ຫຼາຍສຸດປະຫວັດສາດ ອີ-ສະປອດລາວ ສົ່ງນັກກີລາຮ່ວມຊີເກມ ທີ່ຫວຽດນາມ ເຖິງ 51 ຄົນ

55

ເປັນອີກໜຶ່ງຄວາມປະທັບໃຈໃໝ່ເມື່ອ ສະຫະພັນກີລາອີ-ສະປອດແຫ່ງຊາດລາວ ສາມາດສົ່ງນັກກີລາເຂົ້າຮ່ວມຊີເກມ ຄັ້ງທີ 31 ທີ່ ສສ ຫວຽດນາມ ເປັນເຈົ້າພາບ ລະຫວ່າງວັນທີ 12-23 ພຶດສະພາ 2022 ໄດ້ເຖິງ 51 ຄົນ ເຊິ່ງເປັນຈໍານວນນັກກີລາທີ່ຫຼາຍທີ່ສຸດຈາກປະເພດກີລາດຽວໃນການສົ່ງເຂົ້າຮ່ວມໃນປະຫວັດສາດຊີເກມ.

ສະຫະພັນກີລາອີ-ສະປອດແຫ່ງຊາດລາວ ຈັດພິທີຖະແຫຼງຂ່າວກຽມສົ່ງນັກກີລາເຂົ້າຮ່ວມຊີເກມ ຂຶ້ນໃນຕອນແລງຂອງວັນທີ 5 ພຶດສະພາ 2022 ທີ່ຫ້ອງປະຊຸມ ຄະນະກໍາມະການໂອແລມປິກແຫ່ງຊາດລາວ ໃຫ້ກຽດໂອລົມນັກກີລາໂດຍ ທ່ານ ນາງ ພູໄຊ ແພງພົງ ຮອງຫົວໜ້າກົມກີລາລະດັບສູງ ເຊິ່ງກໍມີຄະນະສະຫະພັນກີລາອີ-ສະປອດແຫ່ງຊາດລາວ ພ້ອມດ້ວຍຄະນະນໍາ, ຄູຝຶກ ແລະ ນັກກີລາອີ-ສະປອດລາວ ເຂົ້າຮ່ວມຢ່າງພ້ອມພຽງ.

ທ່ານ ວັນທະນາ ກຸນນະວັນ ຮອງປະທານ, ເລຂາທິການສະພັນກິລາອີສະປອດແຫ່ງຊາດລາວ ກ່າວໃນພິທີວ່າ: ດັ່ງທີ່ທ່ານຮູ້ນໍາກັນແລ້ວວ່າ ກີລາ ອີ-ສະປອດ ເປັນກີລາທີ່ແຂ່ງຂັນທາງເອເລັກໂທຣນິກ ທີ່ໃຊ້ມັນສະໝອງ, ພິກໄຫວ, ການຫຼິ້ນເປັນທີມ ແລະ ການວາງແຜນຕ່າງ, ເຊິ່ງແນ່ນອນ ອີ-ສະປອດລາວ ເຮົາກໍມີການພັດທະນາ ແລະ ໃນກາງປີ 2021 ສະຫະພັນກີລາອີ-ສະປອດລາວ ກໍໄດ້ມີການປະຊຸມເພື່ອກຽມຄວາມພ້ອມຮ່ວມຊີເກມ ທີ່ຫວຽດນາມ ໂດຍກໍໄດ້ຮັບການສະໜັບສະໜູນຈາກ ບໍລິສັດ T-plus,

ລາວໂທລະຄົມ ແລະ ບໍລິສັດ ເບຍລາວ ກໍຄືເຄື່ອງດື່ມສະຕິງ ມາໂດຍຕະຫຼອດມາໃນການຈັດການແຂ່ງຂັນ ເພື່ອຄັດເລືອກເອົານັກກີລາທີມຊາດ ຈົນເຖິງປີ 2022 ເປັນປີປະຫວັດສາດທີ່ ອີ-ສະປອດລາວ ສາມາດສົ່ງນັກກີລາເຂົ້າຮ່ວມຊີເກມ ຄັ້ງທໍາເຖິງ 51 ຄົນ.

ທ່ານ ໂຈນາທານ ສີຣິສັກດາ ປະທານສະຫະພັນກີລາ ອີ-ສະປອດແຫ່ງຊາດລາວ ກ່ອນອື່ນກໍ່ຕ້ອງຂໍຂອບໃຈຜູ້ສະໜັບສະໜູນ ລວມເຖິງເຈົ້າຂອງເກມທີ່ໃຫ້ຊ່ວຍສະໜັບສະໜູນໃຫ້ກີລາ ອີ-ສະປອດ ສາມາດພັດທະນາຂຶ້ນມາຢ່າງກະໂດດຂັ້ນ ເຊິ່ງສະແດງອອກໃນຊີເກມ ຄັ້ງທີ 31 ທີ່ຫວຽດນາມ ຄັ້ງນີ້ ເປັນຄັ້ງທໍາອິດທີ່ກີລາ ອີ-ສະປອດລາວ ສາມາດສົ່ງນັກກີລາເຂົ້າຮ່ວມ ແລະ ເປັນປະເພດກີລາທີ່ ລາວເຮົາສາມາດສົ່ງນັກກີລາເຂົ້າຮ່ວມຫຼາຍທີ່ສຸດໃນປະຫວັດສາດ ແນ່ນອນກໍຮຽກໃຫ້ຄູຝຶກ ແລະ ນັກກີລາ ເອົາໃຈໃສ່ໃຫ້ສາມາດສ້າງປະຫວັດສາດຍາດຫຼຽນປະຫວັດສາດມາໃຫ້ກັບຊາວລາວທັງປະເທດ.

ສໍາລັບ ກີລາອີ-ສະປອດ ໃນຊີເກມຄັ້ງນີ້ ມີການຊີງແຊັມເຖິງ 9 ລາຍການ ແລະ ມີ 10 ປະເທດເຂົ້າຮ່ວມ ໂດຍທັບນັກກີລາ ອີ-ສະປອດລາວ ລວມທັງໝົດຄະນະນໍາ, ຄູຝຶກ ແລະ ນັກກີລາແມ່ນ 68 ທ່ານ ( ນັກກີລາ 51 ທ່ານ ) ກຸ່ມທໍາອິດຈະເດີນທາງໃນວັນທີ 10 ພຶດສະພາ 2022, ສ່ວນ ກຸ່ມທີ 2 ກັບ 3 ແມ່ນຈະເດີນທາງໃນວັນທີ 11 ກັບ ວັນທີ 15 ພຶດສະພາ 2022 ຕາມລໍາດັບ.
ຂ່າວ-ຮູບ: ຫຼ້າ MKP