ສຳນັກຂ່າວເອເອັຟພີ ລາຍງານວ່າ ກະຊວງແຮງງານຂອງສະຫະລັດອາເມຣິກາ ເປີດເຜີຍໃນວັນທີ 11 ພຶດສະພາ 2022 ວ່າ ອັດຕາເງິນເຟີ້ຂອງສະຫະລັດອາເມຣິກາ ໃນເດືອນເມສາຜ່ານມາ ເພີ່ມຂຶ້ນ 8,3% ເມື່ອທຽບໃສ່ໄລຍະດຽວກັນຂອງປີຜ່ານມາ ແລະ ເພີ່ມຂຶ້ນສູງກວ່າທີ່ນັກວິເຄາະຄາດການໄວ້ ທີ່ຄາດວ່າ 8,1% ແຕ່ຕ່ຳກວ່າລະດັບ 8,5% ໃນເດືອນມີນາ ເນື່ອງຈາກລາຄາພະລັງງານປັບລົງ.
ແນວໃດກໍຕາມ, ລາຄາສິນຄ້າ ແລະ ບໍລິການຕ່າງໆຍັງເພີ່ມຂຶ້ນຢ່າງຕໍ່ເນື່ອງ ບໍ່ວ່າຈະເປັນອະສັງຫາລິມະຊັບ, ສິນຄ້າອຸປະໂພກ – ບໍລິໂພກ, ຄ່າຂົນສົ່ງ ແລະ ອື່ນໆ ເຊິ່ງເຮັດໃຫ້ອັດຕາເງິນເຟີ້ປະຈຳປີເພີ່ມຂຶ້ນສູງສຸດໃນຮອບ 40 ປີ.
ໃນຂະນະທີ່ດັດສະນີລາຄາຜູ້ບໍລິໂພກ ເພີ່ມຂຶ້ນ 0,3% ເມື່ອທຽບກັບເດືອນມີນາ, ຫຼັງຈາກເພີ່ມຂຶ້ນ 1,2% ໃນເດືອນມີນາ, ແນວໃດກໍຕາມ ຫາກບໍ່ນັບສິນຄ້າທີ່ມີຄວາມຜັນຜວນ ເຊັ່ນ: ອາຫານ ແລະ ພະລັງງານແລ້ວ ດັດສະນີລາຄາຜູ້ບໍລິໂພກຈະເພີ່ມຂຶ້ນ 0,6% ເພີ່ມຂຶ້ນເຖິງ 2 ເທົ່າ ຈາກເດືອນມີນາຜ່ານມາ.
