ຄໍາພູວົງ ຂານສະຫງ່າ Mister International Laos 2021 ອວຍພອນວັນກໍາມະກອນສາກົນ ແກ່ທຸກສາຍອາຊີບ

73

ເນື່ອງຈາກເດືອນພຶດສະພາ ເປັນເດືອນໜຶ່ງທີ່ສໍາຄັນ ນັ້ນກໍຄື “ ວັນກໍາມະກອນສາກົນ ຄົບຮອບ 136 ປີ “ ທີມຂ່າວບັນເທີງກໍໄດ້ມີໂອກາດສໍາພາດບຸກຄົນໃນວົງການບັນເທີງ ທີ່ຈະມາແບ່ງປັນມູມມອງໃນສາຍຂອງຊີບຂອງຕົນ ແລະ ອວຍພອນທຸກສາຍອາຊີບ ເນື່ອງໃນວັນສໍາຄັນດັ່ງກ່າວນີ້.

ໜຸ່ມ ໂດໂດ້ ຄໍາພູວົງ ຂານສະຫງ່າ Mister International Laos 2021 ກ່າວວ່າ: ສໍາລັບໂດ້ເອງແມ່ນປະກອບຢູ່ສອງ ຫຼື ສາມອາຊີບເລີຍກໍວ່າໄດ້ ຄືອາຊີບໜຶ່ງແມ່ນເປັນນາຍແປພາສາຈີນ ໃຫ້ກັບບໍລິສັດແຫ່ງໜຶ່ງ ແລະ ອີກໜຶ່ງອາຊີບກໍຄືການຮັບງານໃນວົງການບັນເທີງ ບໍ່ວ່າຈະເປັນການຖ່າຍແບບ ແລະ ຖ່າຍໂຄສະນາຕ່າງໆ. ນອກຈາກນີ້, ຍັງເປັນເທຣນເນີສອນອອກກໍາລັງກາຍອີກ.

ສໍາລັບອາຊີບໃນການແປພາສາ ແມ່ນໂດ້ມີຄວາມມັກໃນເລື່ອງພາສາຢູ່ແລ້ວ ຫຼັງຈາກທີ່ຢູ່ກັບອາຊີບນີ້ ສິ່ງທໍາອິດທີ່ໄດ້ກໍແມ່ນປະສົບການ ແລະ ການຮຽນຮູ້ຄໍາສັບຂອງພາສາຕ່າງປະເທດ. ສ່ວນວຽກໃນວົງການບັນເທີງກໍເຮັດໄປຄວບຄູ່ກັນ ເພາະມັນເປັນຄວາມຝັນຂອງຄົນໆໜຶ່ງທີ່ຢາກຝາກຜົນງານຂອງຕົນເອງໄວ້ໃນແວດວົງບັນເທີງ ແລະ ເມື່ອເຮົາເຮັດຫຼາຍໆຢ່າງພ້ອມກັນແນ່ນອນການຈັດສັນເວລາແມ່ນສໍາຄັນ ເຊິ່ງໂດ້ເອງມີການຈັດສັນເວລາໃຫ້ເໝາະສົມ ເພື່ອໃຫ້ຜົນງານນັ້ນອອກມາດີທີ່ສຸດ.

ໂດ້ເອງຄິດວ່າທຸກໆໜ້າວຽກຍ່ອມມີຄວາມສໍາຄັນ ແລະ ມີ ຄວາມຍາກງ່າຍທີ່ແຕກຕ່າງກັນ ແຕ່ສິ່ງສໍາຄັນແມ່ນຢູ່ທີ່ການຝຶກຝົນຮຽນຮູ້ ແລະ ສຶກສາໃຫ້ດີໆ. ພ້ອມນີ້, ເຮົາຕ້ອງບໍ່ຢຸດພັດທະນາຕົນເອງໄປເລື້ອຍໆ ແລະ ອີກໜຶ່ງສິ່ງທີ່ສໍາຄັນ ກໍຄືການມີຈິດໃຈທີ່ມັກຮັກໃນອາຊີບນັ້ນແທ້ໆ ແລະ ເຮົາຈະເຮັດໄດ້ດີ.

ຫຼັງຈາກທີ່ຮັບຕໍາແໜ່ງມາ ກໍມີຫຼາຍສິ່ງທີ່ເຮັດໃຫ້ເຮົາປ່ຽນແປງຕົນເອງ ຈາກເປັນຄົນທີ່ຂີ້ອາຍ ບໍ່ກ້າ ເຮັດໃຫ້ເຮົາຮູ້ສຶກໝັ້ນໃຈໃນຕົວເອງຫຼາຍຂຶ້ນ ມີການພັດທະນາຕົນເອງ ແລະ ເປັນທີ່ຮູ້ຈັກໃນວົງກວ້າງຂຶ້ນ ແລະ ໄດ້ຮູ້ວ່າຕົວເຮົາເອງມີຄວາມພ້ອມທີ່ຈະຮຽນຮູ້ສິ່ງໃໝ່ຢູ່ຕະຫຼອດເວລາ.

ເນື່ອງໃນໂອກາດວັນກໍາມະກອນສາກົນນີ້ ໂດ້ເອງໃນນາມໄວໜຸ່ມຄົນໜຶ່ງ ກໍຂໍອວຍພອນໃຫ້ທຸກຄົນ, ທຸກສາຍອາຊີບ ປະສົບຜົນສໍາເລັດໃນໜ້າທີ່ວຽກງານການໄປ – ມາກໍໃຫ້ມີສະຕິລະມັດລະວັງຕົວ ແລະ ຫ່າງໄກຈາກພະຍາດໂຄວິດ – 19 ດ້ວຍ.

ສຸດທ້າຍນີ້ ໂດ້ເອງກໍຂໍຝາກທຸກຄົນຕິດຕາມຜົນງານຂອງໂດ້ທັງທີ່ຜ່ານມາ ແລະ ຜົນງານໃນອະນາຄົດທີ່ຈະມີຜົນງານການສະແດງ ແລະ ຈະມີການປະກາດໃນເວທີສາກົນປະມານໃນທ້າຍເດືອນພຶດສະພາ 2022 ນີ້ ສໍາລັບຊ່ອງທາງການຕິດຕາມ P’dodo Khamphouvong Khansanga.