ສຳນັກຂ່າວຕ່າງປະເທດລາຍງານວ່າ ອົງການອາຫານ ແລະ ການກະເສດແຫ່ງສະຫະປະຊາຊາດ (FAO) ຄາດການວ່າ ຜົນຜະລິດເຂົ້າໃນທະວີບອາຊີປີນີ້ ຈະເພີ່ມຂຶ້ນ 1,3% ເມື່ອທຽບກັບປີຜ່ານມາ ໂດຍຜົນຜະລິດເຂົ້າໃນປີນີ້ຄາດວ່າຈະຢູ່ປະມານ 691,9 ລ້ານໂຕນ.
ທັງນີ້ ເມື່ອຈຳແນກປະເທດຜູ້ຜະລິດ ແລະ ສົ່ງອອກເຂົ້າລາຍໃຫຍ່ແລ້ວ FAO ຄາດການວ່າ ຜົນຜະລິດເຂົ້າຂອງໄທຈະຢູ່ໃນເກນສະເລ່ຍ (ໃກ້ຄຽງກັບປີຜ່ານມາ) ເຖິງແມ່ນວ່າ ຊາວກະສິກອນຂອງໄທ ຈະເກັບກ່ຽວເຂົ້າໄດ້ເປັນຈຳນວນຫຼວງຫຼາຍແຕ່ເດືອນພຶດສະພາ-ເດືອນສິງຫາຜ່ານມາ ແຕ່ໃນຊ່ວງເດືອນກັນຍາ-ເດືອນຕຸລາ ພື້ນທີ່ການຜະລິດຂອງໄທໄດ້ຮັບຜົນເສຍຫາຍບໍ່ໜ້ອຍຈາກອຸທົກະໄພ. ໃນຂະນະທີ່ຜົນຜະລິດເຂົ້າຂອງຫວຽດນາມໃນປີນີ້ ກໍຢູ່ໃນລະດັບດຽວກັນກັບປີຜ່ານມາເຊັ່ນດຽວກັນ ເນື່ອງຈາກຜົນຜະລິດທີ່ເພີ່ມຂຶ້ນນັ້ນ ເມື່ອຄຳນວນແລ້ວເປັນການທົດແທນຜົນຜະລິດທີ່ເສຍໄປຈາກອຸທົກກະໄພ.
ແນວໃດກໍດີ ຜົນຜະລິດເຂົ້າຂອງກຳປູເຈຍ, ມາເລເຊຍ, ຟີລິບປິນ, ເນປານ, ຈີນ ແລະ ບັງກະລາເທດ ມີທ່າອ່ຽງເພີ່ມຂຶ້ນໃນປີນີ້ ຈຶ່ງເປັນແຮງຍູ້ຜົນຜະລິດເຂົ້າໂດຍລວມທົ່ວອາຊີເພີ່ມຂຶ້ນ.
