ສຕລ ທອດຖອນບົດຮຽນຈາກ ຊູຊູກິ ຄັບ 2020 ໄດ້ 6 ປັດໄຈທີ່ພາໃຫ້ ທີມຊາດລາວ ຜົນງານຕົກຕໍ່າ

67

ສະຫະພັນບານເຕະແຫ່ງຊາດລາວ ( ສຕລ ) ທອດຖອນບົດຮຽນໄດ້ຈາກ AFF SUZUKI CUP 2020 ທີ່ທີມຊາດລາວ ຊຸດໃຫຍ່ ສ້າງຜົນງານຕົກຕໍ່າຍ້ອນຫຼາຍປັດໄຈ ຈົນຫຼ້າສຸດແຕ່ງຕັ້ງຫົວໜ້າຄູຝຶກຄົນໃໝ່ເປັນ ທ່ານ Michael Weiss ຄູຝຶກຊາວເຢຍລະມັນ ອາຍຸ 56 ປີ ເປັນຫົວໜ້າຄູຝຶກທີມຊາດລາວ ຊຸດໃຫຍ່ ພ້ອມກັບຮຸ່ນອາຍຸບໍ່ເກີນ 23 ປີ.

ສະຫະພັນບານເຕະແຫ່ງຊາດລາວ (ສຕລ) ຖະແຫຼງຂ່າວຕໍ່ສື່ມວນຊົນລາວ ໃນຕອນແລງຂອງວັນທີ 7 ມັງກອນ 2022 ຢູ່ທີ່ຫ້ອງປະຊຸມ ສູນຝຶກ ສະຫະພັນບານເຕະແຫ່ງຊາດລາວ ສະໜາມກີລາແຫ່ງຊາດ ຫຼັກ 16 ບ້ານດົງສ້າງຫີນ ເມືອງໄຊທານີ ນະຄອນຫຼວງວຽງຈັນ ໃຫ້ກຽດເຂົ້າຮ່ວມໂດຍມີ ທ່ານ ຄໍາແພງ ວົງຂັນຕີ ຮອງປະທານ ສະຫະພັນບານເຕະແຫ່ງຊາດລາວ, ທ່ານ ພັອ ຖາວອນ ຫຼວງຈັນດາວົງ, ແລະ ທ່ານ ນາງ ກັນຍາ ແກ້ວມະນີ ເລຂາທິການ ສະຫະພັນບານເຕະແຫ່ງຊາດລາວ ພ້ອມດ້ວຍຄະນະ ແລະ ສື່ມວນຊົນເຂົ້າຮ່ວມ.

["]

ໂອກາດດັ່ງກ່າວ ທ່ານ ນາງ ກັນຍາ ແກ້ວມະນີ ເລຂາທິການ ສະຫະພັນບານເຕະແຫ່ງຊາດລາວ ໄດ້ກ່າວວ່າ: ສໍາລັບ ການແຂ່ງຂັນບານເຕະ AFF SUZUKI CUP 2020 ລະຫວ່າງ ວັນທີ 5 ທັນວາ 2021 – 1 ມັງກອນ 2022 ທີມຊາດລາວ ພາຍໃຕ້ການນໍາທີມຂອງ ທ່ານ V.selvaraj ແມ່ນແຂ່ງຂັນ 4 ນັດ ແລະ ບໍ່ສາມາດຍາດໄຊຊະນະໄດ້ຈັກນັດ ເນື່ອງຈາກຫຼາຍປັດໄຈດັ່ງນີ້:
1.ການແຂ່ງຂັນຢູ່ໃນພາຍໃນປະເທດໄດ້ຖືກໂຈະຕັ້ງແຕ່ປີທີ່ຜ່ານມາຈົນເຖິງປັດຈຸບັນ ເນື່ອງຈາກການລະບາດພະຍາດໂຄວິດ ແລະ ບໍ່ສາມາດໄປແຂ່ງຂັນໃນປະເທດອື່ນໄດ້ເລີຍ

2.ຄູ່ແຂ່ງມີຄວາມພ້ອມຂອງຄູ່ແຂ່ງມີຫຼາຍກ່ວາ ທີມຊາດລາວ ໃນກຸ່ມດຽວກັນຄື:
-ທີມຊາດຫວຽດນາມ: ມີສະໂມສອນອາຊີບເຖິງ 14 ສະໂມສອນ
-ມາເລເຊຍ: ມີສະໂມສອນອາຊີບເຖິງ 12 ສະໂມສອນ
-ອິນໂດເນເຊຍ: ມີສະໂມສອນອາຊີບເຖິງ 18 ສະໂມສອນ
-ກໍາປູເຈຍ: ມີສະໂມສອນອາຊີບເຖິງ 13 ສະໂມສອນ
-ລາວ: ແມ່ນບໍ່ມີສະໂມສອນບານເຕະອາຊີບ ເຊິ່ງໃນລີກສູງສຸດຂອງລາວ ແມ່ນສະໂມສອນເຄິ່ງອາຊີບມີພຽງ 5 ສະໂມສອນ

3.ນັກເຕະຄູ່ແຂ່ງຢູ່ກັບຕົ້ນສັງກັດລີກຂອງສາກົນ:
-ມາເລເຊຍ: ມີນັກເຕະອາຊີບຢູ່ໃນລີກຂອງ ແບນຊິກ, ດານມາກ, ໄທ ແລະ ບຣາຊິິລ
-ອິນໂດເນເຊຍ: ມີນັກເຕະອາຊີບຢູ່ໃນລີກຂອງ ອັງກິດ, ສະໂລວາກີ, ມາເລເຊຍ ແລະ ສ ເກົາຫຼີ
-ລາວ: ມີນັກເຕະມາຈາກລີກອາຊີບມີພຽງ ບິລລີ ຈາກລີກຝຣັ່ງ, ສ່ວນອີກ 3 ຄົນແມ່ນຢູ່ລີກປະເທດໄທ

4.ເວລາຝຶກຊ້ອມກັບທີມຊາດລາວຂອງ 4 ນັກເຕະລາວ ຈາກລີກຕ່າງປະເທດ ມີພຽງ 3 ວັນເທົ່ານັ້ນ
5.ການຄັດເລືອກນັກກີລາຂອງທີມຊາດລາວ ຄັ້ງນີ້ແມ່ນມີຕົວເລືອກໜ້ອຍ ອາຍຸສະເລ່ຍ 22 ປີເທົ່ານັ້ນ ແລະ ມີປະສົບການກັບທີມຊາດຊຸດໃຫຍ່ບໍ່ຫຼາຍ ເຊິ່ງການເຂົ້າສູນພາຍໃນໄລຍະເວລາ 3 ເດືນແມ່ນບໍ່ພຽງພໍກັບທີມຊາດຊຸດໃຫຍ່ ແບບນີ້, ສ່ວນນັກກີລາທີ່ມີປະສົບການໃນເມື່ອກ່ອນຈໍານວນປະມານ 45 ຄົນແມ່ນບໍ່ສາມາດເຂົ້າຮ່ວມທີມຊາດລາວ ເນື່ອງຈາກຖືກ ຟີຟາ ລົງໂທດບໍ່ໃຫ້ຫຼິ້ນບານເຕະລາຍການທາງການຕະຫຼອດຊີວິດ ຍ້ອນມີການລົ້ມບານໃນຫຼາຍປີທີ່ຜ່ານມາ.

6.ທາງດ້ານຄູຝຶກແມ່ນອີງຕາມງົບປະມານທີ່ມີການຈໍາກັດຂອງພວກເຮົາ ສາມາດຈ້າງຄູຝຶກທີ່ມາຈາກຕ່າງປະເທດ 3 ທ່ານຄື: ຈາກສິງກະໂປ 2 ທ່ານ ແລະ ຄູຝຶກຜູ້ຮັກສາປະຕູຈາກ ມຽນມາ 1 ທ່ານ ລວມທັງມີຜູ້ຊ່ວຍຄູ່ຝຶກທີ່ເປັນຄົນລາວ 2 ທ່ານ ກົງກັນຂ້າມກັບ ທີມຊາດອື່ນໆທີ່ຢູ່ໃນສາຍພວກເຮົາແມ່ນມີງົບປະມານພຽງພໍໃນການຈ້າງຄູຝຶກທີ່ມີປະສົບການສູ ແລະ ມີຄວາມສາມາດ ບໍ່ວ່າຈະເປັນຈາກ ສ. ເກົາຫຼີ ແລະ ຍີ່ປຸ່ນ.
ອີງໃສ່ເງື່ອນໄຂທີ່ກ່າວມາຂ້າງເທິງທາງ ຄູຝຶືກຈິ່ງໄດ້ວາງກົນລະຍຸດຕັ້ງຮັບ ແລະ ສວນກັບໄວ ແຕ່ຍ້ອນປະສົບການໜ້ອຍ ແລະ ທັກສະຂອງນັກກີລາລາວແຕ່ຄົນບໍ່ສູງ ຈິ່ງບໍ່ສາມາດປະສົບຜົນສໍາເລັດຕາມທີ່ໄດ້ວາງໄວ້.
ຂ່າວ-ຮູບ: ຫຼ້າ MKP ໜັງສືພິມເສດຖະກິດ-ການຄ້າ
ເບິ່ງຄລິບເພີ່ມຕື່ມໄດ້ທີ່: