ວາງສີລາລຶກແລ້ວ ຈະເລີ່ມສ້າງໂຄງການຕົວເມືອງອັດສະລິຍະໃໝ່

74

ຍິນຊື່ນີ້ຫຼາຍຄົນສົນໃຈແນ່ນອນ “ຕົວເມືອງອັດສະລິຍະ” ຈະອອກມາຮູບແບບໃດ ແອັດເອງກໍ່ຍັງນຶກພາບບໍ່ອອກ ແຕ່ແນ່ນອນຕ້ອງໜ້າສົນໃຈຜູ້ພັດທະນາໂຄງການເຊື່ອໂຄງການນນີ້ຈະຊ່ວຍດຶງດູດການທ່ອງທ່ຽວໄດ້ຫຼາຍຂຶ້ນໃນອີກສອງປີຂ້າງໜ້າ.

ສຳລັບການວາງສີລາລຶກ ໄດ້ຈັດຂຶ້ນໃນຕອນເຊົ້າຂອງວັນທີ 13 ມັງກອນ 2022 ນີ້ ທີ່ເຂດນິຄົມອຸດສາຫະກຳ ເມືອງໄຊເສດຖາ ນະຄອນຫຼວງວຽງຈັນ, ເປັນກຽດເຂົ້າຮ່ວມໃນງານພິທີວາງສີລາລຶກໂຄງການຄັ້ງນີ້ມີ ທ່ານ ອາດສະພັງທອງ ສີພັນດອນ, ເຈົ້າຄອງນະຄອນຫຼວງວຽງຈັນ, ທ່ານປະທານ ແລະ ຮອງປະທານກຸ່ມບໍລິສັດ ພົງສະຫວັນ ຈຳກັດ(ຜູ້ພັດທະນາ ໂຄງການຕົວເມືອງອັດສະລິຍະໃໝ່ (Smart city)), ມີຜູ້ຕາງໜ້າບໍລິສັດໃນເຄືອພົງສະຫວັນ, ເຈົ້າເມືອງ, ຮອງເຈົ້າເມືອງ, ພະແນກການທີ່ກ່ຽວຂ້ອງເຂົ້າຮ່ວມ.

["]

ໂຄງການນີ້ພາຍຫຼັງທີ່ໄດ້ເຊັນບົດບັນທຶກຄວາມເຂົ້າໃຈ MOU ສະບັບລົງວັນທີ 28 ກໍລະກົດ 2017, ທ່ານເຈົ້າຄອງນະຄອນຫຼວງວຽງຈັນ ໄດ້ແຕ່ງຕັ້ງຄະນະຮັບຜິດຊອບໂຄງການຕາມຂໍ້ຕົກລົງເລກທີ 0730/ຈນວ, ລົງວັນທີ 31 ສິງຫາ 2017 ເຊິ່ງຄະນະດັ່ງກ່າວເປັນຄະນະຮັບຜິດຊອບຊີ້ນຳການລົງຕິດຕາມກວດກາ ແລະ ຊຸກຍູ້ການດຳເນີນການຈັດຕັ້ງປະຕິບັດບົດບັນທຶກຄວາມເຂົ້າໃຈ (MOU) ເພື່ອເກັບກຳຂໍ້ມູນ, ອອກແບບ ແລະ ສືກສາຄວາມເປັນໄປໄດ້ໃນການລົງທຶນພັດທະນາໂຄງການຕ່າງໆຢູ່ເຂດນິຄົມອຸດສາຫະກຳນະຄອນຫຼວງວຽງຈັນ, ມີໜ້າທີ່ຊີ້ນຳ-ນຳພາການລົງສຳຫຼວດຂອບເຂດທີ່ດິນທີ່ ກຸ່ມບໍລິສັດພົງສະຫວັນ ຈຳກັດ ທີ່ສຶກສາຄວາມເປັນໄປໄດ້ໃນການລົງທຶນຢູ່ເຂດນິຄົມອຸດສາຫະກຳນະຄອນຫຼວງວຽງຈັນໃນເນື້ອທີ 300 ເຮັກຕາ ພ້ອມທັງນຳພາໄກ່ເກ່ຍຂໍ້ຂັດແຍ່ງກັບເຈົ້າຂອງດິນເດີມຢ່າງສົມເຫດສົມຜົນໃນຮູບແບບຕ່າງຝ່າຍຕ່າງມີຄວາມເພິ່ງພໍໃຈຕໍ່ກັນ.

