ສຳເລັດແລ້ວ 70% ແລ້ວ ຮຮ.ອະນຸບານ ເຂດຈັດສັນດົງບາກ ສະໜາມໄຊ

282

ໂຄງການກໍ່ສ້າງອາຄານ ໂຮງຮຽນອະນຸບານ ເຂດຈັດສັນດົງບາກ, ເມືອງ ສະໜາມໄຊ, ແຂວງ ອັດຕະປື ມີຄວາມຄືບໜ້າໄປແລ້ວ 70.61%, ຫຼັງຈາກທີ່ດໍາເນີນການກໍ່ສ້າງ ມາເປັນໄລຍະ 3 ເດືອນ ຄືເລີ່ມລົງມືກໍ່ສ້າງມາແຕ່ຕົ້ນເດືອນສິງຫາ 2021.
ເຊິ່ງໂຄງການກໍ່ສ້າງອາຄານໂຮຽຮຽນນີ້ ແມ່ນພະແນກສຶກສາທິການ ແລະ ກິລາ ແຂວງ ອັດຕະປື ເປັນເຈົ້າຂອງໂຄງການ ແລະ ຮັບເໝົາການກໍ່ສ້າງໂດຍ ບໍລິສັດ ຄໍາພວງ ກໍ່ສ້າງ ທີ່ມີໄລຍະການກໍ່ສ້າງ 2 ປີ, ແຕ່ວັນທີ 18 ສິງຫາ 2021 ເຖີງ 18 ສິງຫາ 2023 ໃນມູນຄ່າການກໍ່ສ້າງທັງໝົດ 1.724.327.660ກີບ (ໜຶ່ງຕື້ເຈັດຮ້ອຍຊາວສີ່ລ້ານສາມແສນຊາວເຈັດພັນຫົກຮ້ອຍຫົກສິບຫົກກີບ) ໂດຍແມ່ນກະຊວງສຶກສາທິການເປັນຜູ້ສະໜອງທຶນ.


ເມື່ອບໍ່ດົນມານີ້ ທ່ານ ອຸດົມສິນ ສີຊານົນ ຫົວໜ້າພະແນກສຶກສາທິການ ແລະ ກິລາ ແຂວງ ອັດຕະປື ໄດ້ລົງຕິດຕາມກວດກາຄວາມຄືບໜ້າ ໂຄງການກໍ່ສ້າງອາຄານໂຮງຮຽນ ອະນຸບານເຂດຈັດສັນດົງບາກ, ເມືອງສະໜາມໄຊ, ແຂວງ ອັດຕະປື ໃນນາມເຈົ້າຂອງໂຄງການ, ມີທ່ານ ບຸນແອນ ລອນຈະນົງ ຮອງຫົວໜ້າຫ້ອງການສຶກສາທິການ ແລະ ກິລາ ເມືອງ ສະໜາມໄຊ, ທ່ານ ໂພຄາ ວົງພູທອນ ຜູ້ຕາງໜ້າ ບໍລິສັດ ຄຳພວງກໍ່ສ້າງ ພ້ອມດ້ວຍບັນດາທ່ານ ຄະນະກຳມະການກວດກາ ຈາກຫ້ອງວ່າການປົກຄອງແຂວງ, ພະແນກການຕ່າງໆ ທີ່ກ່ຽວຂ້ອງເຂົ້າຮ່ວມ.


ໃນການລົງຕິດຕາມຄັ້ງນີ້ແມ່ນເພື່ອ ກວດກາຄວາມຄືບໜ້າໂຄງການກໍ່ສ້າງອາຄານໂຮງຮຽນໂດຍ ທ່ານ ນີລະນາມ ແວວສີ ວິຊາການກໍ່ສ້າງ ຂອງພະແນກສຶກສາທິການ ແລະ ກິລາ ແຂວງ ໄດ້ໃຫ້ຮູ້ວ່າ: ໂຄງການກໍ່ສ້າງອາຄານໂຮງຮຽນອະນຸບານ ເຂດຈັດສັນດົງບາກ ເມືອງສະໜາມໄຊ ແຂວງອັດຕະປື ມີອາຄານຫ້ອງການ 1 ຫຼັງ ປະກອບມີ 2 ຫ້ອງ , ມີຫ້ອງນໍ້າຕິດ ແລະ ອາຄານຮຽນ 1 ຫຼັງ 4 ຫ້ອງ, ຫ້ອງນໍ້າ 4 ຫ້ອງ ແລະ ຫ້ອງອາບນໍ້າເດັກ 1 ຫ້ອງ, ອາຄານ 2 ຫຼັງນີ້ ເປັນອາຄານເບຕົງເສີມເຫລັກ, ຊັ້ນດຽວ ມຸງດ້ວຍກະເບື້ອງ, ຝາກໍ່-ໂບກ, ຕົບແຕ່ງສີ ພ້ອມນີ້ ກໍຍັງມີການສະໜອງໄຟຟ້າ, ນໍ້າ, ເຄື່ອງສຸຂະພັນ, ເຟີນິເຈີຄົບຊຸດ, ເສົາທຸງ, ສະໜອງນໍ້າ ແລະ ເຄື່ອງຫຼິ້ນສຳລັບເດັກ ລວມມູນຄ່າການກໍ່ສ້າງ 1,7 ຕື້ກວ່າກີບ.


ຜ່ານການລົງຕິດຕາມກວດກາໂຄງການກໍ່ສ້າງດັ່ງກ່າວ ທ່ານ ອຸດົມສິນ ສີຊານົນ ແລະ ຄະນະກຳມະການກວດກາ ທີ່ເຂົ້າຮ່ວມໄດ້ເຫັນດີຮັບຮອງຜົນສຳເລັດ ຂອງໂຄງການປະຕິບັດໄດ້ 70.61% ຄິດໄລ່ເປັນມູນຄ່າແມ່ນ 1,2 ຕື້ກວ່າກີບ ເຫຼືອພຽງ 30% ທາງບໍລິສັດ ຈະໄດ້ສືບຕໍ່ກໍ່ສ້າງ ໃຫ້ສຳເລັດຕາມກຳນົດສັນຍາທີ່ລະບຸໄວ້.


ຮູບ: ສສກ ອັດຕະປື