ສຳນັກຂ່າວຕ່າງປະເທດລາຍງານວ່າ ອົງການອະນາໄມໂລກ (WHO) ໄດ້ເຜີຍແຜ່ຖະແຫຼງການເມື່ອວັນທີ 29 ພະຈິກຜ່ານມາວ່າ ເຊື້ອໂຄວິດ ກາຍພັນໂອໄມຄຣອນ ເປັນເຊື້ອໄວຣັສກາຍພັນໃນລະດັບສູງຢ່າງບໍ່ເຄີຍມີມາກ່ອນ ໂດຍການກາຍພັນບາງຕຳແໜ່ງເປັນທີ່ໜ້າວິຕົກກັງວົນ ເຊິ່ງອາດຈະສົ່ງຜົນຕໍ່ການລະບາດຂອງພະຍາດໂຄວິດ-19 ທົ່ວໂລກ.
ຂະນະນີ້ ອົງການອະນາໄມໂລກໄດ້ປະເມີນຄວາມສ່ຽງທົ່ວໂລກຈາກເຊື້ອໄວຣັສໂອໄມຄຣອນໄວ້ຢູ່ລະດັບສູງ ແລະ ອາດຈະສົ່ງຜົນກະທົບຮຸນແຮງຕໍ່ພື້ນທີ່ທີ່ມີອັດຕາການແຜ່ລະບາດຢູ່ໃນລະດັບສູງມາກ່ອນແລ້ວ. ຂະນະທີ່ຜົນການສຶກສາຄົ້ນຄວ້າ ລາຍລະອຽດກ່ຽວກັບສັກກະຍະພາບຂອງເຊື້ອໄວຣັສໃນການຫຼົບຫຼີກພູມຄຸ້ມກັນທີ່ກະຕຸ້ນດ້ວຍວັກຊີນແຕ່ລະຊະນິດ ແລະ ພູມຄຸ້ມກັນແບບທຳມະຊາດ ທີ່ຜູ້ຕິດເຊື້ອປິ່ນປົວຫາຍດີແລ້ວ ຈະເຜີຍແຜ່ໃນໄວໆນີ້.
ອົງການອະນາໄມໂລກ ຍັງຮຽກຮ້ອງໃຫ້ທຸກປະເທດ ຈົ່ງຮ່ວມກັນປະເມີນຄວາມສ່ຽງ ແລະ ແບ່ງປັນຂໍ້ມູນ ຫາກພົບຜູ້ປ່ວຍ ຄວບຄູ່ກັບການເດີນໜ້າສັກວັກຊີນໃຫ້ຄອບຄຸມປະຊາກອນຫຼາຍທີ່ສຸດໂດຍສະເພາະກຸ່ມສ່ຽງ ພ້ອມທັງກຽມຄວາມພ້ອມດ້ານສາທາລະນະສຸກ ເພື່ອຮັບມືກັບສະຖານະການທີ່ອາດຈະເກີດຂຶ້ນ.
