ສຳນັກຂ່າວຣອຍເຕີລາຍງານໃນວັນທີ 25 ພະຈິກຜ່ານມາວ່າ ທ່ານ ດຣ. ທີໂດຣສ ອັກຮານອມ ກິບຣີເຢຊູສ ຜູ້ອຳນວຍການໃຫຍ່ ອົງການອະນາໄມໂລກ (WHO) ກ່າວວ່າ: ທະວີບເອີຣົບກຳລັງກາຍເປັນສູນກາງການແຜ່ລະບາດຂອງພະຍາດໂຄວິດ-19 ອີກຄັ້ງ ພ້ອມເຕືອນວ່າ ບໍ່ມີປະເທດໃດໃນໂລກທີ່ຫຼຸດພົ້ນຈາກວົງຈອນການລະບາດ ໂດຍສະເພາະສາຍພັນເດວຕ້າ ເຮັດໃຫ້ວັກແຊັງມີປະສິດທິພາບໃນການປ້ອງກັນຫຼຸດລົງ, ກ່ອນໜ້ານີ້ວັກແຊັງສາມາດປ້ອງກັນການແຜ່ລະບາດໄດ້ 60% ແຕ່ພໍເຊື້ອເດວຕ້າລະບາດໄປທົ່ວໂລກ ແລະ ກາຍເປັນສາຍພັນຫຼັກໃນການແຜ່ລະບາດໃນຂະນະນີ້ ເຮັດໃຫ້ວກແຊັງສາມາດປ້ອງກັນການລະບາດໄດ້ພຽງ 40%.
ທີ່ໜ້າກັງວົນຍິ່ງກວ່ານັ້ນກໍຄື ຄົນສ່ວນໃຫຍ່ມັກເຂົ້າໃຈວ່າ ຖ້າສັກວັກແຊັງຄົບໂດສແລ້ວ ບໍ່ຈຳເປັນຕ້ອງລະມັດລະວັງອີກຕໍ່ໄປ ເຊິ່ງເປັນຄວາມເຂົ້າໃຈທີ່ຜິດພາດຢ່າງໜັກ ເຊິ່ງໃນຄວາມເປັນຈິງແລ້ວ, ວັກແຊັງພຽງແຕ່ປ້ອງກັນບໍ່ໃຫ້ຜູ້ຕິດເຊື້ອມີອາການຮຸນແຮງ ແລະ ເສຍຊີວິດເທົ່ານນັ້ນ ແຕ່ຍັງບໍ່ສາມາດປ້ອງກັນການຕິເຊື້ອໄດ້, ດັ່ງນັ້ນຜູ້ທີ່ສັກວັກແຊັງຄົບໂດສແລ້ວ ກໍຈຳເປັນຕ້ອງປະຕິບັດມາດຕະການປ້ອງກັນຕົນເອງອີກຕໍ່ໄປ.
WHO ໄດ້ເປີດເຜີຍຂໍ້ມູນພັນທຸກຳຂອງເຊື້ອໄວຣັສ GISAID ສູນກາງເກັບລວບລວມພັນທຸກຳຂອງໄວຣັສໂຄວິດ ວ່າ ຕົວຢ່າງເຊື້ອທີ່ເກັບລວບລວມໄດ້ໃນຊ່ວງ 60 ວັນຜ່ານມາ 99,8% ເປັນເຊື້ອເດວຕ້າ ເຊິ່ງຕົວເຊື້ອເອງກຳລັງຢູ່ໃນລະຫວ່າງວິວັດທະນາການອີກດ້ວຍ.
