ສຳນັກຂ່າວ BBC ລາຍງານວ່າ ອັງກິດ ກັບ ຝຣັ່ງຈະຮ່ວມມືກັນ ເພື່ອຫາຊ່ອງທາງຢຸດຕິຊາວອົບພະຍົກທີ່ເດີນທາງຜ່ານຊ່ອງແຄບອັງກິດ ຫຼັງເກີດເຫດເຮືອຊາວອົບພະຍົກຫຼົ້ມເມື່ອວັນທີ 24 ພະຈິກຜ່ານມາ ເຮັດໃຫ້ມີຜູ້ເສຍຊີວິດ 27 ຄົນ ກາຍເປັນໂສກນາດຕະກຳຄັ້ງໃຫຍ່ທີ່ເກີດຂຶ້ນໃນຊ່ອງແຄບອັງກິດ.
ລາຍງານລະບຸວ່າ: ທ່ານ ບໍຣິສ ຈອນສັນຂອງອັງກິດ ແລະ ປະທານາທິບໍດີ ເອັມມານູເອວ ມາຄຣົງ ຂອງຝຣັ່ງ ໄດ້ເຫັນດີເປັນເອກະພາບກັນວ່າ ຂະບວນການຄ້າມະນຸດເຮັດໃຫ້ຊີວິດຂອງຊາວອົບພະຍົກຕົກຢູ່ໃນຄວາມສ່ຽງ ຫຼັງຈາກທີ່ເກີດໂສກນາດຕະກຳຂຶ້ນ ໂດຍນາຍົກລັດຖະມົນຕີອັງກິດລະບຸວ່າ ລາວຮູ້ສຶກເສຍໃຈເປັນຢ່າງຍິ່ງຕໍ່ເຫດການທີ່ເກີດຂຶ້ນ ແລະ ຈະພະຍາຍາມຢ່າງສຸດຄວາມສາມາດ ເພື່ອຢັບຢັ້ງຂະບວນການຄ້າມະນຸດ ແຕ່ກໍຍອມຮັບວ່າ ເປັນເລື່ອງຍາກທີ່ຈະໂນ້ມນ້າວໃຫ້ຝຣັ່ງເຮັດຕາມທີ່ອັງກິດເຫັນວ່າເໝາະສົມຕໍ່ສະຖານະການ ແລະ ຄິດວ່າ ການທີ່ລັດຖະບານຝຣັ່ງສັ່ງຫ້າມເຮືອຜູ້ອົບພະຍົກອອກຈາກຝັ່ງນັ້ນ ຍັງບໍ່ພຽງພໍ ໂດຍຫວັງວ່າ ຝຣັ່ງຈະມີຂໍ້ສະເໜີໃໝ່ທີ່ເຮັດໃຫ້ເກີດການລາດຕະເວນຮ່ວມກັນໃນນ່ານນ້ຳຝຣັ່ງ.
ລາຍງານລະບຸວ່າ: ປະທານາທິບໍດີຝຣັ່ງ ໄດ້ໃຫ້ສັນຍາກັບນາຍົກອັງກິດວ່າ ຝຣັ່ງຈະໃຫ້ການຮ່ວມມືກັບອັງກິດຢ່າງເຕັມທີ່ ແລະ ຈະບໍ່ໂຍງສະຖານະການດັ່ງກ່າວໃຫ້ເປັນປະເດັນທາງການເມືອງ.
ກ່ອນໜ້ານີ້ ອັງກິດໄດ້ໃຫ້ຄຳໝັ້ນສັນຍາວ່າ ຈະສະໜັບສະໜູນເງິນຈຳນວນ 62,7 ລ້ານປອນໃຫ້ແກ່ຝຣັ່ງ ເພື່ອເຊ່ວຍເຫຼືອໜ່ວຍງານລາດຕະເວນຕາມແຄມຝັ່ງ, ການເຝົ້າລະວັງທາງອາກາດ ແລະ ໂຄງສ້າງພື້ນຖານດ້ານຄວາມປອດໄພທີ່ທ່າເຮືອ.
