ຈີນ ປະກາດປິດນະຄອນຊຽງໄຮ້ ພ້ອມເດີນໜ້າ ກວດໂຄວິດໃຫ້ປະຊາຊົນ ຫຼາຍກວ່າ 25 ລ້ານຄົນ

32

ທາງການຈີນ ໄດ້ສັ່ງປິດນະຄອນຊຽງໄຮ້ ເຊິ່ງເປັນເມືອງທີ່ມີປະຊາກອນຫຼາຍທີ່ສຸດຂອງປະເທດ ແລະ ເປັນສູນກາງດ້ານເສດຖະກິດ – ການເງິນຂອງຈີນ ເພື່ອຄວບຄຸມການແຜ່ລະບາດຂອງພະຍາດໂຄວິດ – 19 ພ້ອມທັງເດີນໜ້າກວດຫາເຊື້ອໂຄວິດໃຫ້ປະຊາຊົນໃນນະຄອນແຫ່ງນີ້ ທີ່ມີຫຼາຍກວ່າ 25 ລ້ານຄົນ.

ການປິດນະຄອນຊຽງໄຮ້ ເປັນເວລາ 9 ວັນ ເຊິ່ງໄດ້ແບ່ງອອກເປັນ 2 ໄລຍະ ໂດຍໄລຍະທຳອິດໄດ້ສັ່ງປິດພາກຕາເວັນອອກຂອງນະຄອນຊຽງໄຮ້ ເລີ່ມແຕ່ວັນທີ 28 ມີນາ ຫາ 1 ເມສາ, ສ່ວນໄລຍະທີ 2 ຈະປິດພາກຕາເວັນຕົກ ເລີ່ມແຕ່ວັນທີ 1 – 5 ເມສາ.

ທາງການຈີນ ລະບຸວ່າ: ໃນໄລຍະທີ່ປິດເມືອງ, ລະບົບຂົນສົ່ງສາທາລະນະຈະຢຸດຕິໃຫ້ບໍລິການຊົ່ວຄາວ ເຊັ່ນດຽວກັນກັບບັນດາບໍລິສັດ, ຫົວໜ່ວຍທຸລະກິດກໍຈະຕ້ອງໂຈະການດຳເນີນທຸລະກິດຊົ່ວຄາວ ຫຼື ຫັນໄປເຮັດວຽກທາງໄກແທນ, ໃນຂະນະທີ່ເຈົ້າໜ້າທີ່ກ່ຽວຂ້ອງຈະໃຊ້ເວລາໄລຍະທີ່ລັອກດາວເລັ່ງກວດຫາເຊື້ອໂຄວິດໃຫ້ປະຊາຊົນໃນນະຄອນຊຽງໄຮ້ທັງໝົດ.

ທັງນີ້, ນະຄອນຊຽງໄຮ້ ໄດ້ປະເຊີນກັບການແຜ່ລະບາດຂອງເຊື້ອກາຍພັນໂອໄມຄຣອນ ມາເປັນເວລາ 1 ເດືອນແລ້ວ ເຖິງວ່າອັດຕາການຕິດເຊື້ອຈະບໍ່ສູງເມື່ອທຽບກັບຕ່າງປະເທດ ຫຼື ມາດຕະຖານສາກົນ ແຕ່ທາງການຂອງນະຄອນຊຽງໄຮ້ ໄດ້ຕັດສິນໃຈປະກາດລັອກດາວ ຫຼັງຈາກທີ່ມີຜູ້ຕິດເຊື້ອເພີ່ມຂຶ້ນເມື່ອທ້າຍອາທິດຜ່ານມາ.