ວ້າວ! ຫນຸ່ມກ້າມແຫນ້ນ ແຖມມີສະເຫນ່ທີ່ຮອຍຍິ້ມ ຄວ້າຕຳແຫນ່ງອັນຊົງກຽດຈາກເວທີປະກວດຊາຍງາມມາຄອງຈົນໄດ້ ໃນ Mister Laos Mister international Laos 2021 ແລະ ຫນຸ່ມທີ່ເຮົາກຳລັງເວົ້າເຖິງຢູ່ນີ້ກໍ່ຄື ຄຳພູວົງ ຂານສະຫງ່າ ຫຼື ໂດ້ ຜູ້ຊະນະເລີດໃນເວທີຊາຍງາມ ແລະ ໄດ້ຕຳແຫນ່ງ Mister international Laos 2021 ແລະ ທີ່ສຳຄັນກໍ່ເປັນທີ່ຖືກອົກຖືກໃຈຂາເຊຍເປັນທີ່ສຸດ ເພາະຕົງໃຈ ແລະ ເຫມາະສົມແຮງກັບຕຳແຫນ່ງນີ້ຫລາຍ.
ມາທຳຄວາມຮູ້ຈັກກັບຫນຸ່ມຄົນນີ້ໃຫ້ເລິກຂຶ້ນກວ່າເກົ່າເລີຍ ສໍາລັບ ຫນຸ່ມ ຄຳພູວົງ ຂານສະຫງ່າ ຫຼື ໂດ້ ໄດ້ແກ່ໝາຍເລກ 18 ປັດຈຸບັນອາຍຸ 22 ປີ ຕົວແທນຈາກນະຄອນຫຼວງວຽງຈັນ ເປັນນັກສຶກສາຈົບໃໝ່ຈາກປະເທດຈີນ ສາຂາສະຖາປັດຕະຍະກໍາ ແລະ ຍັງເປັນເທຣນເນີຟິດເນັດອີກດ້ວຍ ບໍ່ແປກໃຈທີ່ຫຸ່ນດີກ້າມແຫນ້ນ ຈົນມັດໃຈແຟນໆຢູ່ຫມັດເລີຍ.
ຜ່ານມາຫນຸ່ມຄົນນີ້ແມ່ນບໍ່ເຄີຍເຂົ້າປະກວດເວທີໃດມາກ່ອນເລີຍ ແລະ ເປັນອີກຫນຶ່ງຄົນທີ່ມີຄວາມໃຝ່ຝັນໃນເວທີນີ້ຄືຢາກເປັນຜູ້ຊະນະໃນຕຳແໜ່ງໃດໜຶ່ງຂອງເວທີນີ້ ແລະ ຢາກເກັບກ່ຽວປະສົບການໃຫ້ຫຼາຍທີ່ສຸດ ເພື່ອພັດທະນາຕົນເອງໃຫ້ດີຂຶ້ນກວ່າເກົ່າ, ໂດຍເຄີຍໃຫ້ສຳພາດວ່າ: ເລື່ອງຂອງວົງການບັນເທີງແມ່ນບໍ່ຄ່ອຍມີປະສົບການດ້ານນີ້ປານໃດ ຍັງຕ້ອງໄດ້ຮຽນຮູ້ຫຼາຍໆຢ່າງ ເພື່ອຊ່ວຍໃນການຕັດສິນໃຈ ແລະ ຈະສ້າງຜົນງານທີ່ດີຂຶ້ນເລື້ອຍໆ ແຕ່ມື້ນີ້ໂດ້ກໍ່ໄດ້ເຮັດສຳເລັດ ສາມາດຄວ້າຕຳແຫນ່ງ The winer Mister International 2021 ໄປຄອງໄດ້ດ້ວຍຄວາມຈົບງາມ.
ຄຳຄົມຂອງໂດ້ປະຈຳໃຈແມ່ນ “ ຄົນທີ່ບໍ່ເຄີຍເຮັດຜິດພາດ ຄືຄົນທີ່ບໍ່ເຄີຍພະຍາຍາມລອງສິ່ງໃໝ່ໆ ”
ສໍາລັບຈຸດເດັ່ນຂອງຫນຸ່ມຄົນນີ້ ເປັນຄົນທີ່ມີຄວາມໝັ້ນໃຈ, ຄວາມກ້າທີ່ຈະສະແດງອອກ, ມີໄຫວພິບ, ພ້ອມທັງມີສາຍຕາທີ່ສື່ຈິງໃຈສື່ອາລົມອອກຄວາມຮູ້ສຶກອອກມາໄດ້ດີ ແລະ ທີ່ສຳຄັນມີທັກສະໃນການຕອບຄຳຖາມໄດ້ດີຈຶ່ງບໍ່ແປກໃຈເລີຍທີ່ເຮັດໃຫ້ສາມາດເອົາຊະນະໃຈ ຄະນະກຳມະການ ແລະ ຄວ້າຕຳແຫນ່ງມາຄອງຈົນໄດ້.
ເປົ້າຫມາຍຂອງໂດ້ຫລັງຈາກໄດ້ຮັບຕຳແຫນ່ງ ຄືການຢາກເປັນແບບຢ່າງທີ່ດີໃຫ້ກັບສັງຄົມ ນັ້ນກໍຄືການຊ່ວຍຫຼືອທີ່ເປັນການກຸສົນ ໂດຍສະເພາະແມ່ນເດັກທີ່ດ້ອຍໂອກາດ ເພື່ອສ້າງໃຫ້ເປັນຄົນຮຸ່ນໃໝ່ເປີດໂອກາດໃຫ້ກັບຕົວເອງໄດ້ລອງເຮັດສິ່ງໃໝ່ໆ ໂດຍສະເພາະແມ່ນການພັດທະນາບຸກຄະລິກກະພາບ ໃຫ້ມີຄວາມໂດດເດັ່ນເປັນຂອງຕົວເອງ ເພື່ອຮັບໃຊ້ປະເທດຊາດ ແລະ ສັງຄົມຕໍ່ໄປ.
ກິດຈະກຳຍາມວ່າງແມ່ນມັກອອກກຳລັງກາຍ, ລອຍນ້ຳ, ຕີດອກປີກໄກ່, ເຕະບານ, ຕີບານ ແລະ ເວລາສ່ວນໃຫຍ່ແມ່ນການເຂົ້າຟິດເນັດ ຫຼັງຈາກຟິດເນັດແລ້ວແມ່ນອ່ານປຶ້ມ ແລະ ຫາຄວາມຮູ້ເລັກໜ້ອຍໃນອິນເຕີເນັດ
ສ່ວນເລື່ອງການແຕ່ງຕົວແມ່ນແຕ່ງສະບາຍສະບາຍ, ກິນງ່າຍ, ຢູ່ງ່າຍ ເປັນກັນເອງກັບທຸກຄົນລົມນຳໄດ້ທຸກເລື່ອງ ຊ່ອງທາງການຕິດຕາມຜົນງານແມ່ນສາມາດເຂົ້າໄປຕິດຕາມໄດ້ທີ່ ເຟສບຸກສ່ວນຕົວ P’dodo Khamphouvong Khansanga.
ຮູບ: Mister Laos Mister international Laos 2021