ພື້ນທີ່ດັ່ງກ່າວກວມເອົາ 5 ເຂດຄື: ເຂດທີ່ພັກອາໄສແລະການຄ້າ, ເຂດສາທາລະນະແລະຂົນສົ່ງໂດຍສານ, ເຂດການຄ້າ, ບໍລິການຕ່າງໆ ແລະ ເຂດການຄ້າສາກົນ, ເຂດພື້ນທີ່ສີຂຽວ, ເຊິ່ງໂຄງການດັ່ງກ່າວແມ່ນນອນຢູ່ໃນໂຄງການນິຄົມອຸດສາຫະກຳນະຄອນຫຼວງວຽງຈັນ 1,376 ເຮັກຕາ. ກຸ່ມບໍລິສັດພົງສະຫວັນ ຈຳກັດ ພວກເຮົາໄດ້ລົງເກັບກໍາຂໍ້ມູນຕົວຈິງຈາກເຂດນິຄົມອຸດສາຫະກຳ ເພື່ອມາສຶກສາ, ຄົ້ນຄວ້າ, ວິເຄາະເຖິງດ້ານຕ່າງໆໃນການພັດທະນາເສດຖະກິດຂອງເຂດນິຄົມອຸດສາຫະກຳ ເມືອງ ໄຊເສດຖາ ບົນພື້ນຖານວິໄສທັດການພັດທະນາແບບຢືນຍົງ.

ໃນໄລຍະເບື້ອງຕົ້ນແມ່ນຈະພັດທະນາໂຄງໃນເນື້ອທີ່ 20 ເຮັກຕາຕາມແຜນຜັງຂອງບໍລິສັດ SURBANAJURONG ຂອງປະເທດສິງກະໂປ ທີ່ອອກແບບໃຫ້ແຕ່ປີ 2017 ເປັນຕົວເມືອງທັນສະໄໝ, ເປັນຕົວແບບຂອງນະຄອນຫຼວງກ່ອນ ຈາກນັ້ນຈະສຶບຕໍ່ພັດທະນາຕົວເມືອງອັດສະລິຍະໃໝ່ອອກໄປຕື່ມອີກ ໃນເນື້ອທີ່ 280 ເຮັກຕາສ່ວນທີ່ຍັງເຫຼືອ.

ໃນພິທີວາງສີລາລຶກການກໍ່ສ້າງຕົວເມືອງອັດສະລິຍະໃໝ່ (Smart city) ທາງກຸ່ມບໍລິສັດພົງສະຫວັນ ຈຳກັດ ຈະບໍ່ຢຸດພຽງແຕ່ກິດຈະກໍານີ້ ແຕ່ແຜນງານແມ່ນຍັງຈະສືບຕໍ່ພັກດັນໃຫ້ກາຍເປັນເຂດການຄ້າ ແລະ ບໍລິການທີ່ທັນສະໄໝທີ່ສຸດ ປະກອບມີຕຶກອາຄານ, ສຳນັກງານ ເຂດທີ່ພັກອາໄສ ແລະ ການຄ້າ, ເຂດສາທາລະນະສຸກ ແລະ ຂົນສົ່ງໂດຍສານ, ເຂດການຄ້າ ແລະ ບໍລິການ, ເຂດການຄ້າສາກົນ, ແລະ ເຂດພື້ນທີ່ີສີຂຽວ…ໂດຍມີເປົ້າໝາຍໃຫ້ສາມາດດຶງດູດນັກທ່ອງທ່ຽວຈາກພາຍໃນ ແລະ ຕ່າງປະເທດໃຫ້ໄດ້ຫຼາຍຂື້ນໃນໜຶ່ງຫາສອງປີຂ້າງໜ້າ, ຫລຸດຜ່ອນຄ່າຄອງຊີບພາຍໃນນະຄອນຫຼວງວຽງຈັນ ແລະ ສ້າງວຽກເຮັດງານທໍາໃຫ້ແກ່ປະຊາຊົນຊາວນະຄອນຫຼວງວຽງຈັນມີອາຊີບທີ່ແນ່ນອນອີກດ້ວຍ.

ພາບຈາກ: ອາ ລາວຈະເລີນ ສະຕູດີໂອ