ເມືອງຄົງເຊໂດນ ຈັດກິດຈະກຳລ່ອງເຮືອ ຊົມສວນໝາກແຕງ ເປັນປີທີ 2

325

ເມືອງຄົງເຊໂດນ ແຂວງສາລະວັນ ເປີດບໍລິການກິດຈະກຳລ່ອງເຮືອຕາມແມ່ນ້ຳເຊໂດນ ເປັນປີທີ 2 ເພື່ອເປັນການສືບຕໍ່ສົ່ງເສີມທາງດ້ານການທ່ອງທ່ຽວ ພາຍຫຼັງໄດ້ເປີດກິດຈະກຳດັ່ງກ່າວມາແລ້ວໃນປີຜ່ານມາ ໄດ້ສ້າງຄວາມສົນໃຈຕໍ່ກັບນັກທ່ອງທ່ຽວ ແລະ ປະຊາຊົນລຽບຕາມແມ່ນ້ຳເຊໂດນ ເປັນຢ່າງດີ ເຊິ່ງໄດ້ເຮັດໃຫ້ການຊື້-ຂາຍ ຜະລິດຕະພັນ, ພຶດຜັກ, ຜົນລະປູກຕ່າງໆຂອງປະຊາຊົນ ມີບັນຍາກາດຄຶກຄື້ນ.

ສໍາລັບສະຖານທີ່ຂຶ້ນລ່ອງເຮືອແພແມ່ນຢູ່ຈຸດຂົວຂ້າມນໍ້າເຊໂດນ ບ້ານຄໍາທອງ, ບ້ານເມືອງເກົ່າ ແລ້ວລ່ອງເຮືອໄປຕາມແມ່ນນໍ້າເຊໂດນ ຊົມທຳມະຊາດສອງພາກຝັ່ງຕາມລຳນໍ້າເຊໂດນ ຕິດພັນກັບທ່ຽວຊົມສວນໝາກແຕງ, ໝາກຖົ່ວ, ສາລີ ແລະ ສວນພືດຜັກອື່ນໆອີກຢ່າງຫຼວງຫຼາຍ, ການດໍາລົງຊີວິດຂອງພໍ່ແມ່ປະຊາຊົນໃນ 7 ບ້ານ ຄື: ບ້ານໂອກາດໃຫຍ່, ບ້ານໂອກາດນ້ອຍ, ໜອງຄຸລຸ, ໜອງແຕງ, ຫ້ວຍເຊົາ, ຫາດດູ່ ແລະ ບ້ານຕານດ່ຽວ.

ສຳລັບເຮືອ ທີ່ມີໄວ້ບໍລິການ ມີ 5 ລຳ, ມີໄລຍະການລ່ອງເຮືອ ເກືອບ 5 ກິໂລແມັດ, ມີຕູບໄວ້ບໍລິການ 80 ຕູບ ແລະ ມີບັນດາຮ້ານຂ້າຍເຄື່ອງຈຳນວນໜຶ່ງ ເພື່ອໃຫ້ຜູ້ທີ່ມາທ່ຽວຊົມ, ຈັບຈ່າຍຊື້-ຂາຍ ໄດ້ພັກຜ່ອນ ແລະຊີມອາຫານພື້ນບ້ານຂອງພໍ່ແມ່ປະຊາຊົນ ເພື່ອເປັນການຊຸກຍູ້ການພັດທະນາເສດຖະກິດ-ສັງຄົມຂອງເມືອງ ໃຫ້ມີການຂະຫຍາຍຕົວ ຕາມທ່າແຮງບົ່ມຊ້ອນຂອງເມືອງ ໃຫ້ດີຂຶ້ນເປັນກ້າວໆ.

ໂອກາດດັ່ງກ່າວ, ທ່ານ ສະໄໝ ໂພທິສານ ເຈົ້າເມືອງໆຄົງເຊໂດນ ໃຫ້ສຳພາດວ່າ: ສຳລັບການລ່ອງເຮືອແພ ໃນຄັ້ງນີ້ ແມ່ນເປັນການສືບຕໍ່ຊຸກຍູ້ ແລະ ສົ່ງເສີມທາງດ້ານການທ່ອງທ່ຽວ ຕິດພັນກັບສົ່ງເສີມການຜະລິດກະສິກຳຂອງພໍ່ແມ່ປະຊາຊົນ. ຈາກນັ້ນ, ທ່ານຍັງໄດ້ຮຽກຮ້ອງໃຫ້ທຸກພາກສ່ວນໃນສັງຄົມ ມາລ່ອງແພ ຊົມສວນໝາກແຕງ ຕາມລຳນ້ຳເຊໂດນ ໃຫ້ມີບັນຍາກາດມ່ວນຊື່ນ ແລະ ຟົດຟື້ນ.

ພິທີດັ່ງກ່າວແມ່ນໄດ້ຈັດຂື້ນໃນວັນທີ 5 ມັງກອນ 2022 ຢູ່ທີ່ທ່ານໍ້າ ບ້ານທ່າ ເມືອງຄົງເຊໂດນ ໂດຍໃຫ້ກຽດເຂົ້າຮ່ວມຂອງ ທ່ານ ສົມໃຈ ອຸ່ນຈິດ ຮອງເຈົ້າແຂວງໆສາລະວັນ ຜູ້ຊີ້ນໍາວຽກງານວັດທະນະທຳສັງຄົມ, ມີທ່ານ ສະໄໝ ໂພທິສານ ເຈົ້າເມືອງໆຄົງເຊໂດນ ແຂກຖືກເຊີນຈາກແຂວງ ແລະ ເມືອງ, ອຳນາດການປົກຄອງບ້ານ ແລະພໍ່ແມ່ປະຊາຊົນເຂົ້າຮ່ວມ.

ພາບ-ຂ່າວ: ສິດຕາ ເພັດວົງສາ