ສຳນັກຂ່າວຕ່າງປະເທດ ລາຍງານວ່າ ທ່ານ ອິສມາອີລ ຊາບຣີ ຢາຄ໊ອບ ນາຍົກລັດຖະມົນຕີມາເລເຊຍ ເປີດເຜີຍວ່າ: ລັດຖະບານມາເລເຊຍໄດ້ຕັ້ງງົບປະມານ ເພື່ອປະຊາຊົນຜູ້ທີ່ໄດ້ຮັບຜົນກະທົບຈາກໄພນໍ້າຖ້ວມ ເມື່ອເດືອນທັນວາ 2021 ໃນວົງເງິນ 1,4 ພັນລ້ານຣິງກິດ ຫຼື ປະມານ 334,93 ລ້ານໂດລາສະຫະລັດ, ນອກຈາກນີ້ ຍັງຊ່ວຍເຫຼືອໃນຮູບແບບອື່ນໆແກ່ຜູ້ໄດ້ຮັບຜົນກະທົບຕື່ມອີກ.
ນາຍົກລັດຖະມົນຕີມາເລເຊຍ ກ່າວວ່າ: ມາດຕະການຊ່ວຍເຫຼືອຂອງລັດຖະບານ ຈະມີທັງການໃຫ້ເງິນຊ່ວຍເຫຼືອໂດຍກົງກັບຄົວເຮືອນທີ່ໄດ້ຮັບຜົນກະທົບຢ່າງໜ້ອຍ 30.000 ຄົວເຮືອນ, ຊ່ວຍເຫຼືອກໍລະນີຜູ້ເສຍຊີວິດ, ຊົດເຊີຍຄ່າສາທາລະນຸປະໂພກ ແລະ ຄ່າສ້ອມແປງພາຫະນະ. ນອກຈາກນີ້ ຍັງມີກອງທຶນສຳລັບການອະນາໄມທຳຄວາມສະອາດ ແລະ ຟື້ນຟູຫຼັງນ້ຳຖ້ວມ ໂດຍສະເພາະໃນແຂວງສະລັງງໍ ແລະ ປະຫັງ ທີ່ໄດ້ຮັບຜົນກະທົບຫຼາຍທີ່ສຸດ.
ທັງນີ້ ເມື່ອກາງເດືອນທັນວາ ທີ່ຜ່ານມາ ມາເລເຊຍໄດ້ຖືກນ້ຳຖ້ວມຫຼາຍແຂວງ ເຮັດໃຫ້ມີປະຊາຊົນປະມານ 70.000 ຄົນຕ້ອງອົບພະຍົກໜີນ້ຳ ແລະ ມີຜູ້ເສຍຊີວິດຢ່າງໜ້ອຍ 48 ຄົນໃນ 8 ແຂວງທີ່ຖືກນ້ຳຖ້ວມ.
