ຕອນເຊົ້າວັນທີ 26 ພະຈິກ 2021 ພະແນກແຮງງານ ແລະ ສະຫວັດດີການສັງຄົມແຂວງສະຫວັນນະໄດ້ຈັດພິທີມອບ-ຮັບເງິນອຸດໜູນນະໂຍບາຍຕໍ່ຜູ້ມີຜົນງານ ແລະ ຄຸນງາມຄວາມດີຕໍ່ປເທດຊາດໃນງວດທີ 3 ປະຈຳປີ 2021, ໂດຍການເຂົ້າຮ່ວມຂອງທ່ານ ນາງ ຫຼິງທອງ ແສງຕາວັນ ກໍາມະການປະຈຳພັກແຂວງ ຮອງເຈົ້າແຂວງສະຫວັນນະເຂດ, ທ່ານ ນາງ ພາວັນ ບົວຫຼວງລາດ ກໍາມະການພັກແຂວງ ຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ,
ມີບັນດາທ່ານໃນຄະນະຄົ້ນຄ້ວານະໂຍບາຍຂັ້ນແຂວງ, ຂັ້ນເມືອງ ພ້ອມດ້ວຍບັນດາທ່ານນັກປະຕິວັດອາວຸໂສ ຍາດພີ່ນ້ອງ ແລະ ຄອບຄົວຂອງຜູ້ໄດ້ຮັບນະໂຍບາຍເຂົ້າຮ່ວມ.
ໃນພິທີ ທ່ານ ວາລິນ ອິນທະສອນ ຮອງຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ ກໍ່ໄດ້ຜ່ານຂໍ້ຕົກລົງຂອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ວ່າດ້ວຍການອະນຸມັດ ເງິນອຸດໜູນເທື່ອດຽວໃຫ້ຜູ້ມີຜົນງານ ແລະ ຄຸນງາມຄວາມດີຕໍ່ປເທດຊາດ ຜູ້ທີ່ຍັງມີຊີວິດໃນງວດທີ III ປະຈໍາປີ 2021 ຈໍານວນ 3 ທ່ານ, ເປັນເງິນທັງໝົດ 59 ລ້ານ 6 ແສນກວ່າກີບ. ແລະ ຜ່ານຂໍ້ຕົກລົງວ່າດ້ວຍອະນຸມັດເງິນນະໂຍບາຍອຸດໜູນເສຍສະຫຼະຊີວິດໃນງວດທີ III ປະຈຳປີ 2021ໃຫ້ຈຳນວນ 19 ທ່ານ, ລວມເປັນເງິນທັງໝົດ360 ລ້ານ 4 ແສນກວ່າກີບ.
ໂອກາດນີ້ ທ່ານ ນາງ ຫຼິງທອງ ແສງຕາວັນ ກຳມະການປະຈຳພັກແຂວງ ຮອງເຈົ້າແຂວງສະຫວັນນະເຂດ ກໍ່ໄດ້ຕາງໜ້າໃຫ້ຄະນະພັກ-ອຳນາດການປົກຄອງແຂວງສະຫວັນນະເຂດ ມອບເງິນອຸດໜູນນະໂຍບາຍເທື່ອດຽວຕໍ່ຜູ້ຍັງມີຊີວິດ 3 ທ່ານ, ຍິງ1ທ່ານ ໃນນັ້ນມີເມືອງນອງ1ທ່ານ,ເມືອງພີນ2ທ່ານ ແລະ ມອບເງິນອຸດໜູນນະໂຍບາຍຕໍ່ຜູ້ມີຜົນງານ ແລະ ຄຸນງາມຄວາມດີໃນພາລະກິດຮັບໃຊ້ຊາດເຊິ່ງມີທັງໝົດ 19 ທ່ານ,ຍິງ7ທ່ານ ມີ ເມືອງນອງ 14ທ່ານ,ຍິງ 7 ທ່ານ, ເມືອງພະລານໄຊ1ທ່ານ, ເມືອງເຊໂປນ1 ທ່ານ ແລະ ເມືອງທ່າປາງທອງ 3 ທ່ານ.
.
ພ້ອມນີ້ທ່ານ ນາງ ຫຼິງທອງ ແສງຕາວັນ ກໍ່ໄດ້ສະແດງຄວາມຊົມເຊີຍຕໍ່ ນັກປະຕິວັດອາວຸໂສ, ຕໍ່ຜູ້ທີ່ມີຜົນງານ ແລະ ຄຸນງາມຄວາມດີໃນພາລະກິດຮັບໃຊ້ປະເທດຊາດ, ເຊິ່ງສະແດງໃຫ້ເຫັນເຖິງການເສຍສະຫຼະເຫື່ອແຮງຕໍ່ພະລະກິດຮັບໃຊ້ປະເທດຊາດ ເຮັດໃຫ້ຄົນຮຸ່ນຫຼັງມີຄວາມສະຫງົບສຸກ ສາມາດສ້າງສາພັດທະນາໃນໄລຍະໃໝ່. ຈຳນວນເງິນທີ່ໄດ້ມອບໃນຄັ້ງນີ້ ກໍ່ເພື່ອເປັນການຊຸກຍູ້ນ້ຳໃຈຮັກຊາດ ຂອງຍາດພີ່ນ້ອງ, ດັ່ງນັ້ນທຸກຄົນກໍ່ຕ້ອງນຳໃຊ້ໃຫ້ເກີດປະໂຫຍດສູງສຸດ ຕາມເຫື່ອແຮງທີ່ຕົນໄດ້ປະຕິບັດມາ, ດ້ວຍການປະກອບສ່ວນຍົກລະດັບຊີວິດການເປັນຢູ່ຂອງຕົນ ແລະ ຄອບຄົວໃຫ້ດີຂຶ້ນ, ເຊິ່ງເປັນໜຶ່ງໃນການປະກອບສ່ວນສ້າງສາພັດທະນາປະເທດຊາດ ຕາມແນວທາງນະໂຍບາຍຂອງພັກ ແລະ ລັດຖະບານ.
