ຢືນຢັນຈະສະໜອງຊີ້ນໝູໃຫ້ພຽງພໍ ແລະ ບໍ່ໃຫ້ຂຶ້ນລາຄາໄລຍະບຸນປີໃໝ່ລາວ

93

ຜູ້ອຳນວຍການລັດວິສາຫະກິດສະບຽງອາຫານນະຄອນຫຼວງວຽງຈັນ ຢືນຢັນວ່າ: ໃນໄລຍະສະເຫຼີມສະຫຼອງບຸນປີໃໝ່ລາວ ປະຈໍາປີ ພສ 2565 ທີ່ຈະມາເຖິງນີ້ ຈະສະໜອງຊີ້ນໝູໃຫ້ພຽງພໍກັບຄວາມຕ້ອງການຂອງຜູ້ບໍລິໂພກໃນນະຄອນຫລວງວຽງຈັນ ແລະ ຈະບໍ່ຂຶ້ນລາຄາເຮັດໃຫ້ກະທົບຕໍ່ຜູ້ບໍລິໂພກ.

ທ່ານ ຄຳຫຼ້າ ແສງດາວົງ, ຜູ້ອຳນວຍການລັດວິສາຫະກິດສະບຽງອາຫານນະຄອນຫຼວງວຽງຈັນ, ຫົວໜ້າໂຮງງານຂ້າສັດທັນສະໄໝ ດອນດູ່ ໃຫ້ສໍາພາດຕໍ່ສື່ມວນຊົນວ່າ: ປັດຈຸບັນ ຍ້ອນການເໜັງຕີງຂອງລາຄາສິນຄ້າຫຼາຍປະເພດ ໂດຍສະເພາະແມ່ນຊີ້ນສັດປະເພດຕ່າງໆ, ລວມເຖິງພືດ ທີ່ນຳມາໃຊ້ຜະລິດເປັນຫົວອາຫານສັດເພິ່ມຂຶ້ນ, ລາຄານໍ້າມັນເຊື້ອໄຟສູງຂຶ້ນ, ບວກກັບອັດຕາແລກປ່ຽນມີການເໜັງຕີງ ເຮັດຕົ້ນທຶນການລ້ຽງສູງຂຶ້ນ, ເວົ້າລວມແມ່ນເຮັດໃຫ້ໂຄງປະກອບລາຄາຂອງການຜະລິດດັ່ງກ່າວສູງຂຶ້ນ, ດັ່ງນັ້ນ ການຂາຍອາຫານປະເພດຊີ້ນແມ່ນເໜັງຕີງຂຶ້ນຕາມໂຄງປະກອບຂອງລາຄາສິນຄ້າ ສະນັ້ນ ຜູ້ບໍລິໂພກບໍ່ຄວນເຂົ້າໃຈຜິດວ່າການຂຶ້ນລາຄາຊີ້ນໝູ ຫຼື ຊີ້ນງົວ-ຄວາຍ ແມ່ນຊາວຄ້າຂາຍສວຍໂອກາດຂຶ້ນ ແຕ່ເປັນຍ້ອນທັງໝົດລະບົບໂຄງປະກອບລາຄາສິນຄ້າທີ່ເພີ່ມຂຶ້ນ ເຮັດໃຫ້ລາຄາຈໍາໜ່າຍເໜັງຕີງເພີ່ມຂຶ້ນໄປນຳ ເຊີ່ງທາງບໍລິສັດ ກໍຄື ຜູ້ປະກອບການລ້ຽງສັດພະຍາຍາມປັບ ແລະ ຫຼຸດຮອນຂັ້ນຂອດທີ່ສີ້ນເປືອງອອກເຮັດໃຫ້ໂຄງປະກອບລາຄາຖືກລົງເພື່ອຜູ້ບໍລິໂພກ.

ທ່ານໃຫ້ຮູ້ຕື່ມວ່າ: ປັດຈຸບັນນີ້ ໂຮງງານຂ້າສັດທັນສະໄໝ ດອນດູ່ ສະໜອງໝູ 450-460 ໂຕຕໍ່ມື້ ແລະ ຈະເພິ່ມຂຶ້ນເປັນ 500 ໂຕ ໃນໄລຍະປີໃໝ່ລາວທີ່ຈະມາເຖິງນີ້, ໃນນີ້ ຂ້າຂາຍສົ່ງຕະຫຼາດ 300-320 ໂຕຕໍ່ມື້, ທີ່ເຫຼືອແມ່ນເປັນຊີ້ນສົ່ງບັນດາຮ້ານ Pork Shop ພາຍໃນນະຄອນຫລວງວຽງຈັນ ປະມານ 48 ຮ້ານ ເຊິ່ງຊີ້ນໝູສ່ວນນີ້ມີລາຄາແພງກວ່າຈໍາໜ່າຍຢູ່ຕາມຕະຫຼາດທົ່ວໄປເລັກນ້ອຍ ເນື່ອງຈາກຕ້ອງໄດ້ນໍາໃຊ້ເຄື່ອງເຢັນ ແລະ ຫ້ອງແອ, ຜູ້ບໍລິໂພກຄວນເຂົ້າໃຈບັນຫານີ້.

ຢ່າງໃດກໍຕາມ ລັດວິສາຫະກິດສະບຽງອາຫານນະຄອນຫຼວງວຽງຈັນ ຮ່ວມກັບບໍລິສັດ ຊີພີ ໄດ້ເນັ້ນໃຫ້ຜູ້ຈໍາໜ່າຍຊີ້ນໝູທັງໝົດຂາຍຕາມລາຄາທີ່ບໍລິສັດກໍານົດໄວ້ ແລະ ຫ້າມສວຍໂອກາດຂຶ້ນລາຄາຢ່າງເດັດຂາດ ເພາະເປັນການເອົາປຽບຜູ້ບໍລິໂພກ. ພ້ອມນີ້ ທ່ານຝາກມາຍັງສັງຄົມໃຫ້ມີຄວາມຫມັ້ນໃຈເພາະໂຮງງານໄດ້ຮັບການປັບປຸງສູ່ຄວາມທັນສະໄໝ ແລະ ຂ້າສັດໃນຈໍານວນທີ່ເພີ່ມຂຶ້ນ ເຮັດໃຫ້ໃນໄລຍະປີໃໝ່ລາວທີ່ຈະມາເຖິງນີ້ ຊີ້ນໝູຈະພຽງພໍກັບຄວາມຕ້ອງການຂອງຜູ້ບໍລິໂພກໃນນະຄອນຫຼວງວຽງຈັນແນ່ນອນ.

ປັດຈຸບັນ, ມີ 3 ພາກສ່ວນທີ່ສະໜອງໝູຢູ່ນະຄອນຫລວງວຽງຈັນ ຄື: ບໍລິສັດຊີພີລາວ ໄດ້ສະໜອງໝູ ກວມ 400 ກວ່າໂຕຕໍ່ມື້, ກວມ 50%, ບໍລິສັດເບທາໂກ ສະໜອງໝູມື້ລະ 70-100 ໂຕ ແລະ ຊາວກະສິກອນລ້ຽງເອງ ຈຳໜ່າຍເອງປະມານ 100 ໂຕ ນອກຈາກນີ້ ແມ່ນນຳເຂົ້າມາຈາກ ແຂວງ ວຽງຈັນ ມື້ລະ 100 ກວ່າໂຕ. ສ່ວນລາຄາຊີ້ນໝູໃນຕໍ່ໜ້າຄາດວ່າຈະຍັັງຄົງລາຄາໃນປັດຈຸບັນໄວ້ໃນໄລຍະຍາວ ເນື່ອງຈາກມີອາຫານຕາມທໍາທະຊາດເຂົ້າມາທົດແທນຫລາຍໃນໄລຍະລະດູຝົນທີ່ຈະມາເຖິງນີ້.

ຈາກ: Lao Youth Radio FM 90.0 Mhz