ສຳນັກຂ່າວຊິນຮວາລາຍງານວ່າ ສະມາຄົມຜູ້ຜະລິດລົດຍົນຂອງຫວຽດນາມ (VAMA) ເປີດເຜີຍວ່າ: ຍອດຈຳໜ່າຍລົດຍົນໃນຫວຽດນາມໃນເດືອນພະຈິກ 2021 ເພີ່ມຂຶ້ນ 30% ເມື່ອທຽບກັບເດືອນຕຸລາ ແລະ ເພີ່ມຂຶ້ນ 6% ເມື່ອທຽບໃສ່ໄລຍະດຽວກັນຂອງປີຜ່ານມາ ເນື່ອງຈາກຄວາມຕ້ອງການໃຊ້ລົດເພີ່ມຂຶ້ນໃນຊ່ວງທ້າຍປີນີ້ ໂດຍບັນດາບໍລິສັດຈຳໜ່າຍລົດຍົນ ໄດ້ຈັດກິດຈະກຳສົ່ງເສີມການຂາຍຢ່າງຕໍ່ເນື່ອງ ລວມທັງຫຼຸດຄ່າທຳນຽມການຂຶ້ນທະບຽນໃໝ່ ເປັນໄປໄຈຫຼັກທີ່ເຮັດໃຫ້ຍອດຂາຍເພີ່ມຂຶ້ນໃນເດືອນພະຈິກ.
ສະມາຄົມຜູ້ຜະລິດລົດຫວຽດນາມເປີດເຜີຍວ່າ ຍອດຂາຍລົດໃຫຍ່ໃນຫວຽດນາມໃນ 11 ເດືອນຂອງປີ 2021 ຢູ່ທີ່ 257.390 ຄັນ ເພີ່ມຂຶ້ນ 3% ເມື່ອທຽບກັບໄລຍະດຽວກັນຂອງປີຜ່ານມາ ໂດຍຍອດຂາຍລົດທີ່ປະກອບຢູ່ພາຍໃນປະເທດຫຼຸດລົງ 10%, ຂະນະທີ່ຍອດຂາຍລົດນຳເຂົ້າເພີ່ມຂຶ້ນ 26% ເມື່ອທຽບໃສ່ໄລຍະດຽວກັນຂອງປີຜ່ານມາ.