ເນື່ອງຈາກການແຜ່ລະບາດຂອງພະຍາດໂຄວິດ-19 ຢູ່ ສປປ ລາວເຮົາ ຍັງໜັກໜ່ວງຂຶ້ນນັບມື້ ການລ້າງມື, ໃສ່ຜ້າປິດປາກ ຍັງເປັນມາດຕະການທີ່ຕ້ອງປະຕິບັດໃຫ້ເປັນຄວາມຊິນເຄີຍຕາມວິຖີຊີວິດໃໝ່ ເລື່ອງຂອງຜ້າປິດປາກ ເຈວລ້າງມື ແມ່ນຈໍາເປັນ ທີ່ທຸກຄົນຕ້ອງມີໄວ້ຕິດຕົວ ສະນັ້ນແລ້ວຫາກໄດ້ສິ່ງທີ່ດີ ແລະ ມີຄຸນນະພາບມາດຕະຖານກໍຈະສາມາດປ້ອງກັນ ຊ່ວຍເຮົາໄດ້ ແຕ່ຖ້າຊື້ໄດ້ຂອງແປກປອມມາກໍ່ໝາຍເຖິງຄວາມສ່ຽງເຮົາເພີ່ມຂຶ້ນ.
ດັ່ງນັ້ນ, ເພື່ອເປັນການເຕືອນສະຕິສັງຄົມຜູ້ຊົມໃຊ້ ທາງກະຊວງສາທາລະນະສຸກຈຶ້ງໄດ້ອອກແຈ້ງການເຕືອນ ຫຼັງພົບເຫັນມີການຈໍາຫນ່າຍຜະລິດຕະພັນສະເປຂ້າເຊື້ອທີ່ຕົກມາດຕະຖານຢູ່ໃນທ້ອງຕະຫຼາດ ຕາມນີ້
ໂດຍຜ່ານການລົງຈັດຕັ້ງປະຕິບັດກວດກາເຈວລ້າງມື ແລະ ສະເປຂ້າເຊື້ອ ຢູ່ 9 ຕົວເມືອງໃນນະຄອນຫຼວງວຽງຈັນ ໃນລະຫວ່າງເດືອນຕຸລາ 2021 ທີ່ຜ່ານມານີ້ ແມ່ນໄດ້ພົບເຫັນສະເປຂ້າເຊື້ອທີ່ຕົກມາດຕະຖານ ຫຼື ມີປະລິມານເຫຼົ້າຕໍ່າກວ່າ 70% ຈໍານວນ 23 ລາຍການ ທີ່ວາງຂາຍໃນທ້ອງຕະຫຼາດ ເຊິ່ງເປັນສາເຫດຫນຶ່ງທີ່ພາໃຫ້ມີການລະບາດຢ່າງຫນັກຫນ່ວງຢູ່ໃນນະຄອນຫຼວງ ແລະ ບັນດາແຂວງໃນທົ່ວປະເທດ (ລາຍລະອຽດຂອງຜະລິດຕະພັນແມ່ນໄດ້ຄັດຕິດມາພ້ອມນີ້).
.
ນອກຈາກນັ້ນ, ຍັງພົບເຫັນເຫຼົ້າຂ້າເຊື້ອທີ່ມີປະລິມານເຫຼົ້າຕໍ່າກວ່າ 90% (ປະລິມານເຫຼົ້າບໍ່ກົງກັບໃນສະຫຼາກ) ຈໍານວນ 4 ລາຍການ
ສະນັ້ນ, ຈິ່ງສະເຫນີມາຍັງອົງການຈັດຕັ້ງທີ່ກ່ຽວຂ້ອງຈົ່ງຊ່ວຍກັນປະກອບສ່ວນເຂົ້າໃນການຕ້ານ ແລະ ສະກັດກັ້ນການແຜ່ລະບາດຂອງພະຍາດ ໂຄວິດ-19 ດັ່ງນີ້
.
.
1 ຕິດຕາມ ແລະ ກວດກາຊອກຫາແຫຼ່ງທີ່ມາຂອງການນໍາເຂົ້າ ແລະ ຈໍາຫນ່າຍຜະລິດຕະພັນດັ່ງກ່າວ
2. ເຜີຍແຜ່ ແລະ ໃຫ້ຄວາມຮູ້ແກ່ຜູ້ປະກອບການ ແລະ ພໍ່ແມ່ປະຊາຊົນທີ່ຢູ່ຂອບເຂດຄວາມຮັບຜິດຊອບຂອງຕົນໃຫ້ຢຸດການຈໍາຫນ່າຍ ແລະ ຊົມໃຊ້ຜະລິດຕະພັນທີ່ບໍ່ໄດ້ຄຸນນະພາບ ແລະ ມາດຕະຖານ;
3 ປະຕິບັດມາດຕະການຕໍ່ຜູ້ທີ່ລະເມີດຕາມຄວາມເຫມາະສົມ.
