60 ປີ ລາວ ແລະ ມົງໂກລີ ໄດ້ສ້າງຕັ້ງສາຍພົວພັນທາງການທູດຮ່ວມກັນ

142

ເຊື່ອວ່າມີຫຼາຍຄົນກໍ່ຄົງຍັງຈະບໍ່ຮູ້ວ່າ ສປປ ລາວ ແລະ ມົງໂກລີ ມີສາຍພົວພັນທາງການທູດມາຍາວນານເຖິງ 60 ປີແລ້ວ, ເຊິ່ງວ່າທ່ານນາງ ໃບຄຳ ຂັດທິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ) ພ້ອມຄະນະ ໄດ້ຕ້ອນຮັບການເຂົ້າຢ້ຽມ ຂອງ ທ່ານ ບຽມບາຊູເຮນ ຈຳສຣັງ Byambasnren Jamsran ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງປະເທດມົງໂກລີ ຄົນໃໝ່ ປະຈຳ ສປປ ລາວ.

ໃນວັນທີ 7 ມັງກອນນີ້ ທີ່ ກະຊວງດັ່ງກ່າວ ໃນໂອກາດດັ່ງກ່າວ, ທ່ານ ນາງ ໃບຄຳ ຂັດທິຍະ ກໍໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ ທ່ານ ບຽມບາຊູເຮນ ຈຳສຣັງ ທີ່ໄດ້ຖືກແຕ່ງຕັ້ງມາປະຕິບັດໜ້າທີ່ ດຳລົງຕຳແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງປະເທດມົງໂກລີ ຄົນໃໝ່ ປະຈຳ ສປປ ລາວ ຊຶ່ງມີສຳນັກງານຕັ້ງຢູ່ນະຄອນຫຼວງວຽງຈັນ.

ລາວ ແລະ ມົງໂກລີ ໄດ້ສ້າງຕັ້ງສາຍພົວພັນທາງການທູດນຳກັນ 60ປີ ໃນວັນທີ 2 ກັນຍາ ປີ 1962 ຊຶ່ງເປັນການປະກອບສ່ວນອັນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງ ສປປ ລາວ ແລະ ມົງໂກລີ ໃຫ້ຂະຫຍາຍຕົວຍິ່ງໆຂຶ້ນ, ໂດຍສະເພາະເພື່ອເສີມຂະຫຍາຍການພົວພັນຮ່ວມມື ລະຫວ່າງ ກະຊວງແຮງງານ ແລະ ສະຫວັດດີການສັງຄົມ ແຫ່ງ ສປປ ລາວ ແລະ ກະຊວງແຮງງານແລະ ການພັດທະນາ ມົງໂກລີ ໃຫ້ເປັນຮູບປະທຳໃນອານາຄົດ ຄວນໄດ້ມີການພົບປະແລກປ່ຽນໃນຂົງເຂດແຮງງານ, ສະຫວັດດີການສັງຄົມ ແລະ ກົດໝາຍໃຫ້ມີກອບຫຼັກການ ແລະ ມີປະສິດທິຜົນຍິ່ງໆຂຶ້ນໃນຕໍ່ໜ້າ.

ໃນໂອກາດດຽວກັນ ທ່ານ ເອກອັກຄະລັດຖະທູດກໍໄດ້ສະແດງຄວາມຂອບອົກຂອບໃຈຕໍ່ ທ່ານລັດຖະມົນຕີ ທີ່ໄດ້ໃຫ້ການຕ້ອນຮັບຢ່າງອົບອຸ່ນໃນຄັ້ງນີ້ ແລະ ກ່າວຢືນຢັນວ່າ ຈະໃຫ້ການສະໜັບສະໜູນ ແລະ ຕັ້ງໜ້າປະຕິບັດໜ້າທີ່ຂອງຕົນໃຫ້ດີທີ່ສຸດ ເພື່ອເສີມຂະຫຍາຍສາຍພົວພັນ ແລະ ການຮ່ວມມືລະຫວ່າງ ມົງໂກລີ ແລະ ສປປ ລາວ ໃຫ້ນັບມື້ຂະຫຍາຍຕົວຍິ່ງໆຂຶຶ້ນ.