນາງ ສີລາວັນ ທຳມະວົງ ໄດ້ລາຍງານຕໍ່ກອງປະຊຸມກ່ຽວກັບສະພາບລວມຂອງການຄຸ້ມຄອງດ່ານສາກົນສິນຄ້າ ທ່າບົກທ່ານາແລ້ງ ວ່າ: ຄະນະຄຸ້ມຄອງດ່ານສາກົນສິນຄ້າ ທ່າບົກທ່ານາແລ້ງ ແມ່ນກົງຈັກໜຶ່ງຂອງອົງການປົກຄອງ ນວ, ມີພາລະບົດບາດເປັນເສນາທິການໃຫ້ແກ່ອົງການປົກຄອງ ນວ ໃນການຄຸ້ມຄອງ ແລະ ບໍລິການຂອງລັດ ຢູ່ໃນຂອບເຂດດ່ານສາກົນສິນຄ້າ ທ່າບົກທ່ານາແລ້ງ ເຊິ່ງເປັນສະຖານີຂົນສົ່ງສິນຄ້າຫຼາຍຮູບແບບ ( ກວມເອົາສະຖານີຂົນສົ່ງສິນຄ້າທາງບົກ ແລະ ທາງລົດໄຟ ) ເພື່ອຮັບປະກັນໃຫ້ບັນດາຂະແໜງການຄຸ້ມຄອງລັດ ສາມາດເຄື່ອນໄຫວທາງດ້ານວິຊາສະເພາະໄດ້ຢ່າງຄ່ອງຕົວ, ມີປະສິດທິພາບ, ປະສິດທິຜົນ, ຮັກສາໄດ້ຄວາມສະຫງົບ ຄວາມເປັນລະບຽບຮຽບຮ້ອຍໃນການເຂົ້າ – ອອກດ່ານ, ທັງສ້າງເງື່ອນໄຂອຳນວຍຄວາມສະດວກໃຫ້ແກ່ການເຮັດບໍລິການ, ການຂົນສົ່ງຄ່ຽນຖ່າຍສິນຄ້າເຂົ້າ – ອອກ, ການຜ່ານແດນ, ການເຄື່ອນຍ້າຍສິນຄ້າຢູ່ພາຍໃນດ່ານໃຫ້ມີຄວາມສະດວກຄ່ອງຕົວວ່ອງໄວໂປ່ງໃສ, ໂລ່ງລ່ຽນ, ທັນສະໄໝ ແລະ ເປັນມິດກັບສິ່ງແວດລ້ອມຕາມກົດໝາຍ ແລະ ລະບຽບການວິຊາສະເພາະທີ່ກ່ຽວຂ້ອງ, ຮັບປະກັນຜົນປະໂຫຍດຂອງຊາດ ແລະ ປະຊາຊົນໃຫ້ປອດໄພ ແນໃສ່ເຊື່ອມໂຍງ – ເຊື່ອມຈອດກັບບັນດາປະເທດພາກພື້ນ ແລະ ສາກົນ, ປະກອບສ່ວນໃນການພັດທະນາເສດຖະກິດຂອງຊາດໃຫ້ເຕີບໃຫຍ່ຂະຫຍາຍຕົວຢ່າງຕໍ່ເນື່ອງ ແລະ ຍືນຍົງ ແລະ ໄດ້ຮ່ວມກັບ ບໍລິສັດຜູ້ພັດທະນາຄົ້ນຄວ້າແກ້ໄຂບັນຫາຕ່າງໆ ບົນພື້ນຖານຫຼັກການ, ລະບຽບການ ແລະ ຄວາມເປັນເອກະພາບກັນ, ແກ້ໄຂການບໍ່ອະນຸຍາດໃຫ້ມີຜູ້ຕິດຕາມມານຳລົດບັນທຸກສິນຄ້າ, ການເກັບຄ່າບໍລິການຕ່າງໆໃຫ້ສອດຄ່ອງຕາມລະບຽບການວາງອອກ.


ດ້ານການຈັດຕັ້ງປະຕິບັດຜ່ານມາ ຄະນະໄດ້ຢຸດເຊົາໃບອະນຸຍາດຜ່ານດ່ານຊົ່ວຄາວຂອງຄົນຂັບລົດບັນທຸກໄປ – ກັບເທື່ອດຽວ, ແກ້ໄຂບັນດາຊິບປິ້ງຄົນໄທທີ່ເຂົ້າມາເຄື່ອນໄຫວບໍ່ສອດຄ່ອງກັບລະບຽບການ, ຄຸ້ມຄອງພະນັກງານຊິບປິ້ງຄົນລາວ ໃຫ້ປະຕິບັດຕາມລະບຽບກົດໝາຍຢ່າງເຂັ້ມງວດ, ແຕ່ງຕັ້ງຄະນະຮັບຜິດຊອບຕິດຕາມ, ກວດກາ ແລະ ແກ້ໄຂປາກົດການຫຍໍ້ທໍ້ຕ່າງໆໃນຂອດບໍລິການທີ່ເປັນຫາງສຽງສັງຄົມ, ແຕ່ງຕັ້ງຄະນະຮັບຜິດຊອບຈັດສັນຄວາມເປັນລະບຽບຮຽບຮ້ອຍພາຍໃນດ່ານ ພ້ອມທັງອອກແຈ້ງການຈັດສັນພາຍໃນດ່ານ, ອອກແຈ້ງການເຮັດທົດລອງນຳໃຊ້ອຸປະກອນ E-lock ເພື່ອຕິດຕາມພາຫະນະຂົນສົ່ງສິນຄ້າເຂົ້າໄປສົ່ງເຄື່ອງປາຍທາງ ແລະ ອອກແຈ້ງການຊົ່ວຄາວໂມງເປີດ – ປິດດ່ານ.

ຂະແໜງພາສີ: ນັບແຕ່ວັນທີ 1 ມັງກອນເປັນຕົ້ນມາ ດ່ານພາສີສາກົນສິນຄ້າ ທ່າບົກທ່ານາແລ້ງ ໄດ້ເປີດບໍລິການໃຫ້ມີການແຈ້ງເສຍພາສີເປັນລາຍລະອຽດ ແລະ ວຽກງານທີ່ຕິດພັນກັບວຽກງານໂຄງການລົງທຶນ, ລະບອບຍົກເວັ້ນ, ງົດເກັບພາສີຕ່າງໆ ພາຍໃຕ້ຂອບການສົ່ງເສີມການລົງທຶນ ແມ່ນໄດ້ດຳເນີນພິທີການທາງພາສີຢູ່ດ່ານ ຜ່ານການຈັດຕັ້ງປະຕິບັດ 3 ເດືອນຕົ້ນປີ ສາມາດຈັດເກັບລາຍຮັບເຂົ້າງົບປະມານໃນງວດ I ປີ 2022 ໄດ້ທັງໝົດ 551,6 ຕື້ກວ່າກີບ ແລະ ລາຍຮັບດັ່ງກ່າວຍັງບໍ່ທັນໄດ້ລວມເອົາລາຍຮັບຄ່າອາກອນພາຍໃນຂອງ 3 ບໍລິສັດນຳເຂົ້າ ແລະ ຍັງບໍ່ລວມເອົາຄ່າບໍລິການຕູ້ສິນຄ້າຂົນສົ່ງທາງລົດໄຟ ລາວ – ຈີນ. ພ້ອມນັ້ນ, ຍັງໄດ້ລາຍງານກ່ຽວກັບວຽກງານຂອງຂະແໜງກັກກັນພືດ – ສັດ, ຂະແໜງສາທາ ( ອາຫານ, ຢາ, ຄວບຄຸມພະຍາດ ), ບັນດາຂໍ້ສະດວກ, ຂໍ້ຫຍຸ້ງຍາກ ແລະ ບົດຮຽນທີ່ຖອດຖອນໄດ້ໃນການຈັດຕັ້ງປະຕິບັດວຽກງານຢູ່ດ່ານສາກົນສິນຄ້າ ທ່າບົກທ່ານາແລ້ງ ຕະຫຼອດ I ໄຕມາດຜ່ານມາ ແລະ ທິດທາງແຜນການໃນຕໍ່ໜ້າ.

ທ່ານ ສາຄອນ ພິລາງາມ ຜູ້ອຳນວຍການບໍລິສັດ ທ່າບົກທ່ານາແລ້ງ ໄດ້ລາຍງານກ່ຽວກັບຄວາມຄືບໜ້າການພັດທະນາໂຄງລ່າງພື້ນຖານ, ອາຄານ, ສາງສິນຄ້າເຂດດັ່ງກ່າວວ່າ ມີຄວາມຄືບໜ້າຫຼາຍ ເຊັ່ນ: ອາຄານບໍລິການຂອງເຈົ້າໜ້າທີ່ພາສີ, ອາຄານທ່າບົກ, ສາງສິນຄ້າ, ປັບປຸງບ່ອນນັ່ງຂອງຜູ້ມາໃຊ້ບໍລິການ, ກໍ່ສ້າງທາງລົດໄຟເຊື່ອມກັບທາງລົດໄຟ ລາວ – ຈີນ ຄາດວ່າຈະສຳເລັດໃນເດືອນມິຖຸນານີ້ ເຊິ່ງບັນດາວຽກຕ່າງໆພວກເຮົາໄດ້ເລັ່ງເຮັດແບບຮີບດ່ວນ ເນື່ອງຈາກບໍລິມາດຂອງສິນຄ້າໄດ້ເພີ່ມຂຶ້ນຢ່າງໄວວາ. ນອກຈາກນີ້, ຜູ້ເຂົ້າຮ່ວມກອງປະຊຸມຍັງໄດ້ມີການປຶກສາຫາລື, ແລກປ່ຽນຄຳເຫັນຕໍ່ບັນຫາວຽກທີ່ຍັງຄົງຄ້າງຢ່າງກົງໄປກົງມາ ເພື່ອພ້ອມກັນແກ້ໄຂໃນຕໍ່ໜ້າ.

ໃນຕອນທ້າຍ, ທ່ານ ພູວົງ ວົງຄຳຊາວ ໃຫ້ກຽດໂອ້ລົມຕໍ່ກອງປະຊຸມ ໂດຍໄດ້ເຫັນດີຕໍ່ບົດລາຍງານຂອງຄະນະຄຸ້ມຄອງດ່ານ ຕະຫຼອດໄລຍະການເປີດນຳໃຊ້ມາແຕ່ເດືອນມັງກອນ. ມາຮອດປັດຈຸບັນເຫັນວ່າທຸກວຽກງານເລີ່ມເປັນລະບົບ, ມີກົງຈັກຄົບຂະແໜງການຕາມນິຕິກຳ ພ້ອມເນັ້ນໃຫ້ດ່ານຮັບປະກັນວຽກຄວາມສະຫງົບ, ຄວາມໝັ້ນຄົງຢູ່ໃນເຂດດັ່ງກ່າວ, ຄຸ້ມຄອງການຈັດເກັບລາຍຮັບເຮັດໃຫ້ລະອຽດຈະແຈ້ງ ແລະ ໂປ່ງໃສ.