ບໍ່ແກ້ວກຽມແຈ້ງເກີດ ສອງແຫຼ່ງທ່ອງທ່ຽວໃໝ່! ບໍ່ນໍ້າຮ້ອນ ແລະ ນໍ້າຕົກຕາດບ້ານນໍ້າຟ້າ

114

ລາວເຮົາຖືວ່າມີ ແຫຼ່ງທ່ອງທ່ຽວທີ່ຫຼາກຫຼາຍບໍ່ວ່າຈະເປັນທາງ ວັດທະນະທຳ, ປະຫວັດສາດ ແລະ ທຳມະຊາດ ຂຶ້ນກັບກາລະໂອກາດ ແລະຄວາມຢາກໄປຂອງຜູ້ຈະໄປທ່ຽວ ແຕ່ມື້ນີ້ຈະມາແນະນຳສອງແຫຼ່ງທ່ອງທ່ຽວທີ່ກຳລັງຈະເປີດໂຕໃນໄວໆນີ້ຢູ່ແຂວງບໍ່ແກ້ວ.

ຕາມຂ່າວໃຫ້ຮູ້ວ່າໃນກາງເດືອນກຸມພາ 2022 ຫ້ອງການ ຖວທ ເມືອງ ຕົ້ນເຜິ້ງ ແຂວງບໍ່ແກ້ວສົມທົບກັບຄະນະພັກຮາກຖານກຸ່ມບ້ານນາຄໍາ, ພະນັກງານກໍ່ສ້າງຮາກຖານ ແລະ ພໍ່ແມ່ປະຊາຊົນບ້ານນ້ຳຟ້າ ນຳພາໂດຍທ່ານ ຂັນຄຳ ພົງສຸວັນ ເລຂາຄະນະພັກຮາກຖານກຸ່ມບ້ານນາຄຳ ໄດ້ພ້ອມກັນອະນາໄມ ແລະ ປຸກຕູບພັກຢູ່ຂອບເຂດບໍ່ນ້ຳຮ້ອນ ແລະ ນ້ຳຕົກຕາດບ້ານນ້ຳຟ້າ.

ທັງນີ້ກໍ່ເພື່ອກະກຽມໃຫ້ແກ່ການເປີດແຫຼ່ງທ່ອງທ່ຽວທຳມະຊາດດັ່ງກ່າວເປັນທ່ອງທ່ຽວແຫ່ງໃຫມ່ຕາມແຜນການ 5 ປີຂອງເມືອງ ກໍ່ຄືຂອງແຂວງ ທັງເປັນການຮອງຮັບນັກທ່ອງທ່ຽວທັງພາຍໃນ ແລະ ຕ່າງແຂວງທີ່ຈະມາທ່ອງທ່ຽວ ພັກຜ່ອນຢູ່ແຫຼ່ງທຳມະຊາດບໍ່ນ້ຳຮ້ອນ ແລະ ນໍ້າຕົກຕາດດັ່ງກ່າວ ໂດຍສະເພາະເປັນການຕ້ອນຮັບລະດູການທ່ອງທ່ຽວໃນໄລຍະບຸນປີໃໝ່ລາວທີ່ຈະມາເຖິງນີ້

ຕິດພັນກັບການອະນຸລັກແຫຼ່ງຕົ້ນນ້ຳ, ປ່າໄມ້ແບບຍືນຍົງ ແລະ ເປັນການສ້າງວຽກເຮັດງານທຳໃຫ້ແກ່ພໍ່ແມ່ປະຊາຊົນດ້ານການບໍລິການ ເພື່ອສ້າງລາຍເຂົ້າສູ່ຄອບຄົວ ເຮັດໃຫ້ຊີວິດການເປັນຢູ່ນັບມື້ນັບດີຂຶ້ນເທື່ອລະກ້າວ ຕິດພັນກັບແຜນພັດທະນາເສດຖະກິດ – ສັງຄົມ ຂອງແຂວງ ໂດຍສະເພາະແມ່ນເມືອງຕົ້ນເຜິ້ງ ໃຫ້ໄດ້ຮັບການພັດທະນາເປັນກ້າວໆ.

ຈາກ: ໜັງສືພິມບໍ່ແກ້ວ