ສຳນັກຂ່າວຕ່າງປະເທດລາຍງານວ່າ ທ່ານ ອີລອນ ມັສ ຜູ້ບໍລິຫານບໍລິສັດເທສລາ ແລະ ເຈົ້າຂອງບໍລິສັດສະເປຊເອັກ ເປັນບຸກຄົນແຫ່ງປີ 2021 ຈາກການພັດທະນາເຕັກໂນໂລຊີສ້າງຄວາມປ່ຽນແປງໃຫ້ເກີດຂຶ້ນໃນສັງຄົມ, ຂະນະທີ່ນັກວິທະຍາສາດຜູ້ພັດທະນາວັກແຊັງປ້ອງກັນໂຄວິດ mRNA ໄດ້ຮັບການຍົກຍ້ອງໃຫ້ເປັນ “ຮີໂຣແຫ່ງປີ”.
ອີລອນ ມັສ ມະຫາເສດຖີຊາວອາເມຣິກາ ຜູ້ບໍລິຫານບໍລິສັດເທສລາຜູ້ຜະລິດລົດໄຟຟ້າລາຍໃຫຍ່ຂອງໂລກ ແລະ ເຈົ້າຂອງບໍລິສັດເຕັກໂນໂລຊີສຳຫຼວດອາວະກາດ ສະເປຊເອັກ ໄດ້ຮັບການຄັດເລືອກໃຫ້ເປັນບຸກຄົນແຫ່ງປີ 2021 ຈາກວາລະສານທາມ (TIME’s 2021 Person of the Year) ຈາກທີ່ລາວເປັນບຸກຄົນຊົງອິດທິພົນ ແລະ ເປັນບຸກຄົນແຫ່ງປີ 2021 ຈາກການພັດທະນາເຕັກໂນໂລຊີສ້າງຄວາມປ່ຽນແປງໃນສັງຄົມ.
ຫົວໜ້າບັນນາທິການວາລະສານ ທາມ ໄດ້ອະທິບາຍເຖິງສາເຫດທີ່ເລືອກ ອີລອນ ມັສ ເປັນບຸກຄົນແຫ່ງປີ ເນື່ອງຈາກວ່າ ລາວເປັນແບບຢ່າງຂອງມະຫາເສດຖີທີ່ສະເໜີທາງອອກຂອງການດຳລົງຊີວິດຂອງມະນຸດ ແລະ ຂັບເຄື່ອນສັງຄົມມະນຸດໄປສູ່ການປ່ຽນແປງຄັ້ງສຳຄັນ.
ສ່ວນສາຂາອື່ນໆ ເຊັ່ນ “ຮີໂຣແຫ່ງປີ” ວາລະສານ ທາມ ໄດ້ເລືອກເອົານັກວິທະຍາສາດ 4 ຄົນຄື: ຄຣິສມີເກຍ ຄໍເບັດ, ບານີ ແກຣມ, ຄາຕາລິນ ຄາຣິໂຄ ແລະ ດຣີວ ໄວສ໌ແມນ ທີ່ສ້າງເຄື່ອງມືສຳຄັນໃນການຕໍ່ສູ້ກັບໂຄວິດ-19 ດ້ວຍການພັດທະນາວັກແຊັງ mRNA.