ສຳນັກຂ່າວຕ່າງປະເທດລາຍງານວ່າ: ອົງການອະນາໄມໂລກ (WHO) ເຕືອນວ່າ ເຖິງແມ່ນວ່າ ຜູ້ຕິດເຊື້ອໂຄວິດ-19 ສ່ວນຫຼາຍຈະຟື້ນຕົວພາຍໃນ 5-7 ວັນ ຫຼັງຈາກມີອາການ ແຕ່ WHO ຍັງຄົງແນະນຳໃຫ້ກັກຕົວຈົນຮອດ 14 ວັນ ແຕ່ໄລຍະເວລາການກັກຕົວຈະຕ້ອງເບິ່ງຈາກສະຖານະການແຕ່ລະບຸກຄົນ.
ທ່ານ ອັບດີ ມາຮາມຸດ ທີມສະໜັບສະໜູນຈັດການກັບໂຄວິດ-19 ຂອງອົງການອະນາໄມໂລກ ກ່າວວ່າ: ໃນບັນດາປະເທດທີ່ມີຈຳນວນຜູ້ຕິດເຊື້ອຕ່ຳ ໄລຍະເວລາການກັກຕົວນານຂຶ້ນ ອາດຊ່ວຍຈຳນວນຜູ້ຕິດເຊື້ອໃຫ້ຢູ່ໃນລະດັບຕ່ຳສຸດເທົ່າທີ່ຈະເປັນໄປໄດ້ ແນວໃດກໍຕາມ ໄລຍະເວລາການກັກຕົວສັ້ນລົງ ອາດເປັນເລື່ອງເໝາະສົມ ເພື່ອໃຫ້ກິດຈະກຳທາງເສດຖະກິດຂອງປະເທດເດີນໜ້າຕໍ່ໄປໄດ້.
ທັງນີ້ ຂໍ້ມູນຈາກ WHO ລະບຸວ່າ ມາຮອດທ້າຍປີ 2021 ຢ່າງໜ້ອຍ 130 ປະເທດ ທີ່ມີລາຍງານການຕິດເຊື້ອກາຍພັນໂອມີຄຣອນ, ຂະນະທີ່ປະເທດອາຟຣິກກາໃຕ້ ເຊິ່ງເປັນປະເທດທຳອິດທີ່ກວດພົບເຊື້ອກາຍພັນດັ່ງກ່າວ ໂດຍໄລຍະເລີ່ມຕົ້ນ ມີຜູ້ຕິດເຊື້ອເພີ່ມຂຶ້ນຢ່າງໄວວາ ແຕ່ຫຼັງຈາກນັ້ນ ຈຳນວນຜູ້ຕິດເຊື້ອຫຼຸດລົງຢ່າງໄວວາ, ຂະນະທີ່ອັດຕາການເຂົ້າປິ່ນປົວຢູ່ໂຮງໝໍ ແລະ ອັດຕາການເສຍຊີວິດກໍຢູ່ໃນລະດັບຕ່ຳ ແຕ່ສະຖານະການອາດຈະບໍ່ເປັນໄປໃນທາງດຽວກັນໃນບາງປະເທດ.
ທັງນີ້ ຜົນການສຶກສາຫຼາຍສະບັບບົ່ງຊີ້ວ່າ ສາຍພັນໂອມີຄຣອນ ສົ່ງຜົນຕໍ່ລະບົບທາງເດີນຫາຍໃຈສ່ວນເບື້ອງເທິງຫຼາຍກວ່າ ແທນທີ່ຈະເປັນປອດ ເຊິ່ງນັບວ່າເປັນຂ່າວດີ ແຕ່ສຳລັບກຸ່ມຄົນທີ່ມີຄວາມສ່ຽງສູງ ແລະ ບຸກຄົນທີ່ຍັງບໍ່ທັນໄດ້ຮັບວັກແຊັງ ອາດຈະມີອາການຮຸນແຮງກໍເປັນໄດ້.